ໃນຕອນເຊົ້າ ຂອງ ວັນທີ 15 ກຸມພາ 2016 ທີ່ສະໂມສອນໃຫ່ຍ ຂອງຫ້ອງວ່າການເມືອງສັງທອງ, ໄດ້ມີຈັດປາຖະກະຖາ, ສາຍຮູບເງົາ ແລະ ວາງສະແດງຮູບພາບ ເພື່ອລະນຶກວັນຄ້າຍວັນເກີດ ຂອງສະຫາຍ ກິມ ເຈິງ ອິນ,ຜູ້ນໍາທີ່ຍິ່ງໃຫ່ຍຕະຫລອດການຂອງປະຊາຊົນ ເກົາຫລີ ຄົບຮອບ 74 ປີ(16/2/1942-16/2/2016). ເຂົ້າຮ່ວມໃນງານປາຖະກະຖາຄັ້ງນີ້ ມີ ສະຫາຍ ຄໍາພັນ ສິດທິດໍາພາ, ກໍາມະການສູນກາງພັກ ປະທານສານປະຊາຊົນສູງສຸດ, ຮອງປະທານສະມາຄົມມິດຕະພາບລາວ-ສປປ ເກົາຫລີ, ສະຫາຍ ຄໍາໝູນ ຕຽງທະລາດ, ເລຂາພັກເມືອງ ເຈົ້າເມືອງ ເມືອງສັງທອງ ແລະ ສະຫາຍ ລີຊາງ ກູນ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງສປປ ເກົາຫລີ ປະຈໍາ ສປປ ລາວແລະ ມີພະນັກງານຫລັກແຫລ່ງອ້ອມຂ້າງເມືອງສັງທອງເຂົ້າຮ່ວມເປັນຈໍານວນ 200 ກ່ວາຄົນ.
ການຈັດປາຖະກະຖາແບບນີ້ ແມ່ນການເຄື່ອນໄຫວປະຈໍາປີ ຂອງສະມາຄົມມິດຕະພາບລາວ-ສປປ ເກົາຫລີ ຮ່ວມກັບສະຖານທູດ ສປປ ເກົາຫລີ ປະຈໍາ ສປປ ລາວ ເພື່ອເປັນການລະນຶກວັນຄ້າຍວັນເກີດ ຂອງ ອາດີດການນໍາຂັ້ນສູງຂອງພັກ,ລັດ ສປປ ເກົາຫລີ, ທັງເປັນໂອກາດດີໃຫ້ແກ່ພາກສ່ວນກ່ຽວຂ້ອງຂອງລາວໄດ້ຮັບຊາບກ່ຽວກັບສະພາບອັນພົ້ນເດັ່ນໃນການພັດທະນາເສດຖະກິດສັງຄົມຂອງ ສປປ ເກົາຫລີໃນປະຈຸບັນ.
ໃນໂອກາດນີ້, ສະຫາຍ ລີຊາງ ກູນ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງສປປ ເກົາຫລີ ປະຈໍາ ສປປ ລາວໄດ້ແຈ້ງໃຫ້ຜູ້ເຂົ້າຮ່ວມງານກ່ຽວກັບຜົນງານ ໃນການເຄື່ອນໄຫວ ທີ່ບໍ່ຮູ້ອິດເມື່ອຍ ຂອງ ສະຫາຍ ກິມ ເຈິງ ອິນ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ສປປ ເກົາຫລີ ໃນໄລຍະທີ່ສະຫາຍເປັນຜູ້ນໍາສູງສຸດຂອງປະເທດ ແລະ ໄດ້ຍົກໃຫ້ເຫັນຜົນສໍາເລັດດ້ານຕ່າງໆ ຂອງ ສປປ ເກົາຫລີ ໃນໄລຍະຜ່ານມາກໍ່ຄືປະຈຸບັນ.
ສະຫາຍ ເອກອັກຄະລັດຖະທູດສປປ ເກົາຫລີຍັງໄດ້ຕີລາຄາສູງສາຍພົວພັນມິດຕະພາບອັນເປັນມູນເຊື້ອ ລະຫວ່າງສອງພັກ,ສອງລັດ ແລະ ປະຊາຊົນສອງຊາດ ລາວ-ສປປ ເກົາຫລີ ຕະຫລອດໄລຍະຜ່ານມາເຊິ່ງທັງສອງຝ່າຍໄດ້ໃຫ້ການສະໜັບສະໜູນຊ່ວຍເຫລືອຊຶ່ງກັນ ແລະ ກັນ, ແລກປ່ຽນບົດຮຽນໃນການປົກປັກຮັກສາ ແລະ ສ້າງສາພັດທະນາປະເທດຊາດ ຂອງ ແຕ່ລະປະເທດ.