ສປປ ລາວ ແລະ ມຽນມາ ໄດ້ເພີ່ມທະວີການຮ່ວມມື ດ້ານການຄວບຄຸມຢາເສບຕິດ ໂດຍທັງສອງຝ່າຍ ໄດ້ຖອດຖອນບົດຮຽນຮ່ວມກັນ ເພື່ອນຳໄປຈັດຕັ້ງ ປະຕິບັດ ເວົ້າສະເພາະ ກໍຄື ແຜນການສະກັດກັ້ນ ແລະ ແກ້ໄຂບັນຫາຢາເສບຕິດ ຂອງສອງປະເທດຢ່າງຈິງຈັງ ໂດຍເນັ້ນໃສ່ຮ່ວມກັນຊອກຫາວິທີ ແລະ ມາດຕະການອັນເໝາະສົມ ເຮັດໃຫ້ການຮ່ວມມືສະກັດກັ້ນ ແລະ ແກ້ໄຂບັນຫາຢາເສບຕິດ ລະຫວ່າງ ສອງປະເທດໃຫ້ໄດ້ຮັບຜົນດີຍິ່ງຂຶ້ນ.
ກອງປະຊຸມສອງຝ່າຍ ລາວ-ມຽນມາ ວ່າດ້ວຍການຮ່ວມມື ເພື່ອຄວບຄຸມຢາເສບຕິດຄັ້ງທີ V ໄດ້ຈັດຂຶ້ນແຕ່ວັນທີ 11-12 ມີນາ 2015 ທີ່ນະຄອນຫລວງວຽງຈັນ ໂດຍມີ ທ່ານ ກຸ ຈັນສີນາ, ປະທານຄະນະ ກຳມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ ແລະ ທ່ານ ພົນຈັດຕະວາ ຈໍ ຈໍ ທູນ (Kyaw Kyaw Tun), ລັດຖະມົນຕີຊ່ວຍວ່າການກະຊວງພາຍໃນຂອງ ສສ.ມຽນມາ ພ້ອມດ້ວຍຄະນະຜູ້ແທນທັງສອງຝ່າຍ ເຂົ້າຮ່ວມ. ໃນໂອກາດນີ້ ທ່ານ ກຸ ຈັນສີນາ ໄດ້ຍົກໃຫ້ເຫັນຄວາມສຳຄັນຂອງກອງປະຊຸມຄັ້ງນີ້ ທີ່ໄດ້ທົບທວນຄືນຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈາກການຈັດຕັ້ງ ປະຕິບັດບົດບັນທຶກກອງປະຊຸມຄັ້ງທີ IV ທີ່ຜ່ານມາ ພ້ອມທັງຮ່ວມກັນວາງທິດທາງແຜນການ ເພື່ອເປັນບ່ອນອີງໃຫ້ແກ່ການພົວພັນຮ່ວມມື ແກ້ໄຂບັນຫາຢາເສບຕິດໃນຊຸມປີຕໍ່ໜ້າ ລະຫວ່າງ ລາວ-ມຽນມາ ໃຫ້ໄດ້ຮັບຜົນສຳເລັດດີຍິ່ງຂຶ້ນ. ໄລຍະຜ່ານມາ ເພື່ອປະກອບສ່ວນເຮັດໃຫ້ຄາດໝາຍສູ້ຊົນ “ອາຊຽນປອດຢາເສບຕິດພາຍໃນປີ 2015” ໃຫ້ບັນລຸຜົນເປັນຈິງນັ້ນ, ລັດຖະບານແຫ່ງ ສປປ ລາວ ໄດ້ເອົາໃຈໃສ່ດ້ວຍຄວາມຮັບຜິດຊອບສູງ ໃນການຈຳກັດ, ສະກັດກັ້ນ ແລະ ຕ້ານຢາເສບຕິດ ພ້ອມ ທັງໄດ້ເນັ້ນໃຫ້ທ້ອງຖິ່ນຕ່າງໆເພີ່ມຄວາມເອົາໃຈໃສ່ສະກັດກັ້ນ ແລະ ແກ້ໄຂບັນຫາຢາເສບຕິດຢ່າງຈິງຈັງ. ນອກນີ້, ຍັງໄດ້ດຳເນີນການສຶກສາອົບຮົມ ແລະ ໂຄສະນາເຜີຍແຜ່ ເພື່ອປູກຈິດສຳນຶກໃຫ້ຄົນໃນທົ່ວສັງຄົມໄດ້ຮັບຮູ້ ແລະ ເຂົ້າໃຈລະບຽບກົດໝາຍ ແລະ ຜົນຮ້າຍຂອງຢາເສບຕິດໃນຫລາຍຮູບການ. ຄຽງຄູ່ກັນນັ້ນ ກໍໄດ້ເອົາໃຈໃສ່ບຳບັດປິ່ນປົວຜູ້ຕິດຢາເສບຕິດຢູ່ຕາມສູນຕ່າງໆ ແລະ ລົງທຶນຈັດຕັ້ງປະຕິບັດໂຄງການຫັນເອົາປະຊາຊົນໄປປະກອບອາຊີບອື່ນແທນການປູກຝິ່ນ. ສ່ວນເຈົ້າໜ້າທີ່ຕຳຫລວດ ແລະ ພາກສ່ວນ ທີ່ກ່ຽວຂ້ອງກໍໄດ້ປະຕິບັດໜ້າທີ່ດ້ວຍຄວາມຮັບຜິດຊອບສູງ ເຊິ່ງໄດ້ສະແດງອອກໃນການຢຶດຂອງກາງຢາເສບຕິດ, ການມ້າງຄະດີ ແລະ ຈັບກຸມຜູ້ຕ້ອງຫາທີ່ພົວພັນກັບຢາເສບຕິດ.