ເພື່ອເປັນການສະເລີມສະຫລອງວັນການທູດລາວ ຄົບຮອບ 73 ປີ ທີ່ໝູນວຽນມາເຖິງໃນວັນທີ 12 ຕຸລາ 2018 (12 ຕຸລາ 1945 - 12 ຕຸລາ 2018), ຄະນະຊາວໜຸ່ມກະຊວງການຕ່າງປະເທດ ໄດ້ຈັດຕັ້ງກອງປະຊຸມສຳມະວິທະຍາສາດ ກ່ຽວກັບ ການເຄື່ອນໄຫວການທູດຂອງ ສປປ ລາວ ໃນເວທີພາກພື້ນ ແລະ ສາກົນໃນໄລຍະຜ່ານມາ, ໂດຍພາຍໃຕ້ການເປັນປະທານຂອງ ສະຫາຍ ອານຸພາບ ວົງໜໍ່ແກ້ວ, ກຳມະການສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜູ່ມກະຊວງການຕ່າງປະເທດ, ດ້ວຍການໃຫ້ກຽດເຂົ້າຮ່ວມໂດຍເອກອັກຄະລັດຖະທູດອາວຸໂສຈຳນວນໜຶ່ງ, ມີຕາງໜ້າຈາກສູນກາງຊາວໜຸ່ມປະຊາຊົນປະຕິວັດລາວ, ສະມາຊິກຊາວໜຸ່ມຄະນະພົວພັນຕ່າງປະເທດສູນກາງພັກ ແລະ ຊາວໜຸ່ມກະຊວງການຕ່າງປະເທດເຂົ້າຮ່ວມປະມານ 350 ກ່ວາສະຫາຍ.

ໃນການກ່າວເປີດພິທີ, ທ່ານປະທານ ໄດ້ຍົກໃຫ້ເຫັນຜົນສຳເລັດ ແລະ ຄວາມສຳຄັນຂອງການເຄື່ອນໄຫວການທູດຂອງພວກເຮົາໃນໄລຍະຜ່ານມາ ແລະ ປະຈຸບັນພາຍໃຕ້ການປະຕິບັດນະໂຍບາຍການຕ່າງປະເທດ ຂອງພັກແລະລັດຖະບານທີ່ຖືກຕ້ອງ ແລະ ສອດຄ່ອງກັບການປ່ຽນແປງສະພາບການຂອງໂລກ ແລະ ພາກພື້ນໃນແຕ່ລະໄລຍະ, ເພື່ອແນໃສ່ເງື່ອນໄຂ ແລະ ສະພາບແວດລ້ອມທີ່ເອື້ອອຳນວຍຄວາມສະດວກໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ. ຫລັງຈາກນັ້ນ, ກອງປະຊຸມຍັງໄດ້ຄົ້ນຄ້ວາ, ນຳສະເໜີ ແລະ ແລກປ່ຽນຄຳຄິດເຫັນກ່ຽວກັບບາງບັນຫາທີ່ພົ້ນເດັ່ນຂອງສາກົນ ແລະ ພາກພຶ້ນໃນປະຈຸບັນ, ເພື່ອເຮັດໃຫ້ຜູ້ເຂົ້າຮ່ວມກໍ່ຄືພະນັກງານຮຸ້ນສືບທອດໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງກ່ຽວກັບບັນຫາຕ່າງໆທີ່ເກີດຂຶ້ນໃນໂລກ ແລະ ພາກພຶ້ນ. ພ້ອມດຽວກັນນັ້ນ, ເພື່ອເຮັດໃຫ້ກອງປະຊຸມສຳມະນາໃນຄັ້ງນີ້ມີເນື້ອໃນໜັກແຫນ້ນ ແລະ ສົມບູນ, ກອງປະຊຸມຍັງໄດ້ຮັບຟັງການປະກອບຄຳຄິດຄຳເຫັນກ່ຽວກັບບັນຫາດັ່ງກ່າວໂດຍບັນດາທ່ານເອກອັກຄະລັດຖະທູດອາວຸໂສທີ່ມີປະສົບການໃນການເຄື່ອນໄຫວວຽກງານການທູດສອງຝ່າຍແລະຫລາຍຝ່າຍ. ໃນໂອກາດນີ້, ເພິ່ນຍັງໄດ້ຍົກໃຫ້ເຫັນປະສົບການ ແລະ ບົດຮຽນກ່ຽວກັບການເຄື່ອນໄຫວວຽກງານການທູດຕົວຈິງຂອງແຕ່ລະທ່ານໃນແຕ່ລະໄລຍະຜ່ານມາ, ຊຶ່ງເປັນປະສົບການແລະບົດຮຽນອັນລໍ້າຄ່າສຳລັບນັກການທູດຮຸ້ນສືບທອດ.

ໃນໂອກາດດຽວກັນນີ້, ເພື່ອເປັນການສ້າງບັນຍາກາດໃຫ້ຟົດຟຶ້ນແລະເພື່ອຮັດແຫນ້ນຄວາມສາມັກຄີຊຶ່ງກັນແລະກັນ, ພາຍຫລັງກອງປະຊຸມສຳມະນາ, ຊາວໜຸ່ມກະຊວງການຕ່າງປະເທດຍັງໄດ້ຈັດການແຂ່ງຂັນກິລາບານເຕະມິດຕະພາບຮ່ວມກັບຄະນະພົວພັນຕ່າງປະເທດສູນກາງພັກ.