ໂດຍປະຕິບັດຕາມການຕົກລົງເຫັນດີຂອງຄະນະພັກ-ຄະນະນໍາກະຊວງການຕ່າງປະເທດ, ໃນຕອນເຊົ້າຂອງວັນທີ 30 ເມສາ 2020, ຜູ່ຕາງໜ້າຄະນະບໍລິຫານງານຂອງອົງການຈັດຕັ້ງມະຫາຊົນກະຊວງການຕ່າງປະເທດ ລວມມີ: ສະຫະພັນແມ່ຍິງ, ສະຫະພັນກໍາມະບານ ແລະ ຊາວໜຸ່ມປະຊາຊົນປະຕິວັດລາວ ໄດ້ໄປມອບເຄື່ອງອຸປະກອນການແພດທີ່ຈຳເປັນ ຈຳນວນໜຶ່ງ (ເຄື່ອງວັດແທກອຸນຫະພູມ, ເຄື່ອງແທກຕັ່ງຊົ່ງ, ຈັກຊັກຜ້າ ແລະ ອື່ນໆ) ລວມມີມູນຄ່າທັງໝົດ 15.000.000 ກີບ ໃຫ້ແກ່ ໂຮງໝໍ 103, ໂຮງໝໍມິດຕະພາບ ແລະ ໂຮງໝໍເສດຖາທິຣາດ ເພື່ອປະກອບ ສ່ວນຊຸກຍູ້ເຂົ້າໃນການຮອງຮັບວຽກງານການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດ COVID-19, ໂດຍແມ່ນຫົວໜ້າ ແລະ ຄະນະອໍານວຍການຂອງແຕ່ລະໂຮງໝໍດັ່ງກ່າວຂ້າງເທິງ ໄດ້ໃຫ້ການຕ້ອນຮັບ ແລະ ຕາງໜ້າຮັບເອົາເຄື່ອງຊ່ວຍເຫຼືອດັ່ງກ່າວ.
ໃນພິທີມອບ-ຮັບ, ທ່ານ ນາງ ຟອງສະໝຸດ ອັ່ນລາວັນ, ປະທານຄະນະບໍລິຫານງານສະຫະພັນແມ່ຍິງກະຊວງໄດ້ຕາງໜ້າຄະນະຈາກສາມອົງການຈັດຕັ້ງມະຫາຊົນກະຊວງ ໄປມອບເຄື່ຶອງໃນຄັ້ງນີ້ ໄດ້ສະແດງຄວາມຍ້ອງຍໍຊົມເຊີຍ ພ້ອມທັງໃຫ້ກຳລັງໃຈແກ່ບັນດາພະນັກງານແພດໝໍ ກໍຄືພະຍາບານ ທີ່ເປັນນັກຮົບເສື້ອຂາວ ປະຈັນບານປະຕິບັດພາລະກິດວຽກງານຢ່າງໜັກໜ່ວງ, ມີຄວາມສ່ຽງສູງໃນການຕໍ່ສູ້ກັບພະຍາດ COVID-19 ແລະ ໄດ້ຍົກໃຫ້ເຫັນເຖິງຄວາມຫ່ວງໄຍ ຂອງສະມາຊິກທັງສາມອົງການຈັດຕັ້ງມະຫາຊົນ ທີ່ບໍ່ໄດ້ນິ້້ງນອນໃຈ ແລະ ຂໍມີສ່ວນຮ່ວມຊ່ວຍເຫຼືອສັງຄົມໃນຍາມສະພາບຫຍຸ້ງຍາກເຊັ່ນນີ້; ເຖິງແມ່ນວ່າ ມູນຄ່າຈະບໍ່ສູງແຕ່ກໍເປັນນໍ້າໃຈຄວາມສາມັກຄີຂອງສະມາຊິກ ທີ່ຢາກບິແບ່ງຜ່ອນເບົາເທົ່າທີ່ຈະສາມາດຊ່ວຍເຫລືອໄດ້.
ໃນໂອກາດນີ້, ຄະນະອໍານວຍການຂອງໂຮງໝໍທັງ 3 ແຫ່ງໄດ້ຝາກຄວາມຂອບໃຈ, ຢື້ຢາມຖາມຂ່າວ ແລະ ຮູ້ບຸນຄຸນເປັນຢ່າງສູງມາຍັງຄະນະພັກ-ຄະນະນໍາ ກະຊວງການຕ່າງປະເທດ ໂດຍສະເພາະສະມາຊິກຂອງອົງການຈັດຕັ້ງມະຫາຊົນກະຊວງການຕ່າງປະເທດໃນການປະກອບສ່ວນ ກໍຄື ຄວາມເປັນຫ່ວງເປັນໄຍ ແລະ ໄດ້ມອບເຄື່ອງທີ່ຈໍາເປັນໃນຄັ້ງນີ້. ພ້ອມທັງໄດ້ຍົກໃຫ້ເຫັນເຖິງຄວາມຈຳເປັນ ແລະ ຄວາມຕ້ອງການອຸປະກອນການແພດ ເພື່ອເຄື່ອນໄຫວວຽກງານຕ້ານພະຍາດດັ່ງກ່າວ ຕະຫຼອດໄລຍະຜ່ານມາ ກໍຄື ໃນສະເພາະໜ້າ.