ໃນວັນ​ທີ 16 ມັງກອນ 2018, ຢູ່​ທີ່​ ກະຊວງ​ປ້ອງ​ກັນ​ປະ​ເທດ, ຄະນະ​ສະຫະພັນ​ແມ່ຍິງ ກະຊວງ​ການ​ຕ່າງປະ​ເທດ, ​​ໄດ້​ນຳ​ເອົາ​ປັດໃຈ ລວມມີເຄື່ອງ​ຊ່ວຍ​ເຫຼືອ, ​ເຄື່ອງ​ບໍລິ​ໂພ​ກຈຳນວນ​ໜຶ່ງ​ ແລະ ເງິນສົດ ລວມມູນ​ຄ່າ​ທັງ​ໝົດ 5 ລ້ານກວ່າກີບ​ ມອບໃຫ້​ແກ່ ສະຫະພັນ​ແມ່ຍິງ​ກະຊວງ​ປ້ອງ​ກັນ​ປະ​ເທດ, ເພື່ອ​​ນຳ​ໄປ​ມອບໃຫ້​ອ້າຍ​ນ້ອງ, ນາຍ ​ແລະ ພົນທະ ຫານ ກະຊວງ​ປ້ອງ​ກັນ​ປະ​ເທດ ທີ່​ກຳລັງ​ປະຕິບັດ​ໜ້າ​ທີ່ຢູ່​ ເຂດຊົນນະບົດ, ທຸລະກັນດານ​ ແລະ ຫ່າງ​ໄກສອກຫຼີກ, ​ເນື່ອງໃນ​​ໂອກາດວັນ​ສ້າງຕັ້ງກອງທັບ​ປະຊາຊົນ​ລາວ ຄົບຮອບ 69 ປີ ໃນວັນ​ທີ 20 ມັງກອນ ທີ່​ຈະ​ມາ​ເຖິງ​ນີ້.

          ພິທີມອບ-ຮັບ ດັ່ງກ່າວ, ເປັນ​ກຽດ​ມອບ​ໂດຍ​ ທ່ານ ນາງ ດາລາວັນ ສະຫວັນເພັດ, ພັນ​ລະ​ຍາ​ທ່ານຮອງ​ລັດຖະມົນຕີ​​ກະຊວງ​ການ​ຕ່າງປະ​ເທດ ແລະ ຮັບໂດຍ​ ທ່ານ ນາງ ຄໍາສອນ ຈັນຍາລາດ, ພັນ​ລະ​ຍາທ່ານ​ລັດຖະມົນຕີ​ກະຊວງ​ປ້ອງ​ກັນ​ປະ​ເທດ, ຊຶ່ງມີ ທ່ານ ນາງ ພິມ​ພາ ​ແກ້ວ​ມີ​ໄຊ, ຄະນະບໍລິຫານງານ ສູນກາງສະຫະພັນແມ່ຍິງລາວ, ປະທານ​ສະຫະພັນ​ແມ່ຍິງ​ກະຊວງການ​ຕ່າງປະເທດ ແລະ ທ່ານ ພັນ​ເອກ ນາງ ຄຳ​ພູ ສິດທິ​ເສນ, ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງລາວ, ຫົວໜ້າ​ຫ້ອງການ-ປະທານ​ສະຫະພັນ​ແມ່ຍິງ​ກະຊວງ​ປ້ອງ​ກັນປະ​ເທດ, ພ້ອມ​ດ້ວຍ​ຄະ​ນະ​ສະ​ຫະ​ພັນ​ແມ່​ຍິງ ກະ​ຊວງ​ການ​ຕ່າງ​ປະ​ເທດ ແລະ ກະ​ຊວງ​ປ້ອງ​ກັນ​ປະ​ເທດ ເຂົ້າຮ່ວມ.

ໃນ​ໂອກາດ​ນີ້, ຄະນະ​ສະຫະພັນ​ແມ່ຍິງ​ກະຊວງ​ການ​ຕ່າງປະ​ເທດ ​​ໄດ້​ສະ​ແດງ​ຄວາມ​ຮູ້​ບຸນຄຸນ ແລະ ຝາກ​ຄຳຊົມ​ເຊີຍ, ຄຳ​ຢ້ຽມຢາມ​ຖາມ​ຂ່າວ ​​ໄປ​ຍັງ​ຄະນະ​ນຳ​ກະຊວງ​ປ້ອງ​ກັນ​ປະ​ເທດ, ນາຍ ​ແລະ ພົນ​ທະຫານ, ນັກຮົບ ​ແລະ ສະມາຊິກຄອບຄົວ​ທຸກ​ຖ້ວນ​ໜ້າ ແລະ ອວຍ​ພອນ​ໄຊ​ອັນ​ປະ​ເສີດ​ໃນ​ໂອ​ກາດ​ປີໃໝ່ 2018 ຈົ່ງ​ມີ​ສຸຂະພາບ​ແຂງແຮງ, ​ມີ​ຄວາມ​ສູກ ແລະ ປະສົບ​ຜົນສຳ​ເລັດ​ອັນ​ຍິ່ງ​​ໃຫຍ່ ​ໃນ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາປະ​ເທດ​ຊາດ ໃຫ້​ຈະ​ເລີນ​ຮູ່ງ​ເຮືອງ​ຂຶ້ນ​ເລື້ອຍ​ໆ.