ໃນເວລາ 15:00 ໂມງ ຂອງວັນທີ 09 ມິຖຸນາ 2022, ທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ທີ່ ນະຄອນຫຼວງຮ່າໂນ້ຍ ໄດ້ຕ້ອນຮັບການເຂົ້າຍື່ນສານຕາຕັ້ງຂອງທ່ານ ນາງ ອາມານ ອັບເດວ ຄາເດີ ເອວມໍຊີ ຊາລາມາ (AMAL ABDEL KADER ELMORSI SALAMA), ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ອາຣັບ ເອຢິບ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ, ໂດຍມີສຳນັກງານຕັ້ງຢູ່ ຮ່າໂນ້ຍ, ສສ ຫວຽດນາມ.

ໃນຕອນຄໍ່າຂອງວັນທີ 28 ພຶດສະພາ 2022 ທີ່ ນະຄອນຫລວງປາຣີ, ປະເທດຝຣັ່ງ, ສະຖານເອກອັກຄະລັດຖະທູດລາວ ຮ່ວມກັບ ສໍາພັນຄົນລາວທີ່ປະເທດຝຣັ່ງ ໄດ້ຈັດພິທີສະຫຼອງບຸນປີໃໝ່ລາວປະຈໍາປີ 2022 ຂື້ນຢ່າງເປັນທາງການ. ງານດັ່ງກ່າວໄດ້ມີ  ບັນດາທ່ານ ເອກອັກຄະລັດຖະທູດລາວ ທີ່ ປະຈໍາຢູ່ທະວີບ ເອິຣົບ 7 ປະເທດໃຫ້ກຽດເຂົ້າຮ່ວມ, ມີຮອງເຈົ້າເມືອງ ຊິດ-ອໍຣອງຊິດ ມີປະທານ, ບັນດາຮອງປະທານ, ພ້ອມດ້ວຍຄະນະສໍາພັນຄົນລາວແຕ່ລະຂົງເຂດ ແລະ  ພີ່ນ້ອງຄົນເຊື້ອຊາດລາວທີ່ດຳລົງຊີວິດຢູ່ປະເທດ ຝຣັ່ງ ແລະ ປະເທດໃກ້ຄຽງເຂົ້າຮ່ວມ 400 ກວ່າຄົນ. ຢູ່ໃນງານ ໄດ້ພິທີບາສີສູ່ຂວັນ ແລະ ອວຍພອນປີ   ໃໝ່ເຊິ່ງກັນ ແລະ ກັນ ໃຫ້ແກ່ບັນດາແຂກທີ່ໄດ້ມາຮ່ວມ. ຫຼັງຈາກນັ້ນ, ທ່ານ ຈູມຄໍາ ຫລວງວັນ, ປະທານສໍາພັນຄົນລາວ ກໍ່ໄດ້ຂື້ນກ່າວຈຸດປະສົງຂອງການຈັດງານບຸນປີໃໝ່ ເພື່ອຮັກສາຮິດຄອງປະເພນີທີ່ເຄີຍປະຕິບັດກັນມາ  ແລະ ເພື່ອສ້າງຄວາມສາມັກຄີຮັກແພງກັບບັນດາພີ່ນ້ອງຄົນເຊື້ອຊາດລາວທົ່ວປະເທດ ຝຣັ່ງ ກໍ່ຄືໃນທົ່ວເອິຣົບ. ຫຼັງຈາກນັ້ນ ທ່ານຮອງເຈົ້າເມືອງ ຊິດ-ອໍຣອງຊິດ ກໍ່ໄດ້ຂື້ນກ່າວມີຄໍາເຫັນຕໍ່ງານບຸນປີໃໝ່ ແລະໃນຕອນທ້າຍ ທ່ານ ຄໍາອິນ ຄິດຈະເດດ, ເອກອັກຄະລັດຖະທູດລາວ ປະຈໍາປະເທດຝຣັ່ງ ກໍ່ໄດ້ມີຄໍາເຫັນ ຍ້ອງຍໍຊົມເຊີຍບັນດາຄະນະຈັດຕັ້ງຂອງສໍາພັນຄົນລາວທີ່ປະເທດຝຣັ່ງ ເຊິ່ງ ໄດ້ເອົາໃຈໃສ່ການຈັດງານບຸນດັ່ງກ່າວນີ້້ຂື້ນ ແລະຍ້ອງຍໍຊົມເຊີຍພີ່ນ້ອງຄົນເຊື້ອຊາດລາວຢູ່ຕ່າງປະ ເທດ ທີ່ຍາມໃດກໍ່ໃຫ້ຮັກສາໄວ້ຮີດປະເພນີອັນດີງາມຂອງບັນພະບູລຸດລາວເຮົາທີ່ມີມາແຕ່ດົນນານ ແລະໄດ້ຊົມເຊີຍຕໍ່ບັນດາຄົນເຊື້ອຊາດລາວທັງຫມົດ ຕໍ່ຜູ້ທີ່ມີນໍ້າໃຈເສຍສະຫຼະຮັກເຊື້ອແພງຊາດກໍ່ຄຶການປະ ກອບສ່ວນຊ່ວຍເຫຼືອ ສປປ ລາວ ໃນຫຼາຍຮູບແບບທັງທາງກົງແລະທາງອ້ອມ.