ໃນວັນທີ 17 ຕຸລາຄົມ 2016 ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ ແລະ ຜັນຂະຫຍາຍຜົນຂອງກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມສຸດຍອດທີ່ກ່ຽວຂ້ອງອື່ນໆຂຶ້ນ ທີ່ກະຊວງການຕ່າງປະເທດ ໂດຍການໃຫ້ກຽດເປັນປະທານຮ່ວມຂອງ 3 ເຈົ້າໜ້າທີ່ອາວຸດໂສ ຄື: ທ່ານ ອາລຸນແກ້ວ ກິດຕິຄຸນ, ລັດຖະມົນຕີປະຈໍາສໍານັກງານນາຍົກລັດຖະມົນຕີ ທັງເປັນຫົວໜ້າເຈົ້າໜ້າທີ່ອາວຸດໂສອາຊຽນ, ຫົວໜ້າເຈົ້າໜ້າທີ່ອາວຸດໂສເສົາຄໍ້າປະຊາຄົມເສດຖະກິດອາຊຽນ ແລະ ຫົວໜ້າເຈົ້າໜ້າທີ່ອາວຸດໂສເສົາຄໍ້າວັດທະນະທໍາ-ສັງຄົມອາຊຽນຂອງ ສປປ ລາວ.
ໃນວັນທີ 13 ຕຸລາ 2016, ທີ່ ກະຊວງການຕ່າງປະເທດ, ຝ່າຍປະຕິບັດການໄຟຟ້ານະຄອນຫລວງ ໄດ້ຈັດກອງປະຊຸມເຜີຍແຜ່ ກ່ຽວກັບ ການຊົມໃຊ້ໄຟຟ້າຢ່າງປະຢັດ ແລະ ຖືກຕ້ອງຕາມເຕັກນິກ ໃຫ້ແກ່ພະນັກງານກະຊວງການຕ່າງປະເທດ. ເປັນກຽດໃຫ້ການບັນຍາຍໂດຍ ທ່ານ ແກ້ວຕາດຳ ມະໂນລົມ, ຫົວໜ້າຫ້ອງການຄຸ້ມຄອງລູກຄ້າ ແລະ ປະຊາສຳພັນ, ຝ່າຍປະຕິບັດການໄຟຟ້ານະຄອນຫລວງ. ຊຶ່ງມີບັນດາຄະນະກົມ, ຄະນະພະແນກ ແລະ ພະນັກງານວິຊາການ ຂອງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ໃນວັນທີ 12 ຕຸລາ 2016, ທ່ານ ອາລຸນແກ້ວ ກິດຕິຄຸນ, ລັດຖະມົນຕີປະຈຳສຳນັກງານນາຍົກລັດຖະມົນຕີ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມ ເຈົ້າໜ້າທີ່ອາວຸໂສ ອາຊຽນ-ອີຢູ ເພື່ອກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດ ອາຊຽນ-ອີຢູ ຄັ້ງທີ 21, ຊຶ່ງຈະຈັດຂຶ້ນໃນວັນທີ 13-14 ຕຸລາ 2016 ທີ່ ບາງກອກ, ປະເທດໄທ.
ກອງປະຊຸມໄດ້ປຶກສາຫາລືກ່ຽວກັບແຜນການເຄື່ອນໄຫວ ແລະ ວຽກງານພາລາທິການດ້ານຕ່າງໆຂອງ ກອງປະຊຸມລັດຖະມົນຕີ, ລວມທັງບັນດາຫົວຂໍ້ປຶກສາຫາລື ແລະ ເອກະສານຜົນກອງປະຊຸມ ເພື່ອນໍາສະເໜີໃຫ້ ກອງປະຊຸມລັດຖະມົນຕີຕ່າງປະເທດ ອາຊຽນ-ອີຢູ ພິຈາລະນາຮັບຮອງເອົາເປັນຕົ້ນແມ່ນຖະແຫຼງການບາງກອກ ວ່າດ້ວຍການສົ່ງເສີມການເປັນຄູ່ຮ່ວມສາກົນ ລະຫວ່າງ ອາຊຽນ ແລະ ອີຢູ ເພື່ອກ້າວໄປສູ່ການຍົກລະດັບຂຶ້ນ ເປັນຄູ່ຮ່ວມຍຸດທະສາດໃນອະນາຄົດ.
ກອງປະຊຸມຈັດຂຶ້ນພາຍໃຕ້ການເປັນປະທານຮ່ວມ ລະຫວ່າງ ຫົວໜ້າເຈົ້າໜ້າທີ່ອາວຸໂສອາຊຽນຂອງໄທ, ໃນຖານະເປັນປະເທດປະສານງານອາຊຽນ-ອີຢູ ສໍາລັບປີ 2015-2018, ແລະ ຫົວໜ້າເຈົ້າໜ້າທີ່ອາວຸໂສອາຊຽນ ຂອງອີຢູ.