ໃນຕອນບ່າຍວັນທີ 08 ມັງກອນ 2015, ທີ່ ສູນກິລາຄົບວົງຈອນ ກູດໄລ, ຄະນະບໍລິຫານສູນກາງຊາວຫນຸ່ມ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ໄດ້ຈັດກິດຈະກຳການແຂ່ງຂັນກິລາບານເຕະ ຊາຍ ແລະ ຍິງ ເພື່ອຊິງຂັນ ຄະນະບໍລິຫານສູນກາງຊາວຫນຸ່ມ ກະຊວງການຕ່າງປະເທດ ແລະ ຄຕພ. ໃຫ້ກຽດເຂົ້າຮ່ວມໂດຍແມ່ນ ທ່ານ ສະເຫລີມໄຊ ກົມມະສິດ, ລັດຖະມົນຕີຊ່ວຍວ່າການກະຊວງການຕ່າງປະເທດ, ທ່ານ ແສງແກ້ວ ປວງປະດິດ, ເລຂາຄະນະບໍລິຫານງານຊາວຫນຸ່ມ ກະຊວງການຕ່າງປະເທດ ແລະ ຄຕພ, ມີບັນດາຫົວຫນ້າກົມ, ຮອງກົມ ແລະ ບັນດາສະມາຊິກຊາວຫນຸ່ມ ຂອງ ກະຊວງການຕ່າງປະເທດ ແລະ ຄຕພ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງການຈັດກິດຈະກຳດັ່ງກ່າວ ແມ່ນເພື່ອສ້າງຂະບວນການຂ່ຳນັບຮັບຕ້ອນ ກອງປະຊຸມໃຫຍ່ ຄັ້ງທີ X ຂອງ ຄະນະບໍລິຫານສູນກາງຊາວຫນຸ່ມ ກະຊວງການຕ່າງປະເທດ ແລະ ຄຕພ. ການແຂ່ງຂັນດັ່ງກ່າວ ສະເພາະທີມຊາຍ ແມ່ນແບ່ງອອກເປັນ 8 ທີມ ແລະ ທີມຍິງແບ່ງອອກເປັນ 4 ທີມ, ຜົນການແຂ່ງຂັນຮອບຊິງຊະນະເລີດ ປະກົດວ່າ ທີມ C (ກົມຈັດຕັ້ງ ແລະ ພະນັກງານ; ກົມກວດກາ ແລະ ຫ້ອງການບໍລິການສະຖານທູດ) ສາມາດເອົາຊະນະທີມ F (ກົມອົງການຈັດຕັ້ງສາກົນ; ກົມສົນທິສັນຍາ ແລະ ກົດຫມາຍ ແລະ ກົມເອີຣົບ ແລະ ອາເມລິກາ) 3-1 ປະຕູ ແລະ ທີມຍິງແມ່ນ ທີມ D (ຫ້ອງການ; ກົມການເງິນ; ກົມພິທີການທູດ; ກົມກົງສຸນ ແລະ ສະຖາບັນການຕ່າງປະເທດ) ສາມາດເອົາຊະນະ ທີມ B (ກົມຈັດຕັ້ງ ແລະ ພະນັກງານ; ກົມກວດກາ; ກົມເສດຖະກິດ; ກົມອາຊຽນ ແລະ ຫ້ອງການບໍລິການສະຖານທູດ) ດ້ວຍການຍິງຈຸດໂທດ.
ການແຂ່ງຂັນໄດ້ດຳເນີນໄປດ້ວຍບັນຍາກາດຟົດຟື້ນມ່ວນຊື່ນ ແລະ ເຕັມໄປດ້ວຍໄມຕີຈິດມິດຕະພາບ.