ອີງຕາມການເຊື້ອເຊີນຂອງທາງການລາວ, ທ່ານ ນາງ ມາດເດິບົວ ບຸກກິກຽວ (Maud de Boer-Buquicchio), ຜູ້ລາຍງານພິເສດຂອງອົງການສະຫະປະຊາຊາດ ກ່ຽວກັບ ການຄ້າຂາຍ ແລະ ການກົດຂີ່ຂູດຮີດເດັກນ້ອຍ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 8 ຫາ 16 ພະຈິກ 2017 ເພື່ອເກັບກຳແລກປ່ຽນຂໍ້ມູນນຳທັງພາກລັດ ແລະ ເອກະຊົນ ກ່ຽວກັບ ສະພາບການປະຕິບັດນະໂຍບາຍ ແລະ ມາດຕະການຕ່າງໆ ເພື່ອຊ່ວຍເຫລືອ ແລະ ປົກປ້ອງເດັກນ້ອຍ ທີ່ຕົກເປັນເຫຍື່ອ ຫລື ມີຄວາມສ່ຽງຈາກການຖືກກົດຂີ່ຂູດຮີດທາງເພດ, ແຮງງານ ແລະ ການໃຊ້ຄວາມຮຸນແຮງອື່ນໆຢູ່ ສປປ ລາວ ເພື່ອພິຈາລະນາເອົາເຂົ້າໃນບົດລາຍງານຕໍ່ສະພາສິດທິມະນິດ ສປຊ ຕໍ່ໄປ ພາຍຫລັງທີ່ ສປປ ລາວ ໄດ້ ເຂົ້າເປັນພາຄີສົນທິສັນຍາສາກົນວ່າດ້ວຍສິດທິເດັກ ນັບແຕ່ປີ 1991 ເປັນຕົ້ນມາ.
ໃນການຢ້ຽມຢາມເຮັດວຽກມື້ທຳອິດ, ທ່ານນາງ ມາດເດິບົວ ບຸກກິກຽວ ໄດ້ຮັບກຽດເຂົ້າຢ້ຽມຂໍ່ານັບທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ທັງເປັນປະທານຄະນະກຳມາທິການແຫ່ງຊາດ ເພື່ອຄວາມກ້າວຫນ້າຂອງແມ່ຍິງ ແລະ ແມ່-ເດັກ ເພື່ອແນະນຳຕົວ ແລະ ສະເຫນີຈຸດປະສົງໃນການເດີນທາງມາ ສປປ ລາວ ໃນຄັ້ງນີ້.
ໃນການພົບປະສົນທະນາຄັ້ງນີ້, ທ່ານຮອງນາຍົກລັດຖະມົນຕີ ໄດ້ອະທິບາຍໃຫ້ຜູ້ລາຍງານພິເສດ ສປຊ ຊາບເຖິງນະໂຍບາຍ ແລະ ຄວາມເອົາໃຈໃສ່ຂອງລັດຖະບານໃນການຈັດຕັ້ງປະຕິບັດສິດພັນທະຂອງຕົນ ໃນຖານະທີ່ເປັນລັດພາຄີຂອງຫລາຍສົນທິສັນຍາສິດທິມະນຸດສາກົນ, ເຊິ່ງກໍລວມທັງສົນທິສັນຍາກ່ຽວກັບການປົກປ້ອງແມ່ຍິງ ແລະ ເດັກນ້ອຍ ໂດຍໄດ້ມີການສ້າງໃຫມ່ ແລະ ປັບປຸງດ້ານນິຕິກຳຫລາຍສະບັບ, ໄດ້ສ້າງຕັ້ງອົງການຮັບຜິດຊອບທັງພາກລັດ ແລະ ພາກສັງຄົມຂຶ້ນ ເພື່ອປົກປ້ອງ ແລະ ຮັບປະກັນສິດທິຂອງເດັກນ້ອຍລາວໃນທົ່ວປະເທດ.
ໃນວັນດຽວກັນນີ້, ຜູ້ລາຍງານພິເສດດ້ານສິດທິມະນຸດ ສປຊ ຍັງໄດ້ພົບປະເຮັດວຽກກັບກະຊວງການຕ່າງປະເທດ, ກະຊວງ ຖວທ ແລະ ຫນ່ວຍງານອື່ນໆທີ່ກ່ຽວຂ້ອງຂອງທາງການລາວ.
ນອກນັ້ນ, ໃນໄລຍະຢ້ຽມຢາມທາງການຢູ່ ສປປ ລາວ, ທ່ານນາງ ມາດເດິບົວ ບຸກກິກຽວ ຍັງມີແຜນພົບປະເຮັດວຽກກັບ ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ກະຊວງ ປກສ, ກະຊວງແຮງງານ ແລະ ສະຫວັດດິການ, ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ, ສະພາແຫ່ງຊາດ, ສູນກາງຊາວຫນຸ່ມປະຊາຊົນປະຕິວັດລາວ, ສູນໃຫ້ການຊ່ວຍເຫລືອ ແລະ ປົກປ້ອງແມ່ຍິງ ແລະ ເດັກນ້ອຍ ແລະບ່ອນອື່ນໆ ທີ່ລວມທັງອົງການຈັດຕັ້ງສາກົນ ແລະ ອົງການທີ່ບໍ່ຂຶ້ນກັບລັດຖະບານຕ່າງປະເທດ.
ຕາມແຜນການຢ້ຽມຢາມຄັ້ງນີ້, ຜູ້ລາຍງານພິເສດ ສປຊ ຍັງຈະໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ອຸດົມໄຊ, ຈຳປາສັກ ແລະ ສາລະວັນ ເພື່ອຢ້ຽມຢາມສູນຝຶກອົບຮົມ ແລະ ຟື້ນຟູເດັກນ້ອຍ, ພົບປະຫາລື ແລະ ແລກປ່ຽນຂໍ້ມູນຕ່າງໆນຳເຈົ້າໜ້າທີ່ ແລະ ປະຊາຊົນທ້ອງຖິ່ນຂອງລາວເຮົາຕື່ມອີກ.