ໃນວັນທີ 02 ມິຖຸນາ 2017, ທີ່ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ບໍ່ແສງຄຳ ວົງດາລາ, ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ CHENG Manith, ເອກອັກຄະລັດຖະທູດ ແຫ່ງ ຣາຊະອານາຈັກ ກຳປູເຈຍ ປະຈຳ ລາວ, ໃນໂອກາດທີ່ມາດຳລົງຕຳແໜ່ງ ຢູ່ ສປປ ລາວ.
ໃນໂອກາດດັ່ງກ່າວ, ທ່ານ ບໍ່ແສງຄຳ ວົງດາລາ ໄດ້ສະແດງຄວາມຊົມເຊີຍ, ຍິນດີຕ້ອນຮັບ ແລະ ຕີລາຄາສູງ ຕໍ່ທ່ານທູດ, ພ້ອມເຊື່ອໝັ້ນວ່າ ການມາດໍາລົງຕຳແໜ່ງຂອງທ່ານທູດໃນຄັ້ງນີ້ ຈະເປັນການປະກອບສ່ວນສຳຄັນ ເຂົ້າໃນການເພີ່ມທະວີການຮ່ວມມື ລະຫວ່າງ ສປປ ລາວ ແລະ ກຳປູເຈຍ ໃຫ້ມີບາດກ້າວຂະຫຍາຍຕົວຍິ່ງໆຂຶ້ນ, ພ້ອມອວຍພອນໃຫ້ທ່ານທູດ ຈົ່ງປະສົບຜົນສຳເລັດຕະຫລອດໄລຍະການມາປະຕິບັດໜ້າທີ່ການທູດ ຢູ່ ລາວ ໃນຄັ້ງນີ້.
ພ້ອມດຽວກັນ, ທ່ານທູດ ກໍໄດ້ສະແດງຄວາມຂອບອົກຂອບໃຈ ຕໍ່ ທ່ານ ບໍ່ແສງຄຳ ວົງດາລາ ທີ່ໄດ້ສະຫລະເວລາ ໃຫ້ການຕ້ອນຮັບອັນອົບອຸ່ນ ໃນຄັ້ງນີ້. ພ້ອມທັງສະແດງຄວາມຢືນຢັນວ່າ ຈະສຸມທຸກຄວາມພະຍາຍາມ ທັງເຫື່ອແຮງ ແລະ ສະຕິປັນຍາ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນດ້ານຮ່ວມມື, ດ້ານວັດທະນະທຳ, ສິລະປະ ແລະ ດ້ານເສດຖະກິດ-ການຄ້າ.
ພາບ ແລະ ເນື້ອໃນ:ຂປລ