ໃນວັນທີ 25 ກໍລະກົດ 2017, ຢູ່ທີ່ໂຮງຮູບເງົາ Times Cineplex ຂອງບຣູໄນ ໄດ້ຈັດພິທີ ເລີ້ມຮູບເງົາເລື່ອງ “Ada Apa Dengan-RINA2”, ຊຶ່ງເປັນການຮ່ວມຜະລິດ ແລະ ສະແດງໂດຍບໍລິສັດ Lao Art Media ຂອງລາວ ແລະ ບລິລິສັດ Regalblue Production ຂອງບຣູໄນ. ໃນພິທີດັ່ງກ່າວໄດ້ມີທ່ານ Pehin Datu Lailaraja Major General (Rtd) Dato Paduka Seri Haji Awang Halbi bin Haji Mohamad Yussof, ລັດຖະມົນຕີກະຊວງວັດທະນະທຳ, ຊາວໜຸ່ມ ແລະ ກິລາບຣູໄນ ເຂົ້າຮ່ວມເປັນແຂກກິດຕິມະສັກ ແລະ ທ່ານ ອຳໄພ ກິນດາວົງ, ເອກອັກຄະລັດຖະທູດລາວທີ່ບຣູໄນ ພ້ອມພັນລະຍາ, ນອກຈາກນີ້ ກໍມີແຂກຮັບເຊີນບັນດາທຸຕານຸທູດ ຈາກບັນດາປະເທດອາຊຽນ ແລະ ອາຊຽນບວກ, ພ້ອມດ້ວຍບັນດາເຈົ້າໜ້າທີ່ຈາກຂະແໜງການທີ່ກ່ຽວຂ້ອງທັງຈາກພາກ ລັດ ແລະ ເອກະຊົນ ເຂົ້າຮ່ວມ.

ໃນວັນທີ 18 ກໍລະກົດ 2017, ສປປ ລາວ ແລະ ອົດສະຕາລີ ໄດ້ຈັດກອງປະຊຸມສົນທະນາດ້ານສິດທິມະນຸດ ຄັ້ງທີ 5 ທີ່ ນະຄອນຫຼວງວຽງຈັນ. ຝ່າຍລາວນຳໂດຍ ທ່ານ ພູໂຂງ ສີສຸລາດ, ຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ໂດຍມີເຈົ້າໜ້າທີ່ຂັ້ນສູງຈາກ ສະພາແຫ່ງຊາດ, ກະຊວງຍຸຕິທຳ, ກະຊວງປ້ອງກັນຄວາມສະຫງົບ, ສານປະຊາຊົນສູງສຸດ, ສານປະຊາຊົນນະຄອນຫຼວງວຽງຈັນ, ກະຊວງພາຍໃນ, ສູນກາງແນວລາວສ້າງຊາດ, ສູນກາງສະຫະພັນແມ່ຍິງລາວ, ກະຊວງແຮງງານ ແລະ ສະຫວັດດີການສັງຄົມ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ບັນດາກົມກ່ຽວຂ້ອງໃນກະຊວງການຕ່າງປະເທດ. ຝ່າຍອົດສະຕາລີ ນຳໂດຍ ທ່ານ ດຣ. ແລກລານ ສຕຣາຮັນ (Lachlan Strahan), ຜູ້ຊ່ວຍລັດຖະມົນຕີ, ຫົວໜ້າກົມນະໂຍບາຍຫຼາຍຝ່າຍ, ກະຊວງການຕ່າງປະເທດ ແລະ ການຄ້າ ພ້ອມດ້ວຍເຈົ້າໜ້າທີ່ຂັ້ນສູງຈາກ ກະຊວງການຕ່າງປະເທດ ແລະ ການຄ້າ, ຄະນະກຳມາທິການສິດທິມະນຸດອົດສະຕຣາລີ, ທ່ານ ຈອນ ວິນລຽມ, ເອກອັກຄະລັດຖະທູດອົດສະຕຣາລີ ແລະ ພະນັກງານສະຖານທູດອົດສະຕຣາລີປະຈຳລາວ ເຂົ້າຮ່ວມ.

ພິທີໂຮມ​ຊຸມນຸມ ​ເພື່ອສະ​ເຫຼີ​ມສະຫຼອງ​ສອງ​ວັນ​ປະຫວັດສາດຄື: ວັນ​ສ້າງ​ຕັ້ງ​ສາຍ​ພົວພັນ​ການ​ທູດຄົບຮອບ 55 ປີ​ ແລະ ວັນ​ເຊັນ​ສົນທິສັນຍາ​ມິດຕະພາບ ລາວ-ຫວຽດນາມ ຄົບຮອບ 40 ປີ ​ໄດ້​ຈັດ​ຂຶ້ນ​ໃນ​ວັນ​ທີ 18 ກໍລະກົດ 2017, ທີ່​ນະຄອນ​ດາ​ນັງ;