ນະຄອນຫຼວງວຽງຈັນ, ວັນທີ 01 ທັນວາ 2017
ພະນະທ່ານ ດອນ ປຣະມັດວິໄນ
ລັດຖະມົນຕີກະຊວງການຕ່າງປະເທດ ແຫ່ງ ຣາຊະອານາຈັກໄທ,
ພະນະທ່ານ,
ຂ້າພະເຈົ້າ ມີຄວາມຮູ້ສຶກໂສກເສົ້າເສຍໃຈເປັນຢ່າງຍິ່ງ ເມື່ອໄດ້ຊາບຂ່າວກ່ຽວກັບ ການຈາກໄປແບບກະທັນຫັນຂອງ ທ່ານ ດຣ. ສຸຣິນ ພິດສຸວັນ, ອະດີດລັດຖະມົນຕີວ່າການກະຊວງການຕ່າງປະເທດ ແຫ່ງ ຣາຊະອນາຈັກໄທ ແລະ ອະດີດເລຂາທິການໃຫຍ່ອາຊຽນ, ເມື່ອວັນທີ 30 ພະຈິກ 2017 ຜ່ານມາ. ທ່ານ ດຣ. ສຸຣິນ ພິດສຸວັນ ເປັນບຸກຄົນທີ່ມີບົດບາດສູງທາງດ້ານການເມືອງ, ການທູດ ແລະ ເປັນຜູ້ທີ່ມີປະສົບການສູງ ໃນເວທີການເມືອງໄທ ແລະ ພາກພື້ນອາຊຽນ ເຊິ່ງການຈາກໄປຂອງທ່ານໃນຄັ້ງນີ້ ຖືເປັນການສູນເສຍບຸກຄົນທີ່ສຳຄັນໃນຂົງເຂດວຽກງານຕ່າງປະເທດຂອງໄທ, ອາຊຽນ ແລະ ສາກົນ.
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄວາມອາໄລອາວອນຢ່າງສຸດຊຶ້ງ ມາຍັງທ່ານ ແລະ ຜ່ານທ່ານໄປຍັງຄອບຄົວ ແລະ ຍາດພີ່ນ້ອງຂອງ ທ່ານ ດຣ. ສຸຣິນ ພິດສຸວັນ ນະໂອກາດນີ້ດ້ວຍ.
ຂໍໃຫ້ດວງວິນຍານຂອງ ທ່ານ ດຣ. ສຸຣິນ ພິສຸວັນ ຈົ່ງໄປສູ່ສຸກຂະຕິເທິ້ນ.
ສະເຫຼີມໄຊ ກົມມະສິດ
ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ