ເນື່ອງໃນໂອກາດ ສະເຫຼີມສະຫຼອງສັບປະດາ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ແລະ ວັນສ້າງຕັ້ງຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 2 ປີ, ວັນທີ 23 ມີນາ 2018 ນີ້, ໃນນາມລັດຖະບານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມຊົມເຊີຍ ຢ່າງຈິງໃຈ ແລະ ສົ່ງຄຳອວຍພອນໄຊອັນປະເສີດ ມາຍັງການນໍາ ແລະ ປະຊາຊົນບັນດາປະເທດສະມາຊິກ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ກໍຄືປະຊາຊົນລາວທຸກຖ້ວນໜ້າ.
ນັບແຕ່ການສ້າງຕັ້ງຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຂື້ນມາໄດ້ 2 ປີ, ຂອບການຮ່ວມມືດັ່ງກ່າວ ໄດ້ກາຍເປັນອີກເວທີໜຶ່ງ ແຫ່ງການຮ່ວມມືກັນຂອງອະນຸພາກພື້ນອາຊີ ທີ່ມີຄວາມເຂັ້ມແຂງ ຊຶ່ງກວມເອົາສາມເສົ້າຄ້ຳຂອງການຮ່ວມມືຄື: ເສົາຄ້ຳດ້ານການເມືອງ-ຄວາມໝັ້ນຄົງ, ເສົາຄໍ້າດ້ານເສດຖະກິດ ແລະ ການພັດທະນາແບບຍືນຍົງ, ເສົາຄ້ຳດ້ານວັດທະນະທຳ-ສັງຄົມ ແລະ ການໄປມາຫາສູ່ ລະຫວ່າງ ປະຊາຊົນກັບປະຊາຊົນ ແລະ ມີ 5 ຂະແໜງການບູລິມະສິດ ຄື: ການເຊື່ອມຈອດ, ການສ້າງຂີດຄວາມສາມາດໃນການຜະລິດ, ເສດຖະກິດ-ການຄ້າ, ບໍລິຫານຊັບພະຍາກອນນໍ້າ, ແລະ ກະສິກຳ ແລະ ລືບລ້າງຄວາມທຸກຍາກ. ຢູ່ກອງປະຊຸມຜູ້ນໍາຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ທີ່ໄດ້ຈັດຂຶ້ນ ຢູ່ ພະນົມເປັນ, ກໍາປູເຈຍ, ໃນເດືອນມັງກອນ 2018 ທີ່ຜ່ານມາ ບັນດາຜູ້ນໍາປະເທດສະມາຊິກ ແມ່ນໍ້າຂອງ-ແມ່ນໍ້າລ້ານຊ້າງ ໄດ້ທົບທວນຄືນຄວາມຄືບໜ້າຂອງການຈັດຕັ້ງປະຕິບັດວຽກງານ ແລະ ບັນດາໂຄງການຮ່ວມມືຕ່າງໆ ພາຍໃຕ້ຖະແຫຼງການຊັນຢາ ທີ່ບັນດາຜູ້ນໍາໄດ້ຮັບຮອງເອົາຢູ່ໃນກອງປະຊຸມຜູ້ນໍາ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 1. ພ້ອມນີ້, ກອງປະຊຸມຜູ້ນໍາຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ກໍຍັງໄດ້ຮັບຮອງເອົາຖະແຫຼງການພະນົມເປັນ ເພື່ອສົ່ງເສີມການຮ່ວມມື, ສ້າງຄວາມຢູ່ດີກິນດີຂອງປະຊາຊົນໃນຂົງເຂດນີ້, ຮັດແຄບຄວາມແຕກໂຕນດ້ານການພັດທະນາ ລະຫວ່າງ ບັນດາປະເທດໃນພາກພື້ນ ແລະ ສະໜັບສະໜູນການສ້າງປະຊາຄົມອາຊຽນ ພ້ອມທັງ ສົ່ງເສີມການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ຂອງອົງການສະຫະປະຊາຊາດ ປີ 2030 ບົນພື້ນຖານການຮ່ວມມືແບບ ໃຕ້-ໃຕ້, ບັນດາຂໍ້ລິເລີ່ມຕ່າງໆຂອງ ໜຶ່ງແລວ-ໜຶ່ງເສັ້ນທາງ, 13 ຂໍ້ລິເລີ່ມຂອງ ສປ. ຈີນ, ແຜນປະຕິບັດງານ 5 ປີ ແມ່ນໍ້າຂອງ-ແມ່ນໍ້າລ້ານຊ້າງ ແລະ ບັນດາບົດຖະແຫລງຂ່າວຮ່ວມຂອງກອງປະຊຸມລັດຖະມົນຕີຕ່າງປະເທດ ຄັ້ງຜ່ານມາ.
ສປປ ລາວ ໄດ້ຮັບກຽດຮ່ວມກັບ ສປ ຈີນ ເປັນປະທານຮ່ວມຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ໃນປີ 2018-2020 ຈະສຶບຕໍ່ຮ່ວມກັບປະເທດສະມາຊິກ ປະກອບສ່ວນເຂົ້າໃນການຈັດຕັ້ງປະຕິບັດບັນດາໂຄງການ ແລະ ກິດຈະກຳຕ່າງໆ ຂອງຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຢ່າງຕັ້ງໜ້າ ແລະ ຕໍ່ເນື່ອງ ໂດຍສະເພາະ ສປປ ລາວ ຈະໄດ້ເປັນເຈົ້າພາບຈັດກອງປະຊຸມຜູ້ນໍາ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3, ກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 4 ແລະ ກອງປະຊຸມຕ່າງໆທີ່ກ່ຽວຂ້ອງ ໃນໄລຍະແຕ່ປີ 2018 ຫາ 2020.
ເນື່ອງໃນໂອກາດອັນສະຫງ່າລາສີນີ້, ຂ້າພະເຈົ້າຂໍສະແດງຄວາມຂອບໃຈມາຍັງບັນດາປະເທດແມ່ນໍ້າຂອງ ແລະ ສປ ຈີນ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອ ແລະ ຮ່ວມມືກັນ ເປັນຈິດໜຶ່ງໃຈດຽວ ເໝືອນດັ່ງ ຄໍາຂວັນ ກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 “ແມ່ນໍ້າແຫ່ງສັນຕິພາບຂອງພວກເຮົາ ແລະ ການພັດທະນາແບບຍືນຍົງ”. ສປປ ລາວ ໃນຖານະທີ່ເປັນສະມາຊິກ ແມ່ນໍ້າຂອງ-ແມ່ນໍ້າລ້ານຊ້າງ ຫວັງຢ່າງຍິ່ງວ່າ ສາຍພົວພັນ ແລະ ການຮ່ວມມືທີ່ດີງາມ ລະຫວ່າງ ປະເທດສະມາຊິກ ຈະຍິ່ງນັບມື້ນັບເພີ່ມທະວີຄວາມແໜ້ນແຟ້ນຂຶ້ນ ແລະ ກ້າວໄປສູ່ລະດັບໃໝ່ ທີ່ຍິ່ງໃຫຍ່ກວ່າເກົ່າ ເພື່ອຄວາມຢູ່ດີກິນດີ ແລະ ຈະເລີນວັດທະນາ ຂອງປະຊາຊົນ ໃນພາກພື້ນຂອງພວກເຮົາ.
ສະເຫຼີມໄຊ ກົມມະສິດ
ລັດຖະມົນຕີກະຊວງການຕ່າງປະເທດ