ລັດຖະບານລາວ-ລັດ ເຊຍ ເສີມຂະຫຍາຍ ແລະ ຮັດແໜ້ນສາຍພົວພັນຮ່ວມມື ແລະ ທັງເປັນການ ສືບຕໍ່ປະຕິບັດ ສັນຍາຮ່ວມມືສອງຝ່າຍ ລະຫວ່າງ ສປປ ລາວ ແລະ ສະຫະພັນລັດເຊຍ ໃຫ້ມີຄວາມແໜ້ນແຟ້ນຍິ່ງຂຶ້ນ, ທ່ານ ສົມດີ ດວງດີ, ລັດຖະມົນຕີວ່າການ ກະຊວງ ແຜນການ ແລະ ການລົງທຶນ, ປະທານຄະນະກຳມາທິການ ຮ່ວມມືດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ລາວ-ລັດເຊຍ ພ້ອມຄະນະເດີນທາງ ເຂົ້າຮ່ວມກອງປະຊຸມຄະນະກຳມາທິການ ຮ່ວມມືດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ຄັ້ງທີ 11 ລະຫວ່າງ ລັດຖະບານ ສປປ ລາວ ແລະ ລັດຖະບານ ສະຫະພັນ ລັດເຊຍ ທີ່ນະຄອນຫລວງມົດສະກູ ໃນລະຫວ່າງ ວັນທີ 27-28 ເມສາ 2015, ເຊິ່ງທາງຝ່າຍລັດເຊຍຕາງໜ້າໂດຍ ທ່ານ ນິໂກລາຍ ນິກີຟາຣົບ ( Mr. Nikolay NIKIFOROV), ລັດຖະມົນຕີວ່າການກະຊວງ ໂທລະຄົມມະນາຄົມ ແລະ ການສື່ສານ, ປະທານຄະນະກຳມາທີການ ຮ່ວມມືດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ລັດເຊຍ-ລາວ.
ກອງປະຊຸມຄັ້ງນີ້, ແມ່ນມີຄວາມໝາຍ ຄວາມສຳຄັນຫລາຍ ເພາະເປັນໂອກາດໃຫ້ສອງຝ່າຍ ໄດ້ທົບທວນຄືນ ແຜນການຮ່ວມມື ທີ່ທັງສອງຝ່າຍ ໄດ້ຕົກລົງກັນຜ່ານມາ. ພ້ອມດຽວ ກັນນີ້ ກໍເພື່ອປຶກສາຫາລືທິດທາງ ແຜນການຮ່ວມມື ໃນຕໍ່ໜ້າຂອງສອງປະເທດ. ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອທີ່ດີງາມ ລະຫວ່າງ ສປປລາວ ແລະ ສະຫະພັນລັດເຊຍ ໃນໄລຍະທີ່ຜ່ານມາ, ໂດຍສະເພາະ ໃນຂອບການຮ່ວມມື ກັບຂະແໜງການຕ່າງໆ ທີ່ເປັນສ່ວນປະກອບທີ່ສຳຄັນ ໃນການເສີມສ້າງສາຍພົວພັນ, ມິດຕະພາບ ແລະ ການຮ່ວມມື ໃນໄລຍະໃໝ່ ໃຫ້ມີຄວາມເຂັ້ມແຂງ ແລະ ຈະເລີນງອກງາມຍີ່ງໆຂື້ນ.
ນອກຈາກນັ້ນ, ກໍຍັງມີກອງປະຊຸມພາກທຸລະກິດ ລາວ-ລັດເຊຍ ໄດ້ມີການພົບປະໂອ້ລົມກັນ ເພື່ອຖອດຖອນບົດຮຽນໃນການເຮັດທຸລະກິດຂອງຕົນ ຊຶ່ງເປັນຄັ້ງທຳອິດ ເພື່ອເປີດໂອກາດໃຫ້ນັກທຸລະກິດທັງສອງປະເທດ ໄດ້ມີໂອກາດປຶກສາຫາລື ແລະ ຮ່ວມກັນເພື່ອຊອກຊ່ອງທາງ ສົ່ງເສີມການ ຮ່ວມມືດ້ານທຸລະກິດຕ່າງໆ ທີ່ມີທ່າແຮງຮ່ວມກັນໃນຕໍ່ໜ້າ.
ກອງປະຊຸມໄດ້ດຳເນີນໄປ ພາຍໃຕ້ບັນຍາກາດອັນອົບອຸ່ນ ແລະ ສະໜິດສະແໜ້ນເປັນຢ່າງດີ. ທັງສອງຝ່າຍໄດ້ສຸມເຫື່ອແຮງ ແລະ ສະຕິປັນຍາ ເຂົ້າໃນການແລກປ່ຽນຄວາມຄິດຄວາມເຫັນ ໂດຍແນໃສ່ເຮັດໃຫ້ການພົວພັນ ແລະ ການຮ່ວມມື ທີ່ມີມູນເຊື້ອອັນດີງານ ມາຕັ້ງແຕ່ດົນນານນັ້ນໃຫ້ມີ ຄວາມແໜ້ນແຟ້ນ ແລະ ແຕກດອກອອກຜົນຢ່າງບໍ່ຢຸດຢັ້ງ. ທັງສອງຝ່າຍໄດ້ເຫັນດີ ເປັນເອກະພາບກັນສູງ ສຸມໃສ່ຈັດຕັ້ງຜັນຂະຫຍາຍ ເນື້ອໃນຈິດໃຈສາຍພົວພັນການ ຮ່ວມມືຂອງສອງປະເທດ ສປປລາວ ແລະ ລັດເຊຍ ໃຫ້ມີຜົນສຳເລັດອັນໃຫຍ່ຫລວງ. ທັງນີ້ກໍເພື່ອຜົນ ປະໂຫຍດລວມ ຂອງປະຊາຊົນ ສອງປະເທດ ແລະ ເຮັດໃຫ້ການຮ່ວມມືຂອງ ສອງປະເທດກ້າວໄປສູ່ໄລຍະໃໝ່, ການຮ່ວມມືທີ່ຕ່າງຝ່າຍຕ່າງໄດ້ຮັບ ຜົນປະໂຫຍດ ແລະ ຊ່ວຍເຫລືອເຊິ່ງກັນ ແລະ ກັນ ແລະ ເພີ່ມທະວີຄວາມເປັນພັນທະມິດຢ່າງຍາວນານ. ພາຍຫລັງສໍາເລັດກອງປະຊຸມ ທັງສອງຝ່າຍ ກໍໄດ້ຮ່ວມກັນ ອອກຖະແຫລງການ ຕໍ່ສື່ມວນຊົນ ເພື່ອເປັນການປະກາດ ໃຫ້ທຸກພາກສ່ວນຮັບຮູ້ ຢ່າງກ້ວາງຂວາງ.