​ໃນ​ຕອນ​ບ່າຍ​ວັນ​ທີ 15 ມັງກອນ 2015, ທີ່ ຫ້ອງ​ປະຊຸມ ກະຊວງ​ການ​ຕ່າງປະ​ເທດ, ຄະນະ​ບໍລິຫານ​ງານ​ຊາວ​ຫນຸ່ມ ກະຊວງ​ການ​ຕ່ງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຈັດ​ກອງ​ປະຊຸມ​ສຳ​ມະ​ນາ​ເຜີຍ​ແຜ່​ວຽກ​ງານການສ້າງປະຊາຄົມອາຊຽນ ແລະ ການສ້າງວາລະການພັດທະ ນາຫລັງປີ 2015, ​ໂດຍ​ການ​ໃຫ້​ກຽດ​ເປັນ​ປະທານ​ຂອງ ທ່ານ ສະ​ເຫລີ​ມ​ໄຊ ກົມມະ​ສິດ, ລັດຖະ ມົນຕີຊ່ວຍ​ວ່າການ​ກະຊວງ​ການ​ຕ່າງປະ​ເທດ, ຊຶ່ງ​ມີ​ພະນັກງານ ​ແລະ ສະມາຊິກ​ຊາວ​ຫນຸ່ມ ກະຊວງ​ການ​ຕ່າງປະ​ເທດ ​ແລະ ຄຕພ ​ເຂົ້າ​ຮ່ວມ​ຢ່າງ​ພ້ອມພຽງ.

ຈຸດປະສົງ​ຂອງ​ການ​ຈັດ​ກອງ​ປະຊຸມ​ສຳ​ມະ​ນາ​ໃນ​ຄັ້ງ​ນີ້ ກໍ​ເພື່ອ​ເຮັດ​ໃຫ້​ພະນັກງານ​ວິຊາ​ການ ​ໂດຍ​ສະ​ເພາະ​ພະນັກ​ງານ​ຫນຸ່ມ​ນ້ອຍຂອງ​ກະຊວງ​ການ​ຕ່າງປະ​ເທດ ​ແລະ ຄຕພ ກຳ​ໄດ້​ຢ່າງ​ເລິກ​ເຊິ່ງ ກ່ຽວ​ກັບ ​ສິ່ງ​ທ້າ​ທາຍ, ຫມາກ ຜົນ ​ແລະ ພາລະ​ບົດບາດ​ຂອງ​ລາວ​ເຮົາ ​ໃນ​ການຈັດ​ຕັ້ງ​ປະຕິບັດ​ວຽກ​ງານ ​ເພື່ອ​ໃຫ້​ຍາດ​ມາ​ໄດ້ຜົນ​ປະ​ໂຫຍ​ດ​ໃນ​ທຸ​ດ້ານ ​ເຊັ່ນ ດ້ານ​ການ​ເມືອງ, ​ເສດຖະກິດ ​ແລະ ວັດທະນະທຳ-ສັງຄົມ ​ໃນ​ການ​ກະກຽມ​ເຂົ້າ​ເປັນປະຊາ​ຄົມ​ເສດຖະ ກິດ​ອາ​ຊຽນ ​ໃນ​ທ້າຍ​ປີ 2015 ນີ້. ພ້ອມ​ນີ້, ກອງ​ປະຊຸມ​ຍັງ​ແຈ້ງ​ໃຫ້​ຮູ້ ກ່ຽວ​ກັບ ​ຄວາມ​ຄືບ​ຫນ້າ​ໃນ​ການຈັດ​ຕັ້ງ​ປະຕິ ບັດເປົ້າ​ຫມາຍ​ສະຫັດ​ສະຫວັດ​ດ້ານ​ການ​ພັດທະນາ (MDGs), ບັນດາ​ເປົ້າ​ຫມາຍທີ່​ສາມາດ​ປະຕິບັດ​ໄດ້​ຕາມ​ຄາດຫມາຍ (On-track MDGs) ​ແລະ ເປົ້າ​ຫມາຍທີ່​ຍັງ​ບໍ່ສາມາດ​ປະຕິບັດ​ໄດ້​ (Off-track MDGs) ​ແລະ ທິດ​ທາງ​​ໃນ​ຕໍ່ຫນ້າ​ໃນ​ການຈັດ​ຕັ້ງປະຕິບັດເປົ້າ​ຫມາຍ​ສະຫັດ​ສະຫວັດ​ດ້ານ​ການ​ພັດທະນາ​.