ນະຄອນຫຼວງວຽງຈັນ, ວັນທີ 31 ກໍລະກົດ 2017

ພະນະທ່ານ ນ. ໂດຣິສ ເລີທາ

ປະທານາທິບໍດີ ແຫ່ງ ສະມາພັນທະລັດ ສະວິສ໌

ທີ່ ເບີນ         

          ພະນະ​ທ່ານ​,

ເນື່ອງໃນ​ໂອ​ກາດ​ວັນ​ຊາດແຫ່ງ ສະມາພັນທະລັດ ສະວິສ໌, ໃນ​ນາມ​ປະ​ຊາ​ຊົນ​ລາວແລະໃນ​ນາມ​ສ່ວນ​ຕົວ,ຂ້າ​ພະເຈົ້າຂໍຖືເປັນກຽດສົ່ງ​ຄຳ​ຊົມ​ເຊີຍ​ອັນ​ອົບ​ອຸ່ນແລະພອນ​ໄຊ​ອັນ​ປະ​ເສີດ​ ມາ​ຍັງ​ພະນະທ່ານ ແລະ ຜ່ານ ພະນະທ່ານ ໄປຍັງ ປະຊາຊົນ ສະວິສ໌ ທຸກຖ້ວນໜ້າ ຈົ່ງ​ມີ​ພະ​ລາ​ນາ​ໄມ​ສົມ​ບູນ, ມີ​​ຄວາມ​ຜາ​ສຸກແລະຄວາມຈະເລີນ​ວັດ​ທະ​ນາ​.

ຂ້າ​ພະ​ເຈົ້າເຊື່ອ​ໝັ້ນ​ວ່າສາຍ​ພົວ​ພັນ​ມິດ​ຕະ​ພາບແລະການ​ຮ່ວມ​ມື ທີ່ດີ​ ລະ​ຫວ່າງສາທາ​ລະ​ນະ​ລັດປະ​ຊາ​ທິ​ປະ​ໄຕປະ​ຊາ​ຊົນ​ລາວແລະ ສະມາພັນທະລັດ ສະວິສ໌ ຈະສືບຕໍ່​ໄດ້​ຮັບ​ການ​​ເສີມຂະຫຍາຍຢ່າງບໍ່ຢຸດຢັ້ງເພື່ອ​ຜົນ​ປະ​ໂຫຍດ​ຂອງ​ປະຊາຊົນທັງສອງ​ຊາດ​ພວກ​ເຮົາກໍຄື​ເພື່ອ​ສັນຕິພາບ, ແລະ ການ​ຮ່ວມ​ມື​ເພື່ອການພັດທະນາ.

ດ້ວຍຄວາມນັບຖືຢ່າງສູງ​.

                                           ບຸນ​ຍັງວໍ​ລະ​ຈິດ,

ປະທານປະເທດແຫ່ງ

ສາ​ທາ​ລະ​ນະ​ລັດປະ​ຊາ​ທິ​ປະ​ໄຕປະ​ຊາ​ຊົນ​ລາວ

ພະນະທ່ານ ດີດຽກ ບຸກຮານເທີ້

ລັດຖະມົນຕີຕ່າງປະເທດ ແຫ່ງ ສະມາພັນທະລັດສະວິສ໌

ທີ່ ເບີນ

ພະນະ​ທ່ານ​,

ເນື່ອງໃນ​ໂອ​ກາດ​ວັນ​ຊາດແຫ່ງ ສະມາພັນທະລັດ ສະວິສ໌,ຂ້າ​ພະເຈົ້າມີ​ຄວາມ​​ຍິນ​ດີ​ເປັນ​ຢ່າງ​ຍິ່ງຂໍສົ່ງ​ຄຳ​ຊົມ​ເຊີຍ​ອັນ​ອົບ​ອຸ່ນແລະພອນ​ໄຊ​ອັນ​ປະ​ເສີດ​ ມາ​ຍັງ​ພະນະທ່ານຈົ່ງ​ມີ​ພະ​ລາ​ນາ​ໄມ​ສົມ​ບູນ ປະສົບຜົນສຳເລັດທຸກປະການໃນໜ້າທີ່ອັນສູງສົ່ງຂອງຕົນ.

ຂ້າ​ພະ​ເຈົ້າເຊື່ອ​ໝັ້ນ​ວ່າສາຍ​ພົວ​ພັນ​ມິດ​ຕະ​ພາບແລະການ​ຮ່ວມ​ມື ທີ່ດີ​ລະ​ຫວ່າງ ສອງ​ກະຊວງ​ພວກ​ເຮົາ, ທັງໃນຂອບສອງຝ່າຍ ແລະ ຫຼາຍຝ່າຍ ຈະສືບຕໍ່​ເສີມຂະຫຍາຍ ແລະ ເກີດດອກອອກຜົນຍິ່ງຂຶ້ນ ເພື່ອ​ຜົນ​ປະ​ໂຫຍດ​ຂອງ​ປະຊາຊົນທັງສອງ​ຊາດ​ພວກ​ເຮົາກໍຄື​ເພື່ອ​ສັນຕິພາບໂລກ, ມິດຕະພາບ ແລະ ການ​ຮ່ວມ​ມືສາກົນ​ເພື່ອການພັດທະນາແບບຍືນຍົງ.

                                            ດ້ວຍຄວາມນັບຖືຢ່າງສູງ.            

ສະເຫຼີມໄຊ ກົມມະສິດ,

ລັດຖະມົນຕີກະຊວງການຕ່າງປະເທດ

ແຫ່ງສາ​ທາ​ລະ​ນະ​ລັດປະ​ຊາ​ທິ​ປະ​ໄຕປະ​ຊາ​ຊົນ​ລາວ