ໂດຍຕອບສະຫນອງຕາມການເຊື້ອເຊີນ ຂອງ ພັກແຊນນູລີ ສ.ເກົາຫລີ, ຄະນະຜູ້ແທນພັກປະຊາຊົນປະຕິວັດ ລາວ ນຳໂດຍ ພະນະທ່ານ ນາງ ສຸນທອນ ໄຊຍະຈັກ, ກຳມະການ ສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ພ້ອມດ້ວຍຄະນະ ໄດ້ໄປຢ້ຽມຢາມ ສາທາລະນະລັດ ເກົາຫລີ ແຕ່ວັນທີ 04-08 ກໍລະກົດ 2016.
ໃນຕອນບ່າຍ ຂອງວັນທີ 5 ກໍລະກົດ 2016, ພະນະທ່ານ ນາງ ສູນທອນ ໄຊຍະຈັກພ້ອມດ້ວຍຄະນະ ໄດ້ພົບ ປະກັບ ພະນະທ່ານ ນາງ ນາ ກວາງວອນ, ຜູ້ຕາງໜ້າສະມາຊິກສະພາແຫ່ງຊາດ ຂອງ ພັກແຊນນູລີ. ໃນການພົບປະ, ພະນະທ່ານຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ນຳເອົາຄວາມຢື້້ຢາມຖາມຂ່າວຂອງ ພະນະທ່ານ ບຸນຍັງ ວໍລະຈິດ, ເລຂາທິການໃຫ່ຍ ຄະນະບໍລິຫານງານສູນກາງພັກ ປປລາວ, ປະທານປະເທດແຫ່ງ ສປປ ລາວ ເຖິງ ພະນະທ່ານ ນາງ ປັກກຶນເຮ, ປະທານາທິບໍດີ ສ.ເກົາຫລີ; ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການ ຮ່ວມມື ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ສ.ເກົາຫລີ ໃນໄລຍະທີ່ຜ່ານມາ ກໍ່ຄື ທິດທາງການ ພົວພັນຮ່ວມມືໃນຕໍ່ໜ້າ; ເຫັນດີສືບຕໍ່ການຮັກສາການໄປມາຫາສູ່ກັນ ລະຫວ່າງການນຳຂັ້ນຕ່າງໆຂອງສອງພັກ, ສອງ ລັດ ນຳກັນຢ່າງເປັນປົກປະຕິ.
ພະນະທ່ານ ນາງ ນາ ກວາງວອນ, ໄດ້ສະແດງຄວາມຊົມເຊີຍ ຕໍ່ ກອງປະຊູມໃຫ່ຍຜູ້ແທນທົ່ວປະເທດ ຄັ້ງທີ X ຂອງພັກ ປປ ລາວ ແລະ ກອງປະຊຸມສະພາແຫ່ງຊາດ ສະໄໝທີ່ VIII ທີ່ໄດ້ໄຂຂຶ້ນໃນຕົ້ນປີ 2016 ຜ່ານມາ ດ້ວຍຜົນສຳເລັດອັນຈົບງາມ ແລະ ເຊື້ອໝັ້ນວ່າ ພາຍໃຕ້ການຊີ້ນຳນຳພາຂອງ ພັກ ປປ ລາວ ອັນມີ ພະນະທ່ານ ບຸນຍັງ ວໍລະຈິດ, ເລຂາທິການໃຫ່ຍ, ປະທານປະເທດ ນັ້ນ, ສປປ ລາວ ຈະສາມາດຍາດໄດ້ຜົນສໍາເລັດອັນໃຫຍ່ຫລວງ ໃນການຈັດຕັ້ັ້ງຜັນ ຂະຫຍາຍມະຕິກອງປະຊູມໃຫຍ່ ຄັ້ງທີ X ຂອງພັກ ແລະ ແຜນການພັດທະນາເສດຖະກິດ-ສັງຄົມ 5 ປີ ຄັ້ງທີ່ VIII ແລະ ນໍາພາປະເທດຊາດຫລຸດພົ້ນອອກຈາກສະຖານະພາບດ້ອຍພັດທະນາ ຕາມເປົ້້້າໝາຍທີ່ ກອງປະຊຸມໃຫຍ່ ຄັ້ງທີ X ຂອງ ພັກ ປປ ລາວ ໄດ້ວາງອອກ.
ພະນະທ່ານ ນາງ ນາ ກວາງວອນ ໄດ້ສະແດງຄວາມຂອບໃຈ ຕໍ່ ພັກ, ລັດ ລາວ ທີ່ໄດ້ສົ່ງຄະນະຜູ້ແທນໄປຢ້ຽມ ຢາມ ແລະ ແລກປ່ຽນສະພາບການຕ່າງໆ ລະຫວ່າງ ສອງພັກ, ສອງລັດ ໃນຄັ້ງນີ້.
ພະນະທ່ານ ນາງ ສູນທອນ ໄຊຍະຈັກ ໄດ້ສະແດງຄວາມຂອບໃຈຕໍ່ ພັກແຊນນູລີ ທີ່ໄດ້ສົ່ງໂທລະເລກອວຍ ພອນກອງປະຊູມໃຫຍ່ ຄັ້ງທີ X ຂອງພັກ ແລະ ສານຊົມເຊີຍຂອງ ພະນະທ່ານ ປັກກຶນເຮ, ປະທານນາທີບໍດີ ສ.ເກົາຫລີ ແລະ ພະນະທ່ານ ກຶມມູຊຸງ, ອາດີດປະທານພັກແຊນນູລີ ມາຍັງ ພະນະທ່ານ ບຸນຍັງ ວໍລະຈິດ, ເລຂາທິການໃຫ່ຍ, ປະ ທານປະເທດແຫ່ງ ສປປ ລາວ ເນື່່ອງໃນໂອກາດທີ່່ໄດ້ຮັບເລືອກຕັ້ງ ເປັນເລຂາທິການໃຫ່ຍ, ປະທານປະເທດແຫ່ງ ສ ປປ ລາວ; ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງສອງພັກ, ສອງລັດ ແລະ ປະຊາຊົນສອງ ຊາດລາວ-ສ.ເກົາຫລີ ໃນໄລຍະທີ່ຜ່ານມາ ກໍ່ຄື ໃນປະຈຸບັນ ເຊິ່ງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ສ.ເກົາຫລີ ໃຫ້ນັບມື້ນັບຂະຫຍາຍຕົວຂຶ້ນເລື້ອຍໆ ເພື່ອຜົນປະໂຫຍດຂອງປະຊາຊົນສອງຊາດ ກໍ່ຄື ເພື່ອພາລະກິດສັນຕິພາບ, ເອກະລາດ, ມິດຕະພາບ ແລະ ການຮ່ວມມືໃນພາກພື້ນ ແລະ ໃນໂລກ.
ນອກຈາກພົບປະກັບ ພະນະທ່ານ ນາງ ນາ ກວາງວອນ ແລ້ວ, ຄະນະຍັງໄດ້ພົບປະເຮັດວຽກກັບ ລັດຖະມົນຕີຊ່ວຍ ຮັບຜິດຊອບວຽກງານເສດຖະກິດ ຂອງ ກະຊວງການຕ່າງປະເທດ ສ.ເກົາຫລີ, ພົບປະກັບຜູ້ຮັບຜິດຊອບວຽກງານແຫລມເກົາຫລີ ຂອງກະຊວງການຕ່າງປະເທດ ສ.ເກົາຫລີ; ພົບປະກັບເລຂາທິການໃຫຍ່ສູນຮ່ວມມື ສ.ເກົາຫລີ-ອາຊຽນ, ຢ້ຽມຢາມສູນຊຶມມາອຸນດົງ (ພັດທະນາຊົນນະບົດ), ອົງການໂກຍກາ, ໂຮງງານຜະລິດລົດເກຍມໍເຕີ ແລະ ຢ້ຽມຢາມພື້ນຖານວັດທະນະທຳ, ປະຫວັດສາດ ຈຳນວນໜຶ່ງ ຂອງ ສ.ເກົາຫລີ ໃນນະຄອນຫລວງເຊອູນ.