ໃນວັນທີ 14 ມີນາ 2020, ທີ່ ເດີ່ນຕີດອກປີກໄກ່ ບຶງຂະຫຍອງ (Sport View), ນະຄອນຫຼວງວຽງຈັນ, ຊາວໜຸ່ມກະຊວງການຕ່າງປະເທດ ໄດ້ຈັດກິດຈະກຳແຂ່ງຂັນກິລາຕີດອກປີກໄກ່ ຊິງຂັນເລຂາຄະນະບໍລິຫານງານຊາວໜຸ່ມ ກະຊວງການຕ່າງປະເທດ ເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ ຂອງອົງຄະນະພັກກະຊວງການຕ່າງປະເທດ ຄັ້ງທີ IV ແລະ ກອງປະຊຸມໃຫຍ່ຂອງ 03 ອົງການຈັດຕັ້ງມະຫາຊົນ ກະຊວງການຕ່າງປະເທດ, ພາຍໃຕ້ການໃຫ້ກຽດເຂົ້າຮ່ວມຂອງ ສະຫາຍ ດວງມະນີ ຍອດສີອຸດົມ, ເລຂາຄະນະບໍລິຫານງານຊາວໜຸ່ມ ກະຊວງການຕ່າງປະເທດ, ຫົວໜ້າກົມ ສົນທິສັນຍາ ແລະ ກົດໝາຍ, ມີບັນດາສະມາຊິກຊາວໜຸ່ມຂອງແຕ່ລະໜ່ວຍ ພາຍໃນກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.
ການແຂ່ງຂັນກິລາຕີດອກປີກໄກ່ ໃນຄັ້ງນີ້, ໄດ້ຈັດແບ່ງອອກເປັນ 03 ປະເພດ ຄື: ຄູ່ຊາຍ, ຄູ່ຍິງ ແລະ ຄູ່ປະສົມ, ຊຶ່ງນັກກິລາທີ່ລົງແຂ່ງຂັນແມ່ນມາຈາກ 17 ກົມ ພາຍໃນກະຊວງ. ພາຍຫຼັງສຳເລັດການແຂ່ງຂັນ, ສະຫາຍ ດວງມະນີຍອດສີອຸດົມ, ເລຂາຄະນະບໍລິຫານງານຊາວໜຸ່ມ ກະຊວງການຕ່າງປະເທດ, ກໍໄດ້ໃຫ້ກຽດມອບຂັນລາງວັນໃຫ້ແກ່ທີມຊະນະເລີດ ອັນດັບທີ 01 ແລະ ອັນດັບທີ 02 ຂອງແຕ່ລະທີມ, ຊຶ່ງມີຜົນການແຂ່ງຂັນມີດັ່ງນີ້: ອັນດັບ 01 ປະເພດຄູ່ຊາຍແມ່ນ ຫ້ອງການກະຊວງການຕ່າງປະເທດ; ອັນດັບ 01 ປະເພດຄູ່ຍິງແມ່ນ ກົມເອີຣົບ ແລະ ອາເມລິກາ; ອັນດັບ 01 ປະເພດຄູ່ປະສົມແມ່ນ ສະຖາບັນການຕ່າງປະເທດ. ສຳລັບອັນດັບ 02 ປະເພດຄູ່ຊາຍແມ່ນ ກົມອາຊີ, ປາຊີຟິກ ແລະ ອາຟຣິກກາ; ສຳລັບອັນດັບ 02 ປະເພດຄູ່ຍິງແມ່ນ ກົມອົງການຈັດຕັ້ງມະຫາຊົນ; ແລະ ອັນດັບ 02 ປະເພດຄູ່ປະສົມແມ່ນ ກົມພົວພັນຄົນເຊື້ອຊາດລາວຢູ່ຕ່າງປະເທດ. ພ້ອມກັນນີ້, ສະຫາຍເລຂາຄະນະບໍລິຫານງານຊາວໜຸ່ມ ກະຊວງການຕ່າງປະເທດ ຍັງໄດ້ໂອ້ລົມກັບບັນດານັກກິລາ ກໍຄືສະມາຊິກຊາວໜຸ່ມຂອງກະຊວງການຕ່າງປະເທດ ດ້ວຍບັນຍາກາດອັນອົບອຸ່ນ ແລະ ເປັນກັນເອງ.
ກິດຈະກຳດັ່ງກ່າວ, ນອກຈາກເປັນການສ້າງຂະບວນການ ເພື່ອຂໍ່ານັບຮັບຕ້ອນກອງປະຊຸມໃຫຍ່ທີ່ສຳຄັນຂອງກະຊວງການຕ່າງປະເທດແລ້ວ, ກໍຍັງເປັນການສ້າງຄວາມສາມັກຄີຮັກແພງ ຊຶ່ງກັນ ແລະ ກັນ ໃຫ້ແກ່ສະມາຊິກຊາວໜຸ່ມ ກໍຄືພະນັກງານທັງໝົດພາຍໃນກະຊວງ, ຊຶ່ງການແຂ່ງຂັນກິລາຄັ້ງນີ້ ແມ່ນດໍາເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ, ມີຄວາມຟົດຟື້ນມ່ວນຊື່ນ ແລະ ເຕັມໄປດ້ວຍຄວາມໝາຍຄວາມສຳຄັນ.