ໃນວັນທີ 29 ກໍລະກົດ 2016, ທີ່ ຫ້ອງວ່າການສໍານັກງານນາຍົກລັດຖະມົນຕີ, ທ່ານ ອາລຸນແກ້ວ ກິດຕິຄຸນ, ລັດຖະມົນຕີປະຈໍາສໍານັກງານນາຍົກລັດຖະມົນຕີ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ໃຫ້ສໍາພາດຕໍ່ໂທລະພາບແຫ່ງຊາດ ກ່ຽວກັບ ຜົນສໍາເລັດຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມລະດັບລັດຖະມົນຕີອື່ນໆທີ່ກ່ຽວຂ້ອງ ຊຶ່ງໄດ້ຈັດຂຶ້ນໃນວັນທີ 21-26 ກໍລະກົດ 2016 ທີ່ ນະຄອນຫຼວງວຽງຈັນ.
ທ່ານໄດ້ກ່າວວ່າ: ກອງປະຊຸມດັ່ງກ່າວ ແມ່ນໄດ້ດໍາເນີນໄປດ້ວຍບັນຍາກາດທີ່ດີ, ສ້າງສັນ, ມິດຕະພາບ ແລະ ບັນລຸຜົນສໍາເລັດຢ່າງສະຫງ່າງາມ ທັງດ້ານເນື້ອໃນ ແລະ ພິທີການ. ບັນດາລັດຖະມົນຕີ ຕ່າງປະເທດອາຊຽນ, ຄູ່ເຈລະຈາ ແລະ ປະເທດອື່ນໆທິ່ເຂົ້າຮ່ວມກອງປະຊຸມ ແມ່ນໄດ້ຍ້ອງຍໍຊົມເຊີຍ ສປປ ລາວ ທີ່ເປັນເຈົ້າພາບທີ່ດີ ແລະ ສໍາຄັນແມ່ນໄດ້ນໍາພາກອງປະຊຸມໃນຖານະເປັນປະທານ ຢ່າງປະສົບຜົນ ສໍາເລັດ ແລະ ເປັນສິ່ງຢັ້ງຢືນເຖິງຄວາມເປັນເອກະພາບ, ຄວາມສາມັກຄີ ແລະ ຄວາມເປັນແກນກາງຂອງອາຊຽນ ຢ່າງໜຽວແໜ້ນ.
ໃນໂອກາດກອງປະຊຸມຄັ້ງນີ້, ບັນດາລັດຖະມົນຕີການຕ່າງປະເທດອາຊຽນ ໄດ້ຮັບຮອງເອົາຖະແຫຼງການຮ່ວມຂອງລັດຖະມົນຕີຕ່າງປະເທດອາຊຽນ ຄັ້ງທີ 49 ຢ່າງເປັນເອກະສັນ ຊື່ງເນື້ອໃນຕົ້ນຕໍແມ່ນ ເວົ້າເຖິງການສ້າງປະຊາຄົມອາຊຽນ ພາຍຫຼັງທີ່ຜູ້ນໍາຮັບຮອງເອົາວິໄສທັດປະຊາຄົມອາຊຽນ 2025 ແລະ ບັນດາແຜນແມ່ບົດ ເພື່ອຮັດແໜ້ນປະຊາຄົມອາຊຽນ ເພື່ອບັນລຸເປົ້າໝາຍການສ້າງປະຊາຄົມອາຊຽນ ທີມີ ຄວາມເປັນປຶກແຜ່ນທາງດ້ານການເມືອງ, ມີການເຊື່ອມໂຍງທາງດ້ານເສດຖະກິດ ແລະ ມີຄວາມຮັບຜິດຊອບທາງສັງຄົມ. ນອກນັ້ນ, ຖະແຫຼງການຮ່ວມຍັງເວົ້າເຖິງການປະເມີນການຮ່ວມມື ແລະ ການວາງທິດທາງ ໃນຕໍ່ໜ້າ ສໍາລັບການຮ່ວມມືກັບ 10 ຄູ່ເຈລະຈາ ແລະ ແລກປ່ຽນຄວາມຄິດເຫັນ ກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມເປັນຫ່ວງ ແລະ ຄວາມສົນໃຈຮ່ວມກັນ.
ພ້ອມດຽວກັນນີ້, ສປປ ລາວ ໃນນາມປະທານ ກໍໄດ້ອອກຖະແຫຼງການປະທານ ກອງປະຊຸມລັດຖະມົນຕີຕ່າງປະເທດອາຊຽນ ກັບແຕ່ລະຄູ່ເຈລະຈາ (10+1), ກອງປະຊຸມລັດຖະມົນຕີຕ່າງປະເທດອາຊຽນ ບວກ ສາມ ຄັ້ງທີ 17, ກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ ຄັ້ງທີ 6 ແລະ ກອງປະຊຸມເວທີພາກພື້ນອາຊຽນ ຄັ້ງທີ 23 ຊຶ່ງ ສປປ ລາວ ໄດ້ມີການປຶກສາຫາລື ກັບບັນດາ ປະເທດທີ່ກ່ຽວຂ້ອງຢ່າງຄັກແນ່ ແລະ ເອົາໃຈໃສ່ ຊຶ່ງເນື້ອໃນເວົ້າລວມ ກໍເປັນທີຮັບໄດ້ຂອງບັນດາຝ່າຍທີ່ກ່ຽວຂ້ອງ.
ສປປ ລາວ ໃນນາມປະທານອາຊຽນ ໃນປີ 2016 ນີ້ ມີຄວາມເອກອ້າງທະນົງໃຈເປັນຢ່າງຍິ່ງ ທີ່ໄດ້ສໍາເລັດການເປັນປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມລະດັບລັດຖະມົນຕີອື່ນໆ ທີ່ກ່ຽວຂ້ອງໃນຄັ້ງນີ້ ຢ່າງສະຫງ່າງາມ.