ນະ​ຄອນ​ຫຼວງວຽງ​ຈັນ, ວັນ​ທີ 17 ສິງຫາ2017

ພະ​ນະ​ທ່ານ,

          ໃນນາມປະຊາຊົນ ແຫ່ງ ສປປ ລາວ ກໍຄື ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມຊົມເຊີຍອັນອົບອຸ່ນ ແລະ ພອນໄຊອັນປະເສີດ ມາຍັງ ພະນະທ່ານ ແລະ ປະຊາຊົນ ແຫ່ງ ສາທາລະນະລັດ ອິນໂດເນເຊຍ ເນື່ອງໃນໂອກາດວັນປະກາດເອກະລາດ ແຫ່ງ ສາທາລະນະລັດ ອິນໂດເນເຊຍ ຄົບຮອບ 72ປີ.

ຂ້າ​ພະ​ເຈົ້າ ມີຄວາມຮູ້ສຶກປີຕິຍິນດີເປັນຢ່າງຍິ່ງ ຕໍ່ການຮ່ວມມືທີ່ມີໝາກມີຜົນ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ອິນໂດເນເຊຍ ຕະຫລອດໄລຍະ 6 ທົດສະຫວັດທີ່ຜ່ານມາ ແລະ ເຊື່ອໝັ້ນວ່າ ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ດີງາມ ລະຫວ່າງ ສອງປະເທດພວກເຮົາ ຈະສືບຕໍ່ໄດ້ຮັບການຮັດແໜ້ນ ແລະ ພັດທະນາຍິ່ງໆຂື້ນ ໃນຊຸມປີຕໍ່ໜ້າ ທັງໃນຂອບສອງຝ່າຍ ແລະ ຫລາຍຝ່າຍ ເພື່ອຜົນປະໂຫຍດ ຮ່ວມກັນຂອງປະຊາຊົນ ສອງຊາດ ລາວ ແລະ ອິນໂດເນເຊຍ ກໍ່ຄື ເພື່ອສັນຕິພາບ, ສາຖຽນລະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.

          ຂ້າ​ພະ​ເຈົ້າ ຂໍຖືໂອກາດນີ້ອວຍ​ພອນ​ໄຊ​​ແດ່ ພະ​ນະ​ທ່ານ ​ຈົ່ງມີ​ສຸ​ຂະ​ພາບ​ເຂັ້ມ​ແຂງ, ມີ​ຄວາມ​ຜາ​ສຸກ ແລະ ປະ​ສົບ​ຜົນ​ສຳ​ເລັດ​ໃນ​ໜ້າ​ທີ່ ​ອັນ​ສູງ​ສົ່ງ​ຂອງ ​ພະ​ນະ​ທ່ານ.

          ດ້ວຍ​ຄວາມ​ນັບ​ຖື​ຢ່າງ​ສູງ.

                                                                                                   ບຸນຍັງ ວໍລະຈິດ

ພະນະທ່ານ ໂຈ​ໂກວີໂດ​ໂດ, ປະ​ທາ​ນາ​ທິ​ບໍ​ດີ

ແຫ່ງ ສາທາລະນະລັດ ອິນໂດເນເຊຍ

ທີ່ ນະຄອນຫລວງຈາກາກຕາ

ພະ​ນະ​ທ່ານ,

            ເນື່ອງໃນໂອກາດວັນປະກາດເອກະລາດ ແຫ່ງ ສາທາລະນະລັດ ອິນໂດເນເຊຍ ຄົບຮອບ 72 ປີ, ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄື ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມຊົມເຊີຍຢ່າງຈິງໃຈ ແລະ ພອນໄຊອັນປະເສີດ ມາຍັງ ພະນະທ່ານ ແລະ ປະຊາຊົນ ແຫ່ງ ສາທາລະນະລັດ ອິນໂດເນເຊຍ ເພື່ອນມິດທຸກຖ້ວນຫນ້າ.

            ຂ້າພະເຈົ້າມີຄວາມພູມໃຈເປັນຢ່າງຍິ່ງທີ່ເຫັນວ່າ ໃນຊຸມປີຜ່ານມາ, ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ອິນໂດເນເຊຍ ໄດ້ເສີມຂະຫຍາຍການພົວພັນມິດຕະພາບ ແລະ ຮ່ວມມືທີ່ດີໃນປະຈຸບັນ ທັງໃນຂອບສອງຝ່າຍ ແລະ ຫລາຍຝ່າຍ. ຂ້າພະເຈົ້າຫວັງເປັນຢ່າງຍິ່ງວ່າ ຈະໄດ້ຮ່ວມເຮັດວຽກກັບພະນະທ່ານ ຢ່າງໃກ້ຊິດໃນໂອກາດຢ້ຽມຢາມທາງການປະເທດອິນໂດເນເຊຍ ຂອງ ຂ້າພະເຈົ້າໃນອະນາຄົດອັນໃກ້ ເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມືທີ່ດີງາມ ທີ່ ມີມາດົນນານແລ້ວນັ້ນ ໃຫ້ມີການພັດທະນາ ແລະ ແຕກດອກອອກຜົນຍິ່ງໆຂື້ນ ໃນຊຸມປີຕໍ່ໜ້າ ເພື່ອນຳເອົາເອົາຜົນປະໂຫຍດຕົວຈິງ ມາສູ່ສອງປະເທດ ແລະ ປະຊາຊົນສອງຊາດພວກເຮົາ ກໍຄືສັນຕິພາບ, ສະຖຽນລະພາບ ແລະ ການຮ່ວມມືພັດທະນາໃນພາກພື້ນ ແລະ ໃນໂລກ.

            ຂ້າ​ພະ​ເຈົ້າ ຂໍຖືໂອກາດອັນສະຫງ່າລາສີ ແລະ ມີຄວາມໝາຍສຳຄັນນີ້ ​ອວຍ​ພອນ​ໃຫ້ ພະ​ນະ​ທ່ານ ຈົ່ງ​ມີ​ສຸ​ຂະ​ພາບ​ເຂັ້ມ​ແຂງ, ມີ​ຄວາມ​ຜາ​ສຸກ ແລະ ປະ​ສົບ​ຜົນ​ສຳ​ເລັດ​ໃນ​ໜ້າ​ທີ່​ອັນມີ​ກຽດ​ສູງ​ສົ່ງ​ ຂອງ ​ພະ​ນະ​ທ່ານ ແລະ ນຳ​ພາ​ປະ​ຊາ​ຊົນ ອິນໂດເນເຊຍ ​ສືບ​ຕໍ່​ພັດ​ທະ​ນາ​ປະ​ເທດ ​ໃຫ້ມີ​ຄວາມ​ກ້າວ​ໜ້າ ແລະ ຈະ​ເລີນ​ຮຸ່ງ​ເຮືອງ​ຍິ່ງໆ​ຂຶ້ນ.

            ດ້ວຍ​ຄວາມ​ນັບ​ຖື​ຢ່າງ​ສູງ.

   ທອງລຸນ ສີສຸລິດ

ພະນະທ່ານ ໂຈ​ໂກວີໂດ​ໂດ, ປະ​ທາ​ນາ​ທິ​ບໍ​ດີ

ແຫ່ງ ສາທາລະນະລັດ ອິນໂດເນເຊຍ

ທີ່ ນະຄອນຫລວງຈາກາກຕາ