ໂດຍປະຕິບັດຕາມການຊີ້ນຳຂອງຄະນະບໍລິຫານງານຊາວຫນຸ່ມກະຊວງການຕ່າງປະເທດ ແລະ ພາຍໃຕ້ການຊີ້ນຳຂອງຄະນະພັກ-ຄະນະນຳສະຖານທູດ. ໃນຕອນບ່າຍວັນທີ 11 ພະຈິກ 2017, ຫນ່ວຍຊາວຫນຸ່ມສະຖານທູດລາວ ກໍຄືຈຸຊາວຫນຸ່ມນັກສຶກສາ ຮ່ວມກັບ ສະມາຄົມນັກສຶກສາລາວ ທີ່ ສ.ເກົາຫລີ ໄດ້ຈັດຕັ້ງພິທີເປີດຂະບວນການຂໍ້ແຂ່ງຂັນ 4 ບຸກຂອງຊາວຫນຸ່ມ ປປລ ແລະ ກິດຈະກຳກິລາປະຈຳປີ 2017 ຂອງນັກສຶກສາລາວ, ໂດຍມີພະນັກງານສະຖານທູດ ແລະ ສະມາຊິກຊາວຫນຸ່ມ ປປລ ເຂົ້າຮ່ວມ 50 ກວ່າສະຫາຍ (ໃນນັ້ນມີຊາວຫນຸ່ມຈາກສະຖານທູດ, ການບິນລາວ ແລະ ນັກສຶກສາ).
ໃນວັນທີ 30 ຕຸລາ 2017, ທ່ານ ຄຳສວຍ ແກ້ວດາລາວົງ, ເອກອັກຄະລັດຖະທູດລາວ ປະຈຳ ສ.ເກົາຫລີ ຂຶ້ນກ່າວສະແດງຄວາມຊົມເຊີຍໃນພິທີເປີດຖ້ຽວບິນຂອງສາຍການບິນ Air Busan ຂອງ ສ.ເກົາຫລີ ຈາກ ສະຫນາມບິນສາກົນ ກິມແຮ ຫາ ສະຫນາມບິນສາກົນ ວັດໄຕ (ກິມແຮ-ວັດໄຕ-ກິມແຮ 5 ຖ້ຽວຕໍ່ອາທິດ) ທີ່ ສະຫນາມບິນສາກົນ ກິມແຮ, ປູຊານ. ພ້ອມທັງໄດ້ສະແດງຄວາມຂອບໃຈຕໍ່ສາຍການບິນ Air Busan ທີ່ເລືອກເປີດຖ້ຽວບິນໂດຍກົງໄປນະຄອນຫລວງວຽງຈັນ ເຊິ່ງຈະເປັນການສົ່ງເສີມດ້ານການທ່ອງທ່ຽວ ແລະ ການໄປມາຫາສູ່ລະຫວ່າງປະຊາຊົນຂອງທັງສອງປະເທດໃຫ້ຫລາຍຂຶ້ນ. ໃນໂອກາດດຽວກັນນີ້, ທ່ານເອກອັກຄະລັດຖະທູດ ຍັງໄດ້ແຈ້ງໃຫ້ຜູ້ເຂົ້າຮ່ວມໃນພິທີຊາບ ແລະ ເຊີນຊວນໃຫ້ປະຊາຊົນເກົາຫລີໄປທ່ຽວລາວ ເນື່ອງໃນໂອກາດທີ່ ສປປ ລາວ ເປີດປີທ່ອງທ່ຽວລາວໃນປີ 2018 ທີ່ຈະມາເຖິງ.
ໃນໄລຍະວັນທີ 16-17 ພະຈິກ 2017, ກະຊວງການຕ່າງປະເທດ ແຫ່ງ ສປປ ລາວ ຮ່ວມກັບ ສະຫະລັດອາເມລິກາ ໄດ້ເປັນເຈົ້າພາບຮ່ວມຈັດກອງປະຊຸມໜ່ວຍງານວິຊາການລະດັບພາກພື້ນແມ່ນ້ຳຂອງຕອນລຸ່ມ-ສະຫະລັດອາເມລິກາ ຄັ້ງທີ 10 ແລະ ເພື່ອນແມ່ນ້ຳຂອງຕອນລຸ່ມ ຂື້ນ ທີ່ ນະຄອນຫຼວງວຽງຈັນ, ເປັນກຽດກ່າວເປີດກອງປະຊຸມຄັ້ງນີ້ ໂດຍທ່ານ ສົງການ ຫຼວງມຸນິນທອນ, ຫົວໜ້າກົມເສດຖະກິດ, ກະຊວງການຕ່າງປະເທດ ແລະ ທ່ານ ນາງ ຣິນາ ບິດເຕີ, ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ ພ້ອມດ້ວຍຄະນະຜູ້ແທນຈາກແຕ່ລະປະເທດສະມາຊິກ. ກອງປະຊຸມດັ່ງກ່າວ ປະກອບມີຜູ້ເຂົ້າຮ່ວມຈາກບັນດາພາກລັດ ແລະ ເອກະຊົນ ຂອງປະເທດສະມາຊິກແມ່ນ້ຳຂອງ ແລະ ສະຫະລັດອາເມລິກາ (ກໍາປູເຈຍ, ສປປ ລາວ, ມຽນມາ, ໄທ, ຫວຽດນາມ, ແລະ ສະຫະລັດອາເມລິກາ) ແລະ ບັນດາເພື່ອນແມ່ນ້ຳຂອງຕອນລຸ່ມ (ສາທາລະນະລັດເກົາຫຼີ, ຍີ່ປຸ່ນ, ອົດສະຕາລີ, ນິວຊີແລນ, ທະນາຄານພັດທະນາອາຊີ, ທະນາຄານໂລກ, ແລະ ກອງເລຂາອາຊຽນ) ລວມມີປະມານ 150 ທ່ານ.