ຕອນເຊົ້າຂອງວັນທີ 23 ກັນຍາ 2021, ທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ທີ່ ຮ່າໂນ້ຍ ໄດ້ຕ້ອນຮັບການເຂົ້າຍື່ນສານຕາຕັ້ງຂອງທ່ານ ອາໂກສທິນໂຫ ແອນເດຣ໌ ເດີ ກາເວນໂຫ ເຟີນັນເດດສ໌ (AGOSTINHO ANDRÉ DE CARVALHO FERNANDES) ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ອັງໂກລາ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ, ໂດຍມີສຳນັກງານສະຖານທູດຕັ້ງຢູ່ ຮ່າໂນ້ຍ, ສສ ຫວຽດນາມ.
ໃນຕອນບ່າຍຂອງວັນທີ 1 ກັນຍາ 2021, ຢູ່ທີ່ ຫ້ອງການບໍລິການສະຖານກົງສຸນໃຫຍ່, ນະຄອນຄຸນມິງ, ແຂວງ ຢຸນນານ ໄດ້ມີການຈັດພິທີມອບ-ຮັບເຄື່ອງຊ່ວຍເຫລືອດ້ານອຸປະກອນການແພດ ທີ່ສະມາຄົມມິດຕະພາບກັບນານາຊາດ ປະຊາຊົນ ແຂວງຢຸນນານ, ສປ ຈີນ ມອບໃຫ້ແກ່ ກະຊວງສາທາລະນະສຸກ ແລະ 4 ແຂວງພາກເຫນືອຂອງ ສປປ ລາວ.
ເຂົ້າຮ່ວມໃນພິທີດັ່ງກ່າວມີ ທ່ານ ນາງ ຢາງ ມູ້, ຫົວຫນ້າຫ້ອງການພົວພັນຕ່າງປະເທດ ແຂວງຢຸນນານ, ທ່ານ ນາງ ມະນີລາ ສົມບັນດິດ, ກົງສຸນໃຫຍ່ ແຫ່ງ ສປປ ລາວ ປະຈໍາ ນະຄອນຄຸນມິງ ແລະ ພະນັກງານທີ່ກ່ຽວຂ້ອງຂອງສອງຝ່າຍຈໍານວນຫນຶ່ງ.
ໃນໂອກາດນີ້, ທ່ານກົງສຸນໃຫຍ່ ໄດ້ຕາງຫນ້າໃຫ້ພັກ-ລັດ ກໍຄື ປະຊາຊົນລາວ ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນເປັນຢ່າງສູງ ມາຍັງພັກ-ລັດ ແລະ ປະຊາຊົນແຂວງຢູນນານ ທີ່ໄດ້ໃຫ້ການຊ່ວຍເຫລືອແກ່ ສປປ ລາວ ທຸກຄັ້ງ ທີ່ມີການແຜ່ລະບາດຂອງພະຍາດໂຄວິດ ຕະຫລອດໄລຍະທີ່ຜ່ານມາ ແລະ ຄັ້ງນີ້ ສະມາຄົມມິດຕະພາບກັບນານາຊາດ ປະຊາຊົນ ແຂວງຢູນນານ ກໍ່ໄດ້ໃຫ້ການຊ່ວຍເຫລືອອຸປະກອນດ້ານການແພດ ມູນຄ່າ 1 ລ້ານຢວນ ແກ່ ກະຊວງສາທາລະນະສຸກ ແລະ 4 ແຂວງພາກເຫນືອຂອງລາວ, ແລະ ເຊື່ອຫມັ້ນວ່າ ການຊ່ວຍເຫລືອດັ່ງກ່າວນີ້ ຈະປະກອບສ່ວນສໍາຄັນເຂົ້າໃນການເພີ່ມທະວີການຮັດແຫນ້ນໄມຕີຈິດມິດຕະພາບ ທີ່ເປັນມູນເຊື້ອທີ່ມີມາແຕ່ດົນນານ ແລະ ການຮ່ວມມືຮອບດ້ານ ຫນັ້ງຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳລາວ-ຈີນ, ຈີນ-ລາວ ໃຫ້ນັບມື້ນັບເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ໃນວັນທີ 18 ກັນຍາ 2021, ທ່ານ ຄໍາພັນ ອັ່ນລາວັນ, ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ປະເທດສະຫະລັດ ອາເມລິກາ ແລະ ການາດາ, ພ້ອມດ້ວຍ ທ່ານ ອານຸພາບ ວົງໜໍ່ແກ້ວ, ເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການສະຫະປະຊາຊາດ ທີ່ ນິວຢອກ ແລະ ຄະນະ ໄດ້ເຄື່ອນໄຫວຈັດກິດຈະກໍາແຂ່ງຂັນກິລາ ພົບປະມິດຕະພາບຮ່ວມສອງສໍານັກງານ ແລະ ພີ່ນ້ອງເຊື້ອຊາດລາວ ຢູ່ ລັດເດີລາແວ, ໂດຍໄດ້ຮັບການຕ້ອນຮັບຢ່າງອົບອຸ່ນ ແລະ ອໍານວຍຄວາມສະດວກຈາກ ທ່ານ ສົມກຽດ ພຸດທະວົງສາ, ປະທານສະມາຄົມລາວ ລັດເດລາແວ, ທ່ານ ຄໍາຫຼ້າ ຄຸດສະຫວັນ, ເລຂາທິການສະມາຄົມ ແລະ ຜູ້ຕາງໜ້າເຜົ່າກືມມຸ ປະຈໍາ ລັດເດລາແວ ແລະ ຄະນະ ລວມທັງພີ່ນ້ອງເຊື້ອຊາດລາວ ທີ່ ລັດເດລາແວ ແລະ ລັດໃກ້ຄຽງ ຊຶ່ງມີຜູ້ເຂົ້າຮ່ວມ ປະມານ 60 ທ່ານ.