ໃນວັນທີ 31 ພຶດສະພາ 2017, ກະຊວງການຕ່າງປະເທດ ຮ່ວມກັບ ກະຊວງແຮງງານ ແລະ ສະຫວັດດີການສັງຄົມ ຕາງໜ້າໂດຍຫ້ອງການກອງທຶນປະກັນສັງຄົມແຫ່ງຊາດ ຈັດກອງປະຊຸມເຜີຍແຜ່ຄຳແນະນຳ ວ່າດ້ວຍ ການຈັດຕັ້ງປະຕິບັດກົດໝາຍປະກັນສັງຄົມ ໂດຍການເຂົ້າຮ່ວມຂອງບັນດາຫົວໜ້າກົມ-ຮອງກົມ, ຫົວໜ້າພະແນກ-ຮອງພະແນກ ພ້ອມດ້ວຍພະນັກງານວິຊາການຫຼັກແຫຼ່ງຂອງກະຊວງການຕ່າງປະເທດ ເຂົ້າຮ່ວມຫຼາຍກວ່າ 200 ທ່ານ, ຊຶ່ງມີທີມງານຈາກຫ້ອງການກອງທຶນປະກັນສັງຄົມແຫ່ງຊາດ ພ້ອມດ້ວຍຄະນະເຂົ້າຮ່ວມເຜີຍແຜ່.
ໃນພິທີ ທ່ານ ນາງ ວັນໄຊ ສຸວັນນະເມທີ, ຮອງຫົວໜ້າກົມປະກັນສັງຄົມ ກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ກຽດຂຶ້ນກ່າວ ໂດຍລວມກ່ຽວກັບ ກົດໝາຍ ວ່າດ້ວຍ ການປະກັນສັງຄົມ, ຈາກນັ້ນ ທ່ານ ກໍ່ໄດ້ມອບເວທີໃຫ້ ທ່ານ ນາງ ກິ່ງເມືອງ ວົງສາລະວັນ, ຮອງຫົວໜ້າພະແນກປະຊາສຳພັນຫ້ອງການກອງທຶນປະກັນສັງຄົມແຫ່ງຊາດ ຂຶ້ນເຜີຍແຜ່ກ່ຽວກັບ ລະບົບປະກັນສັງຄົມໃນ ສປປ ລາວ ແມ່ນຈັດຕັ້ງປະຕິບັດພາຍໃຕ້ກົດໝາຍວ່າດ້ວຍ ການປະກັນສັງຄົມ ສະບັບເລກທີ 34/ສພຊ. ໂດຍແມ່ນຫ້ອງການກອງທຶນປະກັນສັງຄົມແຫ່ງຊາດເປັນຜູ້ຈັດຕັ້ງປະຕິບັດວຽກງານດັ່ງກ່າວ ຊຶ່ງໄດ້ເລັ່ງໃສ່ 2 ກຸ່ມເປົ້າໝາຍໃນການຄຸ້ມຄອງຄື: ແບບບັງຄັບ ແລະ ແບບສະມັກໃຈ. ແບບບັງຄັບ ຈະກວມເອົາອົງການຈັດຕັ້ງພັກ-ລັດ, ພະນັກງານລັດຖະກອນ, ທະຫານ, ຕຳຫຼວດ, ຫົວນ່ວຍແຮງງານ ແລະ ຜູ້ອອກແຮງງານ ລວມທັງຄົນລາວທີ່ເຮັດວຽກຢູ່ສະຖານທູດ, ກົງສູນ, ອົງການຕາງທ ແລະ ຄົນຕ່າງປະເທດທີ່ເຮັດວຽກໃນຫົວໜ່ວນແຮງງານຕ່າງໆ. ແບບສະໝັກໃຈ ແມ່ນເລັ່ງໃສ່ຜູ້ປະກອບອາຊີບສ່ວນບຸກຄົນ ແລະ ຜູ້ສະໝັກໃຈທົ່ວໄປ. ຊຶ່ງຈະໄດ້ຮັບການອຸດໜູນທຸກປະເພດ ເປັນຕົ້ນ ອຸດໜູນປິ່ນປົວສຸຂະພາບ, ອອກລູກ ຫຼື ຫຼຸລູກ, ປ່ວຍການ, ບຳນານ, ເສຍອົງຄະ, ຜູ້ດູແລ, ເສຍຊີວິດ ແລະ ສະມາຊິກຄອບຄົວຂອງຜູ້ປະກັນຕົນຈະໄດ້ຮັບຢ່າງຫຼວງຫຼາຍ.
ທ່ານ ຍັງໃຫ້ຮູ້ຕື່ມອີກວ່າ ພະນັກງານພາກລັດ ເມື່ອໄດ້ຮັບຂໍ້ຕົກລົງເປັນລັດຖະກອນຮັບເງິນເດືອນ 95 % ຕາມລະບຽບແລ້ ກໍ່ຈະຖືກຕັດເງິນຢ່າງອັດຕະໂນມັດ ເພື່ອສົມທົບເຂົ້າກອງທຶນປະກັນສັງຄົມແຫ່ງຊາດ 16,5 % ຂອງເງິນເດືອນທັງໝົດ ໃນນັ້ນລັດຖະບານໄດ້ຮັບຜິດຊອບ 8,5 % ຂອງເງິນເດືອນລັດຖະກອນ ແລະ ພະນັກງານໜຶ່ງຄົນໃດຈະຕ້ອງສົມທົບ 8 % ຂອງເງິນເດືອນທັງໝົດ. ສ່ວນພາກວິສາຫະກິດ ຕ້ອງສົມທົບ 11,5 % ຂອງເງິນເດືອນປະກັນຕົນ ໃນນັ້ນຜູ້ໃຊ້ແຮງງານຮັບຜິດຊອບຈ່າຍ 6 % ຂອງເງິນເດືອນປະກັນຕົນ ແລະ ຜູ້ອອກແຮງງານຈ່າຍ 5,5 % ຂອງເງິນເດືອນຜູ້ປະກັນຕົນ ຊຶ່ງມີເພດານສູງສຸດ 4,500,000 ກີບ; ສຳລັບຜູ້ປະກອບອາຊີບສ່ວນບຸກຄົນ ແລະ ຜູ້ປະກັນຕົນແບບສະໝັກໃຈຕ້ອງຈ່າຍ 9 % ຂອງເງິນເດືອນປະກັນຕົນທີ່ສາມາດເລືອກຈ່າຍໄດ້.
ໃນກອງປະຊຸມ ໄດ້ມີການສົນທະນາຖາມ-ຕອບ ກ່ຽວກັບ ບັນດາສິດຜົນປະໂຫຍດ ທີ່ຈະໄດ້ຮັບຈາກການເຂົ້າເປັນສະມາຊິກການປະກັນສັງຄົມ ຊຶ່ງໃນສ່ວນໃຫຍ່ແມ່ນເນັ້ນໃຫ້ປະກັນສັງຄົມ ເພີ່ມຄວາມເອົາໃຈໃສ່ຕໍ່ຂອບບໍລິການປິ່ນປົວສຸຂະພາບຂອງສະມາຊິກເວລາໄປໃຊ້ບໍລິການຢູ່ໂຮງໝໍ, ການເຈັບເປັນສຸກເສີນ ເຫັນວ່າໃນໄລຍະຜ່ານມາ ຍັງບໍ່ຈັດຕັ້ງປະຕິບັດໄດ້ດີເທົ່າທີ່ຄວນ. ຊຶ່ງ ທ່ານ ນາງ ກິ່ງເມືອງ ວົງສາລະວັນ ແລະ ທີມງານເຜີຍແຜ່ ກໍ່ໄດ້ຊີ້ແຈງບັນຫາຕ່າງໆ, ຂໍ້ສະດວກ, ຂໍ້ຫຍຸ້ງຍາກ ແລະ ແຜນການໃນຕໍ່ໜ້າຢ່າງກົງໄປກົງມາ ພ້ອມທັງຮັບເອົາຄຳສະເໜີຕ່າງໆ ຈາກພະນັກງານຫຼັກແຫຼ່ງ ເພື່ອນຳສະເໜີຂັ້ນເທິງ ເພື່ອປັບປຸ່ງແກ້ໄຂໃນຕໍ່ໜ້າໃຫ້ແທດເໝາະກັບສະພາບການຕົວຈິງ ແລະ ເປັນທີ່ເພິ່ງພໍໃຈຂອງສະມາຊິກປະກັນສັງຄົມ ເວົ້າສະເພາະຕໍ່ປະຊາຊົນໃນຂອບເຂດທົ່ວປະເທດ.