ດີລີ, 25 ກໍລະກົດ 2018
ພະນະທ່ານ,
ໃນນາມປະຊາຊົນ ແຫ່ງ ຕີມໍ-ເລສເຕ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສຍໃຈ ແລະ ແບ່ງເບົາຄວາມເຈັບປວດ ໂດຍສະເພາະຕໍ່ ຄອບຄົວທີ່ໄດ້ຮັບຜົນກະທົບຈາກໄພນໍ້າຖ້ວມ ທີ່ເກີດຈາກເຂື່ອນໄຟຟ້າ ເຊປຽນ-ເຊນໍ້ານ້ອຍ ແຕກ.
ດ້ວຍຄວາມນັບຖືຢ່າງສູງ,
ຟຣານຊິດສະໂກ ກຸເຕິເຣັດສ ລູ ໂອໂລ
ປະທານາທິບໍດີ
ພະນະທ່ານ ບຸນຍັງ ວໍລະຈິດ
ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ພະນະທ່ານ,
ຂ້າພະເຈົ້າ ຂໍສະແດງຄວາມຂອບໃຈ ສໍາລັບຄໍາຊົມເຊີຍຂອງພະນະທ່ານ ເນື່ອງໃນໂອກາດທີ່ຂ້າພະເຈົ້າ ເຂົ້າຮັບຕໍາແໜ່ງເປັນ ນາຍົກລັດຖະມົນຕີ ຂອງລັດຖະບານ ຊຸດທີ 8 ຂອງສາທາລະນະລັດ ປະຊາທິປະໄຕ ຕີມໍ-ເລສເຕ.
ພວກຂ້າພະເຈົ້າ ຮູ້ສຶກເປັນກຽດຢ່າງຍິ່ງ ທີ່ໄດ້ຮັບຄວາມໄວ້ວາງໃຈ, ການສະໜັບສະໜູນ ແລະ ການຮ່ວມມືທີ່ດີ ຈາກສາທາລະນະລັດ ປະຊາທິປະໄຕ ປະຊາຊົນລາວ ໃນການຈັດຕັ້ງປະຕິບັດແຜນດໍາເນີນງານ ແລະ ພັນທະສັນຍາຂອງລັດຖະບານຂອງພວກຂ້າພະເຈົ້າ ຕໍ່ປະຊາຊົນຕີມໍ-ເລສເຕ ແລະ ວົງຄະນາຍາດສາກົນ.
ພວກຂ້າພະເຈົ້າ ຮູ້ສຶກໂສກເສົ້າ ແລະ ເສຍໃຈເປັນຢ່າງຍິ່ງ ທີ່ໄດ້ຊາບຂ່າວເຫດການໄພພິບັດ ທີ່ ແຂວງອັດຕະປື ເຊິ່ງເຮັດໃຫ້ມີຜູ້ເສຍຊີວິດ ແລະ ຜູ້ສູນຫາຍຈໍານວນຫຼາຍ, ລວມທັງປະຊາຊົນທີ່ຖືກອົບພະຍົກ ແລະ ຍົກຍ້າຍໄປຢູ່ບ່ອນອື່ນ.
ພວກຂ້າພະເຈົ້າ ຂໍແບ່ງເບົາຄວາມທຸກໂສກກັບບັນດາຄອບຄົວຜູ້ໄດ້ຮັບຜົນກະທົບ ທັງໝົດ ແລະ ຕີມໍ-ເລສເຕ ໄດ້ອະນຸມັດການບໍລິຈາກຊ່ວຍເຫຼືອ ຜູ້ປະສົບເຄາະຮ້າຍ ແລະ ເພື່ອຊ່ວຍລັດຖະບານລາວ ຕໍ່ເຫດການໄພພິບັດທີ່ເກີດຂຶ້ນ ໂດຍຜ່ານຊ່ອງທາງການທູດ ໃນໄວໆນີ້.
ພວກຂ້າພະເຈົ້າ ຂໍສະແດງຄວາມຂອບໃຈ ສໍາລັບສາຍພົວພັນມິດຕະພາບແບບອ້າຍນ້ອງຂອງ ປະຊາຊົນລາວ ເຊິ່ງສະແດງອອກໃນການສະໜັບສະໜູນ ການເຂົ້າເປັນສະມາຊິກອາຊຽນຂອງຕີມໍ-ເລສເຕ ແລະ ການຮ່ວມມືສອງຝ່າຍທີ່ພວມເຕີບໃຫຍ່ຂະຫຍາຍຕົວ.
ຂ້າພະເຈົ້າ ຂໍຢໍ້າຄືນຄວາມມຸ່ງມາດປາຖະໜາ ໃນການສືບຕໍ່ຮັດແໜ້ນສາຍພົວພັນລະຫວ່າງສອງປະເທດພວກເຮົາ ໂດຍການສົ່ງເສີມສາຍພົວພັນ ທາງດ້ານການເມືອງ, ເສດຖະກິດ, ສັງຄົມ ແລະ ວັດທະນະທໍາ ເພື່ອສັນຕິພາບ, ການຮ່ວມມື ແລະ ການພັດທະນາຂອງພາກພື້ນອາຊີຕາເວັນອອກສ່ຽງໃຕ້ ແລະ ຂອງໂລກ.
ດ້ວຍຄວາມນັບຖື,
ຕາອູ ມາຕານ ຣູອັກ
ນາຍົກລັດຖະມົນຕີ
ພະນະທ່ານ ທອງລຸນ ສີສຸລິດ
ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ