ເພື່ອ​ເປັນ​ການ​ສ້າງ​ຂະ​ບວນການ​ຂ່ຳນັບ​ຮັບ​ຕ້ອນ ວັນ​ສ້າງ​ຕັ້ງ​ຊາວ​ໜຸ່ມ​ ປະຊາຊົນ ປະຕິວັດ​ລາວ ​ຄົບຮອບ 62 ປີ ​ແລະ ​ເພື່ອ​ເປັນ​ການ​ຂຳ່ນັບ​ຮັບ​ຕ້ອນ​ວັນ​ສຳຄັນ​ຕ່າງໆ​ຂອງ​ລາວ​ເຮົາ, ​ໃນ​ຕອນ​ບ່າຍ​ຂອງ​ວັນ​ທີ 31 ມີນາ 2017, ທີ່​ ກະຊວງ​ການ​ຕ່າງປະ​ເທດ, ​ໄດ້​ມີ​ກອງ​ປະຊຸມ​ສຳ​ມະ​ນາ ກ່ຽວ​ກັບ ຜົນ​ດີ ​ແລະ ຜົນ​ຮ້າຍ​ຂອງ​ການ​ນຳ​ໃຊ້​ສື່​ສັງຄົມ​ອອນ​ລາຍ ຕໍ່​ການ​ປະຕິບັດ​ວຽກ​ງານ ກໍ​ຄື​ການ​ດຳລົງ​ຊີວິດ​ປະຈຳ​ວັນ, ​ໂດຍ​ການ​ເປັນ​ປະທານ​ຂອງ​ທ່ານ ອານຸພາບ ວົງ​ໜໍ່​ແກ້ວ, ​ເລຂາ​ຄະນະ​ບໍລິຫານ​ງານ​ຊາວ​ໜຸ່ມ​ກະຊວງ​ການ​ຕ່າງປະ​ເທດ, ຫົວໜ້າ​ກົມ​ອົງການ​ຈັດ​ຕັ້ງ​ສາກົນ, ​ແລະ ​ໃຫ້​ກຽດ​ຂຶ້ນ​ບັນຍາຍ​ໂດຍ​ທ່ານ​ວິທະຍາກອນ ຈາກ 3 ພາກ​ສ່ວນ​ຄື: ກະຊວງ​ການ​ຕ່າງປະ​ເທດ, ກະຊວງ​ໄປສະນີ, ​ໂທລະ​ຄົມ ​ແລະ ການ​ສື່ສານ ​ແລະ ກະຊວງ​ປ້ອງ​ກັນ​ຄວາມ​ສະຫງົບ. ພ້ອມ​ນັ້ນ​ ກໍ​ມີ​ຜູ້ຕາງໜ້າ​ຈາກ​ສູນ​ກາງ​ຊາວ​ໜຸ່ມ​ ປະຊາຊົນ​ ປະຕິວັດ​ລາວ ​ແລະ ບັນດາ​ສະມາຊິກ​ຊາວ​ໜຸ່ມ​ກະຊວງ​ການ​ຕ່າງປະ​ເທດ ​ເຂົ້າ​ຮ່ວມຢ່າງ​ພ້ອມພຽງ. ຈຸດ​ປະສົງຂອງ​ກອງປະຊຸມ​ຄັ້ງ​ນີ້​ ກໍ​ເພື່ອ​ເຮັດ​ໃຫ້​ບັນດາ​ສະມາຊິກ​ຊາວ​ໜຸ່ມ ກໍ​ຄື​ພະນັກງານ​ສື​ທອດ​ຂອງ​ກະຊວງ​ການ​ຕ່າງປະ​ເທດ ຮູ້​ໄດ້​ເຖິງ ຜົນ​ດີ ​ແລະ ຜົນ​ຮ້າຍ​ຂອງ​ການ​ບໍລິ​ໂພ​ກຂ່າວສານ ຜ່ານ​ທາງ​ສື່​ສັງຄົມ​ອອນ​ລາຍ, ​ແລະ ​ໃຫ້​ຮູ້​​ເຖິງ​ການ​ນຳ​ໃຊ້​ສື່​ອອນ​ລາຍ ຢ່າງ​ຖືກ​ວິທີ ​ແລະ ມີ​ການ​ໄຕ່ຕອງ ​ແລະ ​ເພື່ອ​ຮັບ​ໃຊ້​ໃຫ້​ແກ່​ວຽກ​ງານ​ການ​ຕ່າງປະ​ເທດ ​​ແລະ ຊີວິດ​ປະຈຳ​ວັນໃຫ້​ແທດ​ເໝາະ.

ໃນ​ກອງ​ປະຊຸມ​ສຳ​ມະ​ນາ​ຄັ້ງ​ນີ້, ຜູ້​ເຂົ້າ​ຮ່ວມ​ ໄດ້​ຮັບ​ຟັງ​ການຂຶ້ນ​ບັນຍາຍ​ ​ໃນ 3 ຫົວ​ຂໍ້​​ໃຫຍ່ຄື: 1) ຫົວ​ຂໍ້: “ຜົນ​ດີ​-ຜົນ​ຮ້າຍ​ຂອງ​ການ​ນຳ​ໃຊ້​ສື່​ສັງຄົມ​ອອນ​ລາຍ ຕໍ່​ກັບ​ວຽກງານ​ການ​ຕ່າງປະ​ເທດ” ​ໂດຍ ທ່ານ ພອນ​ທະວີ ບຸດ​ດາລາ, ຫົວໜ້າ​ກົມ​ການ​ຂ່າວ, ກະຊວງ​ການ​ຕ່າງປະ​ເທດ; 2) ຫົວ​ຂໍ້: “ການ​ນຳ​ໃຊ້​ສື່​ສັງຄົມ​ອອນ​ລາຍ ​ໃຫ້​ຖືກຕ້ອງ ​ແລະ ຖືກ​ວິທີ” ໂດຍ ທ່ານ ສີສັນ​ ປອງ​ນະທີ, ຮອງ​ຫົວໜ້າ​ສູນ​ສະກັດ​ກັ້ນ ​ແລະ ​ແກ້​ໄຂ​ເຫດການ​ສຸກ​ເສີນ​ທາງ​ຄອມ​ພິວ​ເຕີ, ຮອງ​​ເລຂາ​ຄະນະ​ບໍລິຫານ​ງານ​ຊາວ​ໜຸ່ມ, ກະຊວງ​​ໄປສະນີ, ​ໂທລະ​ຄົມ ​ແລະ ການ​ສື່ສານ; ​ແລະ 3) ຫົວ​ຂໍ້: “ຜົນ​ດີ-ຜົນ​ເສຍ​ຂອງ​ການ​ນຳ​ໃຊ້​ສື່​ສັງຄົມ​ອອນ​ລາຍ ຕໍ່​ກັບ​ວຽກ​ງານ​ປ້ອງ​ກັນ​ຄວາມ​ສະ​ຫງົບ​” ​ໂດຍ ທ່ານ ພັນ​ຕີ ​ເພັດ​ສະໝອນ ສີ​ລິ​ວົງ, ຫົວໜ້າ​ເຕັກນິກ ​ໂຄງການ​ຕ້ານ​ໂຈລະ​ກຳ​ຜ່ານ​ທາງ​ອິນ​ເຕີ​ເນັດ, ກະຊວງ​ປ້ອງ​ກັນ​ຄວາມ​ສະຫງົບ. ​​ໃນ​ໂອກາດ​ດັ່ງກ່າວ, ​ແຕ່​ລະ​ພາກສ່ວນ ​ໄດ້​ຍົກ​​ໃຫ້​​ເຫັນ​ເຖິງ​ ວິທີ​ການ​ນຳ​ໃຊ້​ສື່​ອອນລາຍທີ່​ຖືກຕ້ອງ ​​ເຂົ້າ​ໃນ​ວຽກ​ງານຂອງ​ຕົນ ​ເພື່ອ​ໃຫ້​​ເກີດ​ຜົນ​ປະ​​ໂຫຍ​ດຕາມ​ມາ, ພ້ອມ​ທັງ​ຍົກ​​ໃຫ້​ເຫັນ​ເຖິງ ​​ໂທດ​ຂອງ​ສື່​ສັງຄົມ​ອອນ​ລາຍ ຖ້າ​ຫາກ​ນຳ​ໃຊ້​ບໍ່​ຖືກ​ວິທີ.

ໃນ​ຕອນ​ທ້າຍ​ຂອງ​ກອງ​ປະຊຸມ ກໍ​ໄດ້​ມີ​ການ​ສົນທະນາ​ ​ແລກປ່ຽນ​ຄຳ​ຄິດ​ຄຳ​ເຫັນ ຂອງ​ບັນດາ​ຜູ້​ເຂົ້າ​ຮ່ວມ​ແລະ ມີການ​ສະຫຼຸບ​ຕີ​ລາຄາ​ຂອງ​ປະ​ທານ​ກອງ​ປະຊຸມ, ​ໂດຍ​​ໄດ້​ເນັ້ນ​ໃຫ້​ສະມາ​ຊິກ​ຊາວ​ໜຸ່ມ ກໍ​ຄື​ພະນັກງານ​ກະຊວງ​ການ​ຕ່າງປະ​ເທດ ມີ​ສະຕິ​ສູງ ​ໃນ​ການ​ໝູນ​ໃຊ້​ສື່​ອອນ​ລາຍ​ຕ່າງໆ ​ເຂົ້າ​ໃນ​ການ​ປະຕິບັດວຽກ​ງານ ກໍ​ຄື​ການ​ດຳລົງ​ຊີ​ວິດ​ປະຈຳ​ວັນ ​ເພື່ອ​ໃຫ້​​ເກີດ​ຜົນ​ປະ​​ໂຫຍ​ດສູງ​ສຸດ.