ຄະນະ​ບໍລິຫານ​ງານ​ຊາວ​ຫນຸ່ມ ກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ດຳ​ເນີນກອງ​ປະຊຸມ​ໃຫຍ່​ ຄັ້ງ​ທີ X ຂອງ​ຕົນຂຶ້ນ ໃນ​ຕອນ​ເຊົ້າ​ຂອງ​ວັນ​ທີ 20 ມີນາ 2015, ທີ່​ຫ້ອງ​ປະຊຸມ​ໃຫຍ່ ກະຊວງ​ການ​ຕ່າງປະ​ເທດ, ​ພາຍ​ໃຕ້​ການ​ເປັນ​ປະ​ທານ​ຂອງ​ ສະຫາຍ ​ແສງ​ແກ້ວ ປວງ​ປະດິດ, ກຳມະການ​ສູນ​ກາງ​ຊາວ​ຫນຸ່ມ​ປະຊາຊົນ ປະຕິວັດ​ລາວ, ​ເລຂາ​ຄະນະ​ບໍລິຫານ​ງານ​ຊາວ​ຫນຸ່ມ ກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ, ​​​ໂດຍ​ການໃຫ້ກຽດ​ເຂົ້າ​ຮ່ວມ​ຂອງ ສະຫາຍ ນາງ ສູນ​ທອນ ​ໄຊ​ຍະ​ຈັກ, ກຳມະການ​ສູນ​ກາງ​ພັກ, ຮອງ​ເລຂາ​ຄະນະ​ພັກ​ກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ, ຮອງ​ຫົວໜ້າຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ, ລັດຖະມົນຕີ​ຊວຍ​ວ່າການ​ກະຊວງ​ການ​ຕ່າງປະ​ເທດ; ສະຫາຍ ດຣ. ວິ​ໄລ​ວົງ ບຸດ​ດາ​ຄຳ, ​ເລຂາ​ຄະນະ​ພັກ, ​ເລຂາ​ຄະນະ​ບໍລິຫານ​ງານ​ຊາວ​ຫນຸ່ມ ປະຊາຊົນ ປະຕິວັດ​ລາວ ; ມີ​ບັນດາ​ອົງການ​ຈັດ​ຕັ້ງ​ມະຫາຊົນ​ຂອງ​ກະຊວງ, ຄະນະ​ບໍລິຫານ​ງານ​ຊາວ​ຫນຸ່ມ, ສະມາຊິກຊາວ​ຫນຸ່ມ ​ແລະ ​ແຂກ​ຖືກ​ເຊີນ ​ເຂົ້າ​ຮ່ວມຢ່າງ​ພ້ອມພຽງ.

​ ກອງ​ປະຊຸມ​​ຄັ້ງ​ນີ້ ​ໄດ້​ໄຂ​ຂຶ້ນ​ໃນ​ທ່າມກາງ​ບັນຍາກາດ​ທີ່​ທົ່ວ​ພັກ, ທົ່ວ​ປວງ​ຊົນ​ທັງ​ຊາດ ພວມ​ອອກ​ແຮງ​ຕັ້ງຫນ້າ​ຜັນ​ຂະ​ຫຍາ​ຍມະຕິ​ກອງ​ປະຊຸມ​ໃຫຍ່ ຄັ້ງ​ທີ IX ຂອງ ​ພັກ​ປະຊາຊົນ ​ປະຕິວັດ​ລາວ; ຂຸ້ນຂ້ຽວ​ຈັດ​ຕັ້ງ​ປະຕິບັດ ມະຕິ​ກອງ​ປະຊຸມ​ໃຫຍ່ຜູ້​ແທນ​ຊາວ​ຫນຸ່ມ​ທົ່ວ​ປະ​ເທດ ຄັ້ງທີ VI  ​ແລະ ພ້ອມ​ກັນ​ກະກຽມ​ໃຫ້​ແກ່ການ​ດຳ​ເນີນ​ກອງ​ປະຊຸມໃຫຍ່ຜູ້​ແທນ​ຊາວ​ຫນຸ່ມ​ທົ່ວ​ປະ ​ເທດ ຄັ້ງທີ VII ​ແລະ ວັນ​ສຳຄັນ​ຕ່າງໆ​ຂອງ​ຊາດ ​ໃນ​ປີ 2015 ນີ້ ​ເຊັ່ນ: ວັນ​ສ້າງ​ຕັ້ງ​ພັກ​ປະຊາຊົນ ປະຕິວັດ​ລາວ ຄົບຮອບ 60 ປີ; ວັນ​ສະຖາ​ປະນາ ສປປ ລາວ ຄົບຮອບ 40 ປີ; ວັນ​ສະ​ເຫລີ​ມສະຫລອງ​ວັນ​ສ້າງ​ຕັ້ງ ຊາວ​ຫນຸ່ມ​ປະຊາຊົນ ປະຕິວັດ​ລາວ ຄົບຮອບ 60 ປີ ​ແລະ ສຳລັບຂະ​ແຫນງ​ການ​ຕ່າງປະ​ເທດ ​ແມ່ນ​ການສະ​ເຫລີ​ມສະຫລອງ​ວັນ​ການ​ທູດ​ລາວ ຄົບຮອບ 70 ປີ ຢ່າງ​ເປັນ​ຂະ​ບວນຟົດ​ຟື້ນ. ກອງ​ປະຊຸມ​ໄດ້​ຮັບ​ຟັງ​ບົດ​ລາຍ​ງານ​ການ​ເມືອງ​ຂອງ​ການຈັດ​ຕັ້ງ​ ປະຕິບັດວຽກງານ​ຊາວ​ຫນຸ່ມ   ​ໃນ​ໄລຍະ​ຜ່ານ​ມາ ​ແລະ ວາງ​ແຜນ​ການທິດ​ທາງ​ໃນຕໍ່ໜ້າ ຈາກ ສະຫາຍ ອານຸພາບ ວົງ​ຫນໍ່​ແກ້ວ, ຮອງ​ເລຂາ​ຄະນະ​ບໍລິຫານ​ງານ​ຊາວ​ຫນຸ່ມ ກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ,  ​ໂດຍ​ສະຫາຍ​ໄດ້​ຍົກ​ໃຫ້​ເຫັນ​ຈຸດ​ດີ, ຂໍ້ຄົງຄ້າງ, ບາງ​ບົດຮຽນທີ່​ຖອດ​ຖອນ​ໄດ້ ​ແລະ ຜົນງານ​ດ້ານ​ຕ່າງໆທີ່​ຄະນະ​ບໍລິຫານ​ງານ​ຊາວໜຸ່ມກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ​ ຍາດ​ມາ​ໄດ້. ປັດຈຸບັນ, ຄະນະ​ບໍລິຫານ​ງານ​ຊາວໜຸ່ມ ກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ມີ​ທັງໝົດ 20 ຫນ່ວຍ, ມີ​ສະມາຊິກ​ທັງ​ຫມົດ 534 ສະຫາຍ, ຍິງ 194 ສະຫາຍ;  ​ມີ​ຫນ່ວຍ​ຊາວ​ຫນຸ່ມ​ປະຈຳສະຖານທູດ ​ແລະ ສຳນັກງານ​ຜູ້​ຕາງໜ້າ ສປປ ລາວ ທີ່ຕ່າງປະ​ເທດ 33 ຫນ່ວຍ, ມີ​ສະມາຊິກ​ທັງ​ຫມົດ 4.000 ກວ່າ​ສະຫາຍ, ​ໃນ​ນັ້ນ​ລວມມີ​ນັກ​ສຶກສາລາ​ວທີ່​ກຳລັງ​ສຶກສາ​ຢູ່​ຕ່າງປະ​ເທດ. ​ຄະນະ​ບໍລິຫານ​ງານ​ຊາວໜຸ່ມ ໄດ້​ຖື​ເອົາ​ວຽກງານ​ໂຄສະນາ​ສຶກສາ​ອົບຮົມ​ວຽກງານການ​ເມືອງ-ແນວ​ຄິດ​ໃຫ້​ແກ່​ ສະມາຊິກ​ຊາວໜຸ່ມ​ຂອງ​ຕົນ ​ ​​ເຊື່ອມ​ຊຶມ​ແນວທາງ​ນະ​ໂຍບາຍຂອງ​ພັກ, ກົດໝາຍຂອງລັດ, ​ກຳ​ໄດ້​ແນວທາງ​ນະ​ໂຍບາຍ​ການ​ຕ່າງປະ​ເທດ ຂອງ ສປປ ລາວ. ​ໄດ້​ມີ​ການ​ເຄື່ອນ​ໄຫວ​ວຽກງານ​ຊາວໜຸ່ມ ​ໂດຍ​ຖື​ເອົາ​ຂໍ​ແຂ່ງຂັນ 4 ບຸກ ທີ່​ຄະນະ​ບໍລິຫານ​ງານ ສູນ​ກາງຊາວໜຸ່ມປະຊາຊົນ​ ປະຕິວັດ​ລາວ ​ວາງ​ອອກ​ໃນ​ການຈັດ​ຕັ້ງ​ປະຕິບັດ​ໂດຍ​ຕິດ​ພັນ​ກັບ​ວຽກງານ​ວິຊາ​ສະ​ເພາະ​ຂອງ​ ຕົນ.

ກອງ​ປະຊຸມ​ຍັງ​ໄດ້​ປ່ອນ​ບັດ​ຄັດ​ເລືອ​ກເອົາຄະນະບໍລິຫານ​ງານ​ຊາວໝຸ່ມຊຸດໃໝ່, ຊຶ່ງ​ມີ​ຜູ້​ສະມັກທັງໝົດ 20 ສະຫາຍ, ຍິງ 6 ສະຫາຍ, ​ເລືອກ​ເອົາ 15 ສະຫາຍ. ກອງ​ປະຊຸມ​ຄັ້ງ​ປະຖົມມະລຶກໄດ້​ເປັນ​ເອກະ​ສັນ​ເລືອກ​ເອົາ ​ສະຫາຍ ອານຸພາບ ວົງ​ຫນໍ່​ແກ້ວ ​ເປັນ​ເລຂາ; ສະຫາຍ ຄໍາ​ພອນ ວົງ​ສັນຕິ ເປັນ​ຮອງ​​ເລຂາ​ຜູ້​ທີ 1, ສະຫາຍ ດວງ​ມະນີ ຍອດ​ສີ​ອຸ ດົມ, ​ເປັນ​ຮອງ​​ເລຂາ​ຜູ້​ທີ 2 ​ແລະ ສະຫາຍ ນາງ ວິ​ດາວ​ອນ ​ແກ້ວ​ບຸນ​ຄົງ  ​ເປັນ​ຮອງ​​ເລຂາ​ຜູ້​ທີ 3 ເພື່ອ​ສືບຕໍ່ຊີ້ນຳ-ນຳພາ​ວຽກງານ​ການຈັດ​​ຕັ້ງ​ປະຕິບັດ​ຕາມ​ມະຕິ​ກອງ​ປະຊຸມ​ ໃຫຍ່​ ຄັ້ງ​ທີ X ​ຂອງ​ຄະນະ​ບໍລິ​ຫານ​ງານ​ຊາວໜຸ່ມກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກໃຫ້​ປະກົດ​ຜົນ​ເປັນ​ຈິງ.

​ ໃນ​ກອງ​ປະຊຸມຜູ້​ແທນ​ຍັງ​ໄດ້​ຮັບ​ຟັງ​ການ​ໂອ້​ລົມ​ຂອງ​ ສະຫາຍ ນາງ ສູນ​ທອນ ​ໄຊ​ຍະ​ຈັກ ​ແລະ ສະຫາຍ ດຣ. ວິ​ໄລ​ວົງ ບຸດ​ດາລາ ຊຶ່ງ​ໄດ້​ຍ້ອງຍໍ​ຊົມ​ເຊີຍ​ຜົນງານ​ອັນ​ໃຫຍ່ຫຼວງທີ່ຄະນະ​ບໍລິຫານ​ງານ​ ຊາວໜຸ່ມກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​​ເທດ​ສູນ​ກາງ​ພັກ ຍາດ​ມາ​ໄດ້​ໃນ​ໄລຍະ​ຜ່ານ​ມາ ​ແລະ ​ໄດ້​ເນັ້ນ​ໃຫ້​ຊາວໜຸ່ມທຸກ​ຂັ້ນຈົ່ງ​ຊ່ວຍ​ກັນ​ແກ້​ໄຂ​ບັນດາ​ຂໍ້ຄົງຄ້າງ, ປະຕິບັດ​ຂໍ້​ແຂ່ງຂັນ​ 4 ບຸກ ຂອງ​ ສູນ​ການ​ງຊາວໜຸ່ມວາງ​ອອກ ​ຕິດ​ພັນ​ກັບ​ວຽກງານ​ຂອງ​ຕົນ​ໃຫ້​ແທດ​ເໝາະ ​​ແນ​ໃສ່​ເຮັດ​ໃຫ້​ສະມາຊິກ​ຊາວໜຸ່ມພາຍ​ໃນ​ກະຊວງ​ການ​ຕ່າງປະ​ເທດ ​ແລະ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ມີ​ຄວາມ​ເຂົ້າ​ໃຈ​ແຈ້ງ​ຕໍ່​ແນວທາງ​ຂອງ​ພັກ ​ແລະ ກົດ​ລະບຽບຂອງ​ລັດ ກໍ​ຄື​ແນວທາງ​ນະ​ໂຍບາຍ​ການ​ຕ່າງປະ​ເທດ​ຂອງ​ພັກ​ເຮົາ.