ໃນວັນທີ 17 ພະຈິກ 2017, ທີ່ ສູນຮ່ວມມືສາກົນ ແລະ ຝຶກອົບຮົມ (ICTC), ສະຫະພັນແມ່ຍິງກະຊວງການຕ່າງປະເທດ ໄດ້ຈັດງານພົບປະສັງສັນ “ງານລ້ຽງນ້ຳຊາ” ລະຫວ່າງບັນດາພັນລະຍາການນຳ, ການນຳເພດຍິງ ຂອງ ກະຊວງການຕ່າງປະເທດ ແລະ ຄະນະນພົວພັນຕ່າງປະເທດສູນກາງພັກ, ບັນດາພັນລະຍາຂອງທູດຕານຸທູດຕ່າງປະເທດປະຈຳລາວ, ນັກການທູດຍິງຂອງລາວ, ນັກການທູດຍິງຕ່າງປະເທດ ແລະ ແມ່ຍິງຈາກບັນດາອົງການຈັດຕັ້ງສາກົນ ປະຈຳຢູ່ ສປປ ລາວ ໂດຍການເປັນປະທານຂອງ ທ່ານ ນາງ ອາລຸນີ ກົມມະສິດ, ພັນລະຍາທ່ານລັດຖະມົນຕີກະຊວງການຕ່າງປະເທດ, ປະທານກິດຕິມະສັກ ສະຫະພັນແມ່ຍິງກະຊວງການຕ່າງປະເທດ. ນອກນັ້ນຍັງມີບັນດາແຂກຖືກເຊີນຈາກ ສູນກາງສະຫະພັນແມ່ຍິງລາວ, ສະຫະພັນແມ່ຍິງບັນດາກະຊວງ, ຕາງໜ້າອົງການຈັດຕັ້ງກຳມະບານ ແລະ ອົງການຈັດຕັ້ງຊາວໜຸ່ມ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ກໍໄດ້ໃຫ້ກຽດເຂົ້າຮ່ວມ; ລວມທັງໝົດປະມານ 300 ທ່ານ.
ໃນໂອກາດອັນສຳຄັນນີ້, ທ່ານ ນາງ ອາລຸນີ ກົມມະສິດ ໄດ້ໃຫ້ກຽດຂຶ້ນກ່າວເປີດງານ ແລະ ມີຄຳເຫັນວ່າ: ການຈັດງານລ້ຽງນ້ຳຊາໃນປີນີ້ ກໍຄືໃນປີທີ່ຜ່ານມາ ແມ່ນຈັດຂຶ້ນທ່າມກາງບັນຍາກາດທີ່ປວງຊົນລາວ ພວມກະກຽມຂ່ຳນັບຮັບຕ້ອນວັນຊາດທີ 2 ທັນວາ ຄົບຮອບ 42 ປີ ແລະ ພິເສດໃນບັຍາກາດທີ່ ສປປ ລາວ ກຳລັງກະກຽມດ້ານຕ່າງໆໃຫ້ແກ່ປີທ່ອງທ່ຽວລາວ 2018, ຊຶ່ງແມ່ຍິງລາວ ເວົ້າລວມ, ເວົ້າສະເພາະແມ່ຍິງກະຊວງການຕ່າງປະເທດ ຈະໄດ້ປະກອບສ່ວນຢ່າງຕັ້ງໜ້າເຂົ້າໃນການກະກຽມເພື່ອການເປັນເຈົ້າພາບທີ່ດີ ໃນການຕ້ອນຮັບນັກທ່ອງທ່ຽວ ໂດຍການສົ່ງເສີມການອະນຸລັກຮັກສາຮີດຄອງປະເພນີອັນດີງາມຂອງລາວ. ໃນໄລຍະ 1 ປີ ຜ່ານມາ, ສະຫະພັນແມ່ຍິງກະຊວງການຕ່າງປະເທດ ແລະ ຄະນະນພົວພັນຕ່າງປະເທດສູນກາງພັກ ໄດ້ຕັ້ງໜ້າປະຕິບັດສຳເລັດໜ້າທີ່ຂອງຕົນຫລາຍດ້ານ, ຊຶ່ງອັນທີ່ພົ້ນເດັ່ນແມ່ນ ສະຫະພັນແມ່ຍິງກະຊວງການຕ່າງປະເທດ ໄດ້ຮ່ວມກັບບັນດາພັນລະຍາທູດອາຊຽນ ພ້ອມກັນສ້າງຕັ້ງກຸ່ມແມ່ຍິງການທູດ ອາຊຽນ “ກຍອວ” ທີ່ ນະຄອນຫລວງວຽງຈັນ ໃນວັນທີ 1 ສິງຫາ 2017 ທີ່ຜ່ານມາ ເພື່ອປະກອບສ່ວນໃນການສະເຫລີມສະຫລອງວັນສ້າງຕັ້ງອາຊຽນຄົບຮອບ 50 ປີ.
“ງານລ້ຽງນ້ຳຊາ” ເປັນກິດຈະກຳປະຈຳປີຂອງ ສະຫະພັນແມ່ຍິງກະຊວງການຕ່າງປະເທດ ຊຶ່ງໄດ້ຈັດຕັ້ງປະຕິບັດຢ່າງເປັນປະຈຳ ດ້ວຍຈຸດປະສົງເພື່ອເຕົ້າໂຮມ ພົບປະສັງສັນ, ສ້າງຄວາມລຶ້ງເຄີຍ, ຄວາມຮັກແພງ ແລະ ແລກປ່ຽນວັດທະນະທຳ ຊຶ່ງກັນ ແລະ ກັນ ຂອງແມ່ຍິງທີ່ເຮັດວຽກການທູດ ກັບແມ່ຍິງຕ່າງປະເທດ ທີ່ປະຈຳການຢູ່ບັນດາສຳນັກງານຕ່າງປະເທດ ໃນ ສປປ ລາວ. ພາຍໃນງານ ນອກຈາກຈະມີການວາງສະແດງສິນຄ້າ ແລະ ອາຫານແລ້ວ ຍັງມີການສະແດງສິນລະປະຂອງເອື້ອຍນ້ອງແມ່ຍິງກະຊວງການຕ່າງປະເທດ ແລະ ບັນດາສະຖານທູດຕ່າງໆ ອັນໄດ້ສ້າງຄວາມມ່ວນຊື່ນ ແລະ ຄວາມປະທັບໃຈ ໃຫ້ແກ່ຜູ້ເຂົ້າຮ່ວມ.
ໃນໂອກາດນີ້ ແຂກເຂົ້າຮ່ວມກໍໄດ້ອວຍພອນສົ່ງທ້າຍປີເກົ່າ 2017 ແລະ ຕ້ອນຮັບປີໃໝ່ 2018 ຊຶ່ງກັນ ແລະ ກັນ ດ້ວຍຄວາມເບີກບານມ່ວນຊື່ນ.