ບັນດາສະຫາຍ ທີ່ຮັກແພງ,
ໃນນາມຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ສະພາແຫ່ງຊາດ, ລັດຖະ ບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ພວກຂ້າພະເຈົ້າ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງຕໍ່ການຈາກໄປຂອງ ສະຫາຍ ຫຼີ ເຜີງ, ອະດີດກຳມະການກົມການເມືອງສູນກາງພັກກອມມູນິດຈີນ, ເລຂາຄະນະເລຂາສູນກາງພັກກອມມູນິດຈີນ ສະໄໝ ທີ XII, ອະດີດຄະນະປະຈຳກົມການເມືອງສູນກາງພັກຄອມມູນິດຈີນ ສະໄໝ ທີ XIII, XIV, XV; ອະດີດນາຍົກລັດຖະມົນຕີ ແຫ່ງ ສປ ຈີນ ແລະ ອະດີດປະທານສະພາປະຊາຊົນຜູ້ແທນທົ່ວປະເທດຈີນ ສະໄໝ ທີ IX.
ພວກຂ້າພະເຈົ້າ ຕີລາຄາສູງຕໍ່ການປະກອບສ່ວນອັນລໍ້າຄ່າຕໍ່ການເຄື່ອນໄຫວປະຕິວັດ ຂອງ ສະຫາຍ ຫຼີ ເຜີງ ໃຫ້ແກ່ການຕໍ່ສູ້ປົດປ່ອຍຊາດກໍຄືການປົກປັກຮັກສາ ແລະ ສ້າງສາພັດທະນາ ປະເທດຊາດເປັນເວລາຫຼາຍກວ່າ 60 ປີ ສະຫາຍ ເປັນຜູ້ທີ່ມີການປະກອບສ່ວນໃຫຍ່ຫຼວງໃຫ້ແກ່ພາລະກິດປະຕິຮູບ ແລະ ເປີດປະຕູສູ່ພາຍນອກຂອງ ສປ ຈີນ, ເປັນຜູ້ໜຶ່ງທີ່ມີຄວາມສຳຄັນໃນການວາງພື້ນຖານອັນໜັກແໜ້ນໃຫ້ແກ່ເສດຖະກິດຕະຫຼາດຕາມກົນໄກເສດຖະກິດຂອງຈີນ ແລະ ການປັບປຸງກົງຈັກບໍລິຫານງານຂອງລັດ. ສະຫາຍ ຫຼີ ເຜີງ ຍັງເປັນບຸກຄົນທີ່ສຳຄັນໃນການຊີີ້ນຳນຳພາເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ດີງາມ ລະຫວ່າງ ສປປ ລາວ ແລະ ສປ ຈີນ ຕະຫຼອດມາ ໃຫ້ຂະຫຍາຍຕົວຢ່າງບໍ່ຢຸດຢັ້ງຕະຫຼອດໄລຍະທີ່ຜ່ານມາ ອັນໄດ້ເຮັດໃຫ້ ສາຍພົວພັນຂອງ ສອງປະເທດລາວ-ຈີນ ໄດ້ກາຍເປັນຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານ ແລະ ກາຍເປັນຄູ່ຮ່ວມຊາຕາກຳລາວ-ຈີນ ໃນທຸກມື້ນີ້.
ການຈາກໄປຂອງ ສະຫາຍ ຫຼີ ເຜີງ ບໍ່ພຽງແຕ່ເປັນການສູນເສຍຜູ້ນຳທີ່ເຄົາລົບຮັກ ຂອງ ພັກ, ລັດ ແລະ ປະຊາຊົນຈີນ ແຕ່ຍັງເປັນການສູນເສຍເພື່ອນມິດສະຫາຍທີ່ ສະໜິດສະໜົມ ແລະ ໃກ້ຊິດ ຂອງ ພັກ, ລັດ ແລະ ປະຊາຊົນລາວ ພວກຂ້າພະເຈົ້າອີກດ້ວຍ.
ໃນຊ່ວງເວລາອັນໂສກເສົ້ານີ້, ຄະນະບໍລິຫານງານສູນກາງພັກປະຊາຊົນປະຕິວັດລາວ, ສະພາແຫ່ງຊາດ, ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຂໍແບ່ງເບົາຄວາມທຸກໂສກ ແລະ ສົ່ງຄວາມໄວ້ອາໄລຢ່າງສຸດຊື້ງ ມາຍັງ ຄະນະບໍລິຫານງານສູນກາງພັກກອມມູນິດຈີນ, ສະພາຜູ້ແທນປະຊາຊົນທົ່ວປະເທດຈີນ, ລັດຖະບານ ແຫ່ງ ສາທາລະນະລັດ ປະຊາຊົນຈີນ, ພ້ອມດ້ວຍ ປະຊາຊົນຈີນ ອ້າຍນ້ອງ ໂດຍສະເພາະ ຕໍ່ຄອບຄົວ, ຍາດຕິພີ່ນ້ອງ ແລະ ເພື່ອນມິດຂອງສະຫາຍ ຫຼີ ເຜີງ ມານະໂອກາດນີ້ດ້ວຍ.
ນະຄອນຫຼວງວຽງຈັນ, ວັນທີ 24 ກໍລະກົດ 2019
ຄະນະບໍລິຫານງານສູນກາງພັກປະຊາຊົນປະຕິວັດລາວ
ສະພາແຫ່ງຊາດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ລັດຖະບານແຫ່ງ ສາທາລະນະລັດ ປະຊາທິປະໄຕ ປະຊາຊົນ ລາວ