ວັນທີ 11 ທັນວາ 2021, ກອງປະຊຸມເວທີຄັງປັນຍາລະດັບສູງ ຈີນ-ອາຊຽນ (China-ASEAN High Level Think Tank Forum) ໃນຮູບແບບກອງປະຊຸມທາງໄກ ໄດ້ຈັດຂຶ້ນທີ່ແຂວງ ຮາງນານ, ສປ ຈີນ. ຈຸດປະສົງຂອງກອງປະຊຸມ ແມ່ນເພື່ອສົ່ງເສີມການພົວພັນຮ່ວມມື ແລະ ຄວາມໄວ້ເນື້ອເຊື່ອໃຈ ເຊິ່ງກັນ ແລະ ກັນ ລະຫວ່າງ ຈີນ-ອາຊຽນ.
ໃນວັນທີ 11 ທັນວາ 2021 ທີ່ ສະຖາບັນການຕ່າງປະເທດ, ທ່ານ ສົມສະຫວາດ ເລັ່ງສະຫວັດ, ອະດີດຮອງນາຍົກລັດຖະມົນຕີ ພ້ອມຄະນະໄດ້ເຂົ້າຮ່ວມກອງປະຊຸມເວທີຄັງປັນຍາລະດັບສູງ ຈີນ-ອາຊຽນ “China-ASEAN High Level Think Tank Forum”. ໃນພິທີເປີດກອງປະຊຸມດັ່ງກ່າວ, ທ່ານ ສົມສະຫວາດ ເລັ່ງສະຫວັດ ໄດ້ກ່າວຄຳປາໄສ ໂດຍໄດ້ຍົກໃຫ້ເຫັນ ການເປັນຄູ່ຮ່ວມມືເຊື່ອໝັ້ນເຊິ່ງກັນແລະກັນ ລະຫວ່າງ ອາຊຽນ-ຈີນ ຕະຫຼອດໄລຍະ 30 ປີຜ່ານມາ ໂດຍ ຄຳນຶງເຖິງຕ່າງຝ່າຍຕ່າງມີຜົນປະໂຫຍດ. ໃນໂອກາດກອງປະຊຸມລະນຶກການສ້າງຕັ້ງຄູ່ຮ່ວມມືອາຊຽນ-ຈີນ ຄົບຮອບ 30 ປີທີ່ຜ່ານມາ, ສອງຝ່າຍໄດ້ຕົກລົງສ້າງຕັ້ງຄູ່ຮ່ວມມືຍຸດທະສາດຮອບດ້ານ ອາຊຽນ-ຈີນ ຊຶ່ງເປັນການເປີດສັງກາດໄໝ່ຂອງການຮ່ວມມື ອາຊຽນ-ຈີນ, ສົ່ງເສີມຈັດຕັ້ງປະຕິບັດສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ແລະ ຂໍ້ລິເລີ່ມ “ໜຶ່ງແລວ, ໜຶ່ງເສັ້ນທາງ”.
ກອງປະຊຸມສໍາມະນາດັ່ງກ່າວ ຍັງເປັນການຮັດແໜ້ນການພົວພັນ ລະຫວ່າງ ອາຊຽນ- ຈີນ ໃຫ້ມີຄວາມ ແໜ້ນແຟ້ນ ແລະ ສືບຕໍ່ຜັນຂະຫຍາຍແຜນຍຸດທະສາດການຮ່ວມມືໃນດ້ານຕ່າງໆ ເຊັ່ນ: ດ້ານເສດຖະກິດ, ການຄ້າ-ການລົງທຶນ ແລະ ດ້ານວັດທະນະທຳ-ສັງຄົມ ໃຫ້ປະກົດຜົນເປັນຈິງ ເພື່ອນຳເອົາຜົນປະໂຫຍດມາໃຫ້ປະຊາຊົນສອງຂົງເຂດ ອາຊຽນ ແລະ ຈີນ.
ໃນຕອນເຊົ້າຂອງວັນທີ 03ທັນວາ 2021, ທີ່ ດ່ານສາກົນ ໜອງນົກຂຽນ-ຕຣາປຽງກຣຽນ, ໄດ້ມີພິທີມອບ-ຮັບ ວັກແຊງ ແລະ ລົດຂົນສົ່ງວັກແຊງ ຈາກລັດຖະບານ ແລະ ປະຊາຊົນ ແຫ່ງ ຣາຊະອານາຈັກ ກໍາປູເຈຍ ໃຫ້ແກ່ ລັດຖະບານ ແລະ ປະຊາຊົນ ແຫ່ງ ສປປ ລາວ ໂດຍປະກອບມີ ວັກແຊງ ຊີໂນແວກ ຈຳນວນ 500.000 ໂດສ ແລະ ລົດຂົນສົ່ງວັກແຊງຈໍານວນ 03 ຄັນ ໃຫ້ແກ່ລັດຖະບານ ແຫ່ງ ສປປ ລາວ ເພື່ອນຳໃຊ້ເຂົ້າໃນການຕ້ານແລະສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຢູ່ສປປລາວ ໃນປະຈຸບັນ.