ໃນອາທິດຜ່ານມານີ້, ສະມາຊິກກໍາມະບານ ສະຖານທູດລາວ ປະຈໍາ ສະຫະພັນຣັດເຊຍ ໄດ້ຈັດຕັ້ງການອອກແຮງງານລວມຫມູ່ ເພື່ອຂໍ່ານັບຮັບຕ້ອນ ວັນກໍາມະກອນສາກົນ ຄົບຮອບ 132 ປີ (1/5/1886-1/5/2018) ທີ່ຈະຫມູນວຽນມາເຖິງ.

ຈຸດປະສົງຂອງການສ້າງຂະບວນການອອກແຮງງານລວມຄັ້ງນີ້ ແມ່ນເຫັນໄດ້ຄວາມຫມາຍສໍາຄັນຂອງວັນທີ 1 ພຶດສະພາ ແລະ ກໍ່ເພື່ອເປັນການນໍາເອົາເນື້ອໃນຈິດໃຈຂໍ້ແຂ່ງຂັນ 5 ເປັນເຈົ້າ ຂອງສູນກາງກໍາມະບານລາວ ແລະ ມະຕິຄໍາສັ່ງ ຂອງອົງການຈັດຕັ້ງກໍາມະບານກະຊວງການຕ່າງປະເທດວາງອອກ ເພື່ອນໍາໄປຈັດຕັ້ງຜັນຂະຫຍາຍພາຍໃນຫນ່ວຍກໍາມະບານສະຖານທູດ ແລະ ປຸກລະດົມຖັນແຖວສະມາຊິກກໍາມະບານພາຍໃນສະຖານທູດໃຫ້ພ້ອມກັນສ້າງຂະບວນການ ໃນໂອກາດວັນສໍາຄັນຕ່າງໆຂອງຊາດ, ໂດຍສະເພາະ ວັນທີ 1 ພຶດສະພາ ທີ່ມີຄວາມຫມາຍສໍາຄັນສໍາລັບອົງການຈັດຕັ້ງກໍາມະບານ ເວົ້າລວມ ແລະ ເວົ້າສະເພາະ ສະມາຊິກກໍາມະບານສະຖານທູດທີ່ໄດ້ປະກອບສ່ວນ ເຂົ້າໃນການປະຕິບັດສອງຫນ້າທີ່ຍຸດທະສາດ ຄື : ປົກປັກຮັກສາ ແລະ ສ້າງສາພັດທະນາປະເທດຊາດ, ພ້ອມທັງສູ້ຊົນນໍາເອົາປະເທດຊາດໃຫ້ສາມາດຫລຸດພົ້ນອອກຈາກປະເທດດ້ອຍພັດທະນາ ໃນປີ 2020.