ນະຄອນຫຼວງ​ວຽງ​ຈັນ, ວັນ​ທີ 03 ຕຸລາ 2018

ພະນະ​ທ່ານມູນ ແຈ ອິນ

ປະທານາທິບໍດີແຫ່ງສາທາລະນະ​ລັດ​ເກົາຫລີ

ທີ່​ເຊ​ອູ​ນ

ພະນະ​ທ່ານ,

          ​ເນື່ອງ​ໃນ​ໂອກາດ​ ສະ​ເຫຼີ​ມສະຫຼອງວັນຊາດ ​ສາທາລະນະ​ລັດ​ເກົາຫລີ, ໃນນາມປະຊາຊົນ​ລາວທຸກ​ຖ້ວນໜ້າ ​ແລະໃນ​ນາມ​ສ່ວນ​ຕົວ, ຂ້າພະ​ເຈົ້າ​ ຂໍສົ່ງຄຳ​ຊົມ​ເຊີຍ​ອັນ​ອົບ​ອຸ່ນ ​ແລະພອນ​ໄຊ​ອັນ​ປະ​ເສີດ​ມາ​ຍັງພະນະ​ທ່ານ ​ແລະ​ປະຊາຊົນ ສ.​​ເກົາຫລີ ທຸກ​ຖ້ວນໜ້າ.

          ຂ້າພະ​ເຈົ້າ ມີຄວາມຍິນດີເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືທີ່ດີງາມ ລະຫວ່າງ ສອງປະເທດ ໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ແຕກດອກອອກຜົນໃນຫລາຍດ້ານ ນັບຕັ້ງແຕ່ໄດ້ສ້າງຕັ້ງສາຍພົວພັນການທູດ ນຳກັນ ໃນປີ 1995 ເປັນຕົ້ນມາ. ຂ້າພະເຈົ້າ ເຊື່ອ​ໝັ້ນຢ່າງໜັກແໜ້ນວ່າສາຍ​ພົວພັນມິດຕະພາບ ແລະ ການພົວພັນຮ່ວມມືອັນດີ ລະຫວ່າງສອງ​ປະ​ເທດ​ພວກ​ເຮົາຈະສືບຕໍ່ໄດ້ຮັບການ​ເສີມ​ຂະຫຍາຍ​​ໃຫ້ແໜ້ນແຟ້ນ​​ຍິ່ງໆ​ຂຶ້ນ​ ເພື່ອ​ນຳ​ເອົາ​ຜົນ​ປະ​ໂຫຍ​ດ ຕົວຈິງມາສູ່ປະຊາຊົນ​ສອງ​ຊາດສປປ ລາວ ​ແລະ ສ.ເກົາຫລີ,ກໍ​ຄື​ເພື່ອ​ສັນຕິພາບ, ສະຖຽນ​ລະ​ພາບ ​ໃນພາກພື້ນ ແລະ ສາກົນ.

          ໃນໂອ​ກາດ​ອັນ​ສະຫງ່າ​ລາສີ​ນີ້,ຂ້າພະ​ເຈົ້າຂໍ​ອວຍພອນ​​ໃຫ້ພະນະ​ທ່ານຈົ່ງ​ມີ​ພະ​ລາ​ນາ​ໄມ​ສົມບູນ, ມີ​ຄວາມ​ຜາ​ສຸກ​ແລະປະສົບ​ຜົນສຳ​ເລັດໃນ​ໜ້າທີ່ອັນ​ສູງ​ສົ່ງ​ຂອງ​ພະນະ​ທ່ານ ​ແລະຂໍ​​ໃຫ້ສາທາລະນະລັດ ເກົາຫລີມີຄວາມຈະເລີນຮຸ່ງເຮືອງຍິ່ງໆຂຶ້ນ.

          ດ້ວຍຄວາມ​ນັບຖືຢ່າງສູງ,

                                                                                        ບຸນຍັງ ວໍລະຈິດ

                                                                                      ປະທານ​ປະ​ເທດ ​ແຫ່ງ​
                                                                         ສາທາລະນະ​ລັດປະຊາທິປະ​ໄຕປະຊາ​ຊົນ​ລາວ

...............................................................................................................................................................

ນະຄອນຫຼວງ​ວຽງ​ຈັນ, ວັນ​ທີ 03 ຕຸລາ 2018

ພະນະ​ທ່ານລີ ນັກ ຢອນ

ນາຍົກລັດຖະມົນຕີແຫ່ງ​ ສາທາລະນະ​ລັດ​ເກົາຫລີ

ທີ່​ເຊ​ອູ​ນ

ພະນະ​ທ່ານ,

          ໃນນາມລັດຖະບານ ສາທາລະນະ​ລັດປະຊາທິປະ​ໄຕປະຊາຊົນ​ລາວ ​ແລະ ​ໃນ​ນາມ​ສ່ວນ​ຕົວ, ຂ້າພະ​ເຈົ້າ ​ຂໍ​ສົ່ງຄຳ​ຊົມ​ເຊີຍອັນ​ອົບອຸ່ນ ​ແລະພອນ​ໄຊ​ອັນ​ປະ​ເສີດ​ມາ​ຍັງພະນະ​ທ່ານ ​ແລະ ​ລັດຖະບານ ແຫ່ງ ສາທາລະນະລັດ ​​ເກົາຫລີ​ເນື່ອງ​ໃນ​ໂອກາດ​ສະເຫຼີມສະຫຼອງວັນຊາດ ​ຂອງສ.ເກົາຫລີ.

          ຂ້າພະ​ເຈົ້າຕີລາຄາສູງສາຍ​ພົວພັນ​ມິດຕະພາບ ​ແລະການຮ່ວມ​ມື​ອັນ​ດີງາມລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດເກົາຫລີ ໄດ້ຮັບການ​ເສີມຂະຫຍາຍໃນ​ຫຼາຍໆ​ດ້ານ ແລະ ຕໍ່ເນື່ອງ ​ນັບຕັ້ງແຕ່ໄດ້ສ້າງຕັ້ງສາຍພົວພັນການທູດນຳກັນ ໃນປີ 1995​ ເປັນຕົ້ນມາ. ຂ້າພະ​ເຈົ້າ ເຊື່ອ​ໝັ້ນ​ວ່າສາຍ​ພົວພັນ​ມິດຕະພາບ ແລະ ການຮ່ວມມືອັນດີດັ່ງກ່າວນັ້ນ​ຈະສືບຕໍ່ໄດ້ຮັບການເສີມຂະຫຍາຍຍິ່ງໆຂຶ້ນ ເພື່ອຜົນປະໂຫຍດຂອງສອງຊາດພວກເຮົາກໍ​ຄື​ເພື່ອ​ສັນຕິພາບ, ສະຖຽນ​ລະ​ພາບ ແລະ ການຮ່ວມມືພັດທະນາ ​ໃນພາກພື້ນ ແລະ ສາກົນ.

          ໃນໂອ​ກາດອັນ​ສະຫງ່າ​ລາສີ​ນີ້, ຂ້າພະ​ເຈົ້າຂໍອວຍພອນ​ໃຫ້ພະນະ​ທ່ານຈົ່ງ​ມີພະ​ລາ​ນາ​ໄມ​ສົມ​ບູນ, ມີ​ຄວາມ   ​ຜາ​ສຸກ​ ​ແລະປະສົບຜົນສຳເລັດຍິ່ງໆຂຶ້ນ ໃນພາລະກິດອັນສູງສົ່ງຂອງພະນະທ່ານ.

          ດ້ວຍ​ຄວາມ​ນັບຖື​ຢ່າງສູງ,

                                                                                            ທອງລຸນ ສີສຸລິດ

                                                                                     ນາຍົກລັດຖະມົນຕີ ​ແຫ່ງ​
                                                                         ສາທາລະນະ​ລັດປະຊາທິປະ​ໄຕປະຊາຊົນ​ລາວ

..............................................................................................................................................................

                                                                                                            ນະຄອນຫຼວງ​ວຽງ​ຈັນ, ວັນ​ທີ 03 ຕຸລາ 2018

ພະນະ​ທ່ານຄັງ ຄຽງ ຮວາ

ລັດຖະມົນຕີ​​ກະຊວງ​ການ​ຕ່າງປະ​ເທດ        

ແຫ່ງສາທາລະນະ​ລັດ​ເກົາຫລີ

ທີ່​ເຊ​ອູ​ນ

ພະນະ​ທ່ານ,

          ​ເນື່ອງ​ໃນ​ໂອກາດ​ ສະ​ເຫຼີ​ມສະຫຼອງວັນຊາດ ​ສາທາລະນະ​ລັດ​ເກົາຫລີ, ຂ້າພະ​ເຈົ້າມີ​ຄວາມ​ຍິນ​ດີ​ ​ສົ່ງ​ຄຳຊົມເຊີຍອັນ​ອົບ​ອຸ່ນ ແລະ ພອນໄຊອັນປະເສີດ ​ມາ​ຍັງພະນະ​ທ່ານ ​ແລະ ​ໂດຍ​ຜ່ານພະນະ​ທ່ານ ​ໄປ​ຍັງ​ພະນັກງານ​ກະຊວງ​ການ​ຕ່າງປະ​ເທດ ສາທາລະນະ​ລັດ ​ເກົາຫລີທຸກ​ຖ້ວນ​ໜ້າ.

          ຂ້າພະເຈົ້າມີຄວາມປິຕິຍິນດີທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມື ໃນ​ຂອບສອງ​ຝ່າຍ ​ແລະ ​ຫຼາຍ​ຝ່າຍ ລະຫວ່າງສອງປະເທດ ກໍ່ຄືສອງກະຊວງການຕ່າງປະເທດພວກເຮົາ ນັບມື້ນັບໄດ້ຮັບການຂະຫຍາຍຕົວຍິ່ງໆຂຶ້ນ. ຂ້າພະ​ເຈົ້າມີ​ຄວາມ​ເຊື່ອ​ໝັ້ນຢ່າງໜັກແໜ້ນ​ວ່າ ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສ.ເກົາຫລີ ຈະສືບຕໍ່ໄດ້ຮັບການເສີມຂະຫຍາຍ ແລະ ແຕກດອກອອກຜົນໄປຍິ່ງໆຂຶ້ນເພື່ອ​ນຳ​ເອົາ​ຜົນ​ປະ​ໂຫຍ​ດມາສູ່​ປະຊາຊົນ​ສອງຊາດພວກເຮົາກໍ່ຄືເພື່ອສັນຕິພາບ, ສະຖຽນລະພາບ ແລະ ເພື່ອການຮ່ວມມືພັດທະນາ ຢູ່ໃນພາກພື້ນ ແລະ ສາກົນ.

          ຂ້າພະ​ເຈົ້າຂໍ​ຖື​ໂອ​ກາດ​ນີ້ອວຍພອນ​​ໄຊໃຫ້ພະນະ​ທ່ານຈົ່ງ​ມີພະ​ລາ​ນາ​ໄມ​ສົມ​ບຸນ ​ແລະປະສົບ​ຜົນສຳ​ເລັດ​ໃນ​ໜ້າ​ທີ່​ອັນ​ສູງ​ສົ່ງ​ຂອງ​ພະນະ​ທ່ານ.

ດ້ວຍ​ຄວາມ​ນັບຖື​,

                                                                                ສະເຫລີມໄຊ ກົມມະສິດ
                                                                        ລັດຖະມົນຕີ​ກະຊວງ​ການ​ຕ່າງປະ​ເທດ​
                                                                 ແຫ່ງສາທາລະນະ​ລັດປະຊາທິປະ​ໄຕປະຊາຊົນ​ລາວ