ເພື່ອປະກອບສ່ວນໃນການໃຫ້ການຊ່ວຍເຫລືອຈໍາເປັນຮີບດ່ວນໃຫ້ແກ່​ປະຊາຊົນ​ທີ່​ໄດ້​ຮັບ​ຜົນ​ກະທົບຈາກສະພາບ​ອາກາດ​ຫນາວ​ເຢັນ ​ຢູ່ບັນດາ​ແຂວງ​ຕ່າງໆ​ ຢູ່ ພາກເຫນືອ ຂອງ ສປປ ລາວ ​ໃນ​​ໄລຍະ 1 ອາທິດ​ທີ່​ຜ່ານ​ມາ, ເຊິ່ງໄດ້​ສ້າງ​ຜົນກະທົບຕໍ່ຊີວິດການເປັນຢູ່, ການປູກຝັງ ​ແລະ ສັດລ້ຽງຂອງ​ປະຊາຊົນ, ​ໃນ​ວັນ​ທີ 26 ມັງກອນ 2016 ທີ່​ຜ່ານ​ມາ, ໂດຍໄດ້ຮັບການຊີ້ນໍາ ຈາກຄະນະ​ພັກ-ຄະນະ​ນຳ​ກະຊວງ​, ສາມອົງການຈັດຕັ້ງມະຫາຊົນ ຂອງ ​ກະຊວງ​ການ​ຕ່າງປະ​ເທດ ໄດ້ພ້ອມກັນປຸກ ລະດົມ​ຂົນຂວາຍການປະກອບສ່ວນແບບຮີບດ່ວນເປັນວັດຖຸ ແລະ ປັດໃຈ ຈາກ​ບັນດາ​ພະນັກງານ​ພາຍ​ໃນ​ກະຊວງ​ການ​ຕ່າງປະ​ເທດ ​ແລະ ຈາກ​ບັນດາ​ສຳນັກງານ​ການ​ທູດ ລາວ ທີ່ ປະຈຳ​ຢູ່​ຕ່າງປະ​ເທດ ​ເພື່ອ​ນຳ​ໄປ​ຊ່ວຍ​ເຫລືອ​ຜູ້​ໄດ້​ຮັບ​ຜົນ​ກະທົບ​ອາກາດ​ຫນາວ​ເຢັນ​ຢູ່​ແຂວງ​ຫົວພັນ. ເຄື່ອງ​ຊ່ວຍ​ເຫລືອ​ດັ່ງກ່າວ​ປະກອບມີ ຜ້າ​ຫົ່ມ, ​ເຄື່ອງຫນຸ່ງຫົ່ມກັນ​ໜາວ, ອາຫານແຫ້ງ ​ແລະ ​ເຄື່ອງ​ໃຊ້​ທີ່ຈໍາເປັນຈຳນວນ​ຫນຶ່ງ, ລວມມູນ​ຄ່າ​ຫລາຍກວ່າ 30 ລ້ານ​ກີບ ໂດຍມອບຜ່ານມູນ​ນິທິ​ຊ່ວຍ​ເຫລືອ​ຄົນ​ທຸກ​ຍາກ​ ແຫ່ງ ສປປ ລາວ ເພື່ອຊ່ວຍຂົນສົ່ງ​ໂດຍ​ບໍ່​ຄິດ​ຄ່າ ​ນຳ​ໄປ​ມອບ​ຕໍ່​ໃຫ້ແກ່ ຄະນະ​ບໍລິຫານ​ງານ​ຊາວ​ຫນຸ່ມ​ແຂວງ​ຫົວພັນ ​ເພື່ອນໍາໄປ​ແຈກ​ຢາຍ​ໃຫ້​ປະຊາຊົນ​ຜູ້​ທີ່​ໄດ້​ຮັບ​ຜົນ​ກະທົບ​ ຢູ່ແຂວງດັ່ງກ່າວໃນ​ເບື້ອງ​ຕົ້ນ. ເນື່ອງຈາກສະພາບອາກາດທີ່ປ່ຽນແປງຢ່າງກະທັນຫັນໃນຕົ້ນປີນີ້ ອາດຍັງສືບຕໍ່ສ້າງຜົນກະທົບໃຫ້ແກ່ປະຊາຊົນຢູ່ບັນດາແຂວງ ຂອງ ສປປ ລາວ, ສາມອົງການຈັດຕັ້ງມະຫາຊົນ ຂອງກະຊວງ​ການ​ຕ່າງປະ​ເທດ ຍັງ​ຈະ​ສືບ​ຕໍ່​ລະດົມ​ການຊ່ວຍ​ເຫລືອ ເພື່ອນໍາໄປມອບຕໍ່ໃຫ້​ແຂວງ​ອື່ນໆ​ທີ່​ໄດ້​ຮັບ​ຜົນ​ກະທົບ​ຈາກ​ໄພ​ໜາວ​ໃນ​ຄັ້ງ​ນີ້.