ຜູ້ແທນການຄ້າປະເທດສະຫະລັດອາເມຣິກາ ທ່ານ ໄມໂຄ ໂຟຼແມນ ແລະ ລັດຖະມົນຕີກະຊວງອຸດສາຫະກຳ ແລະ ການຄ້າຂອງ ສປປ ລາວ ທ່ານນາງ ເຂັມມະນີ ພົນເສນາ ໄດ້ເຊັນສັນຍາການຄ້າ ແລະ ການລົງທຶນສອງຝ່າຍ ເຊິ່ງທັງສອງທ່ານໄດ້ເປັນປະທານຮ່ວມກອງປະຊຸມ ລັດຖະມົນຕີເສດຖະກິດອາຊຽນ-ອາເມຣິກາ ຢູ່ຊານຟຼານຊິດໂກ ລັດແຄລິຟໍເນຍ ອາທິດທີ່ຜ່ານມາ.
ສັນຍາການຄ້າ ແລະ ການລົງທຶນແມ່ນເວທີໃຫ້ປະເທດສະຫະລັດອາເມຣິກາ ແລະ ສປປ ລາວ ສາມາດປຶກສາຫາລືກ່ຽວກັບບັນຫາການຄ້າ ການລົງທຶນ ເພື່ອເສີມຂະຫຍາຍສາຍສຳພັນເສດຖະກິດສອງຝ່າຍ ໂດຍຜ່ານການອຳນວຍຄວາມສະດວກທາງດ້ານການຄ້າ ສິ່ງກີດຂວາງທີ່ບໍ່ແມ່ນພາສີ ຊັບສິນທາງປັນຍາ ການປົກປ້ອງສິ່ງແວດລ້ອມ ແລະ ການສ້າງຄວາມສາມາດສັນຍານີ້ ຍັງແມ່ນເວທີເພື່ອປະສານງານກ່ຽວກັບບັນຫາຫຼາຍຝ່າຍ ແລະ ພາກພື້ນ ເຊັ່ນ: ການເຊື່ອມໂຍງ AEC “ການເຊັນສັນຍາຄັ້ງນີ້ ຈະແມ່ນພາຫະນະເພື່ອເສີມຂະຫຍາຍສາຍພົວພັນການຄ້າ ແລະ ການລົງທຶນ ສະຫະລັດອາເມຣິກາ-ສປປ ລາວ” ທ່ານ ໂຟຼແມນ ກ່າວໄວ້ “ສັນຍານີ້ສະທ້ອນເຖິງຄວາມຕັ້ງໃຈຂອງປະທານາທິບໍດີ ບາຣັກ ໂອບາມາ ທີ່ມີຕໍ່ອາຊຽນ ແລະ ການເພີ່ມໂອກາດທາງເສດຖະກິດລະຫວ່າງພວກເຮົາ”.
ພິທີເຊັນສັນຍາຄັ້ງນີ້ ແມ່ນຕົວບົ່ງຊີ້ຫຼ້າສຸດທີ່ສະແດງໃຫ້ເຫັນການຮ່ວມມືທີ່ເພີ່ມ ຂຶ້ນລະຫວ່າງ ລາວ ແລະ ອາເມຣິກາ ແລະ ຈັດຂຶ້ນພາຍຫຼັງກອງປະຊຸມສຸດຍອດອາຊຽນ-ອາເມຣິກາ ສະໄໝພິເສດ ທີ່ຊັນນີແລນ ລັດແຄລິຟໍເນຍ ເຊິ່ງເປັນປະທານຮ່ວມໂດຍປະທານາທິບໍດີ ບາຣັກ ໂອບາມາ ແລະ ທ່ານ ຈູມມາລີ ໄຊຍະສອນ ປະທານປະເທດ ສປປ ລາວ.