ຕອນເຊົ້າຂອງ ວັນທີ 04 ມັງກອນ 2019, ທີ່ກະຊວງການຕ່າງປະເທດ ໄດ້ຈັດປາຖະກະຖາຫວນຄືນມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20/01/1949 – 20/01/2019), ໃຫ້ກຽດຂຶ້ນເຜີຍແຜ່ມູນເຊື້ອວັນສ້າງຕັ້ງກອງທັບປະຊາຊົນລາວໂດຍ ທ່ານ ພົ.ວ ຄຳຫອມ ແສງບົວລົມ, ຮອງເລຂາຄະນະພັກ, ຮອງປະທານສະຫະພັນນັກຮົບເກົ່າແຫ່ງຊາດ, ວິລະຊົນແຫ່ງຊາດ, ໂດຍເປັນການເຂົ້າຮ່ວມຂອງ ທ່ານ ສະເຫລີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງການຕ່າງປະເທດ ແລະ ມີຄະນະພັກ-ຄະນະນຳ, ສະມາຊິກພັກ, ພະນັກງານລັດຖະກອນອ້ອມຂ້າງກະຊວງການຕ່າງປະເທດ ເຂົ້າຮ່ວມຫຼາຍກວ່າ 350 ທ່ານ.
ໃນໂອກາດນີ້ ທ່ານ ພົ.ວ ຄຳຫອມ ແສງບົວລົມ, ໄດ້ຍົກໃຫ້ຮູ້ເຖິງຄວາມໝາຍສຳຄັນຂອງການກຳເນີດ ແລະ ເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວວ່າ: ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງສະພາບການກໍຄື: ຂະບວນການປະຕິວັດຕໍ່ສູ້ກູ້ຊາດຂອງປະຊາຊົນລາວບັນດາເຜົ່າຜູ້ທີ່ຮັກຊາດ ກອງທັບປະຊາຊົນລາວ ໄດ້ຮັບການສ້າງຕັ້ງຂຶ້ນໃນວັນທີ 20 ມັງກອນ 1949, ຜ່ານຍ່ານທາງແຫ່ງການສ້າງຕັ້ງ, ສູ້ຮົບມີໄຊ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງໃນດ້ານການຕໍ່ສູ້ ພາຍໃຕ້ການຊີ້ນຳ-ນຳພາ ອັນສະຫຼາດສ່ອງໃສຂອງພັກປະຊາຊົນປະຕິວັດລາວ ແລະ ເຮັດໃຫ້ກອງທັບປະຊາຊົນລາວ ໄດ້ກາຍເປັນກຳລັງຫຼັກແຫຼ່ງໃນສົງຄາມຕໍ່ສູ້ເພື່ອປົດປ່ອຍຊາດ ທັງເຕີບໃຫຍ່ເຂັ້ມແຂງທາງດ້ານປະລິມານ ແລະ ຄຸນນະພາບ, ຍິ່ງຕີຍິ່ງໄດ້ຮັບໄຊຊະນະ ແລະ ຍິ່ງຕີຍິ່ງມີຄວາມເຂັ້ມແຂງ, ມີບົດຮຽນໃນການສູ້ຮົບ, ມີຄວາມເດັດດຽວ ໜຽວແໜ້ນແລະພິລະອາດຫານອົງອາດກ້າແກ່ນ, ກອງທັບປະຊາຊົນລາວ ໄດ້ຜ່ານອຸປະສັກນາໆປະການ ບໍ່ຈັກວ່າເທົ່າໃດ ແລະ ເຕັມໄປດ້ວຍການເສຍສະຫຼະອັນໃຫຍ່ຫຼວງ ໃນພາລະກິດຕໍ່ສູ້ເພື່ອປົດປ່ອຍປະເທດຊາດ, ເຮັດສຳເລັດພາລະກຳປະຫວັດສາດ ທີ່ພັກ-ລັດ ແລະ ປະຊາຊົນມອບໝາຍໃຫ້ຢ່າງມີໄຊ, ສາມາດຕີເອົາຊະນະພວກຈັກກະພັກລ່າເມືອງຂຶ້ນແບບເກົ່າ ແລະ ພວກຈັກກະພັດລ່າເມືອງຂຶ້ນແບບໃໝ່ ພ້ອມດ້ວຍລູກແຫຼ້ງຕີນມືຂອງພວກເຂົາ ຈົນສາມາດນຳເອົາປະເທດຊາດປົດປ່ອຍອອກຈາກແອກຄອບຄອງຂອງພວກຈັກກະພັດໄດ້ຢ່າງສົມບູນ ແລະ ສະຖາປະນາ ສປປ ລາວ ຂຶ້ນໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ ເຮັດໃຫ້ ສປປ ລາວເຮົາ ມີອິດສະຫຼະພາບ, ອໍານາດອະທິປະໄຕຢ່າງຄົບຖ້ວນ ແລະ ເປັນທີ່ຍອມຮັບຂອງບັນດາປະເທດເພື່ອນມິດສາກົນໃນໂລກ. ມາຮອດປະຈຸບັນ ກອງທັບປະຊາຊົນລາວ ຍັງສືບຕໍ່ເປັນກຳລັງຫຼັກແຫຼ່ງໃນການປົກປັກຮັກສາໝາກຜົນຂອງການປະຕິວັດ ແລະ ຮັກສາລະບອບປະຊາທິປະໄຕໄວ້ໃຫ້ໝັ້ນຄົງຕະຫຼອດໄປ.
ເພື່ອເສີມຂະຫຍາຍມູນເຊື້ອ ແລະ ທາດແທ້ຂອງວັນສຳຄັນດັ່ງກ່າວ, ທ່ານປະທານ ຍັງໄດ້ເນັ້ນໜັກໃຫ້ສະມາຊິກພັກ, ພະນັກງານ-ລັດຖະກອນ ທົ່ວກະຊວງການຕ່າງປະເທດ ສືບຕໍ່ສຶກສາຮຽນຮູ້ປະຫວັດມູນເຊື້ອວິລະກຳ ໃນພາລະກິດຕໍ່ສູ້ປົດປ່ອຍປະເທດຊາດຂອງກອງທັບປະຊາຊົນລາວ ໃນແຕ່ລະຍຸກແຕ່ລະສະໄໝ ເພື່ອນຳໄປໝູນໃຊ້ເຂົ້າໃນຂົງເຂດວຽກງານຂອງຕົນຮັບຜິດຊອບ.