ໃນວັນທີ 21 ສິງຫາ 2019 ຜ່ານມາ, ສະຫາຍ ເລຂາທິການໃຫຍ່ ສີ ຈິ້ນຜິງ, ປະທານປະເທດ ແຫ່ງ ສປ ຈີນ ໄດ້ສົ່ງສານທາງວາຈາ ເຖິງ ສະຫາຍ ເລຂາທິການໃຫຍ່ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ກ່ຽວກັບ ການສະແດງຄວາມເສົ້າສະຫຼົດໃຈ ຕໍ່ເຫດການລົດໂດຍສານຂົນສົ່ງນັກທ່ອງທ່ຽວຈີນ ເສຍຫຼັກຕົກເຫວ ຢູ່ລາວ ອັນໄດ້ເຮັດໃຫ້ນັກທ່ອງທ່ຽວຊາວຈີນຫຼາຍສິບຄົນເສຍຊີວິດ ແລະ ບາດເຈັບ. ປະທານ ສີ ຈິ້ນຜິງ ໄດ້ກ່າວວ່າ: ຂ້າພະເຈົ້າໄດ້ຮັບການສະແດງຄວາມເຫັນໃຈ ຕໍ່ເຫດການທີ່ເກີດຂື້ນ ແລະ ພ້ອມນັ້ນກໍ່ໄດ້ຊາບວ່າຝ່າຍລາວໄດ້ລະດົມກໍາລັງ ຈາກທຸກພາກສ່ວນ ໂດຍສະເພາະກອງກໍາລັງທະຫານ ແລະ ປະຊາຊົນເຂົ້າຊ່ວຍເຫຼືອກູ້ໄພຢ່າງເລັ່ງດ່ວນ. ການທີ່ສະຫາຍເລຂາທິການໃຫຍ່ ສົ່ງສານໄປຍັງຂ້າພະເຈົ້ານັ້ນ, ເປັນການສະແດງເຖິງຄວາມສຳຄັນຢ່າງຍິ່ງ ຕໍ່ສາຍພົວພັນລະຫວ່າງສອງປະເທດ ຈີນ-ລາວ ກໍ່ຄື ຄວາມເອົາໃຈໃສ່ຢ່າງສູງ ຂອງສະຫາຍເລຂາທິການໃຫຍ່ ແລະ ທຸກພາກສ່ວນກ່ຽວຂ້ອງຂອງຝ່າຍລາວຕໍ່ການກູ້ໄພ. ຂ້າພະ ເຈົ້າໄດ້ຊີ້ນໍາອົງການກ່ຽວຂ້ອງຂອງຈີນ ແລະ ໜ່ວຍປິ່ນປົວຂອງທະຫານປົດປ່ອຍປະຊາຊົນຈີນ ທີ່ກໍາລັງຝຶກຊ້ອມຂະບວນລົດໄຟສັນຕິພາບ-2019 ຢູ່ລາວ ເຂົ້າຮ່ວມໃນການກູ້ໄພ. ຫວັງວ່າທຸກພາກສ່ວນຂອງພາກລັດ ແລະ ກອງກໍາລັງທະຫານ ຈະສືບຕໍ່ປະສານສົມທົບກັນຢ່າງສະໜິດແໜ້ນ ເພື່ອເຮັດໃຫ້ການປິ່ນປົວຜູ້ທີ່ໄດ້ຮັບບາດເຈັບ ແລະ ຊ່ວຍ ເຫຼືອຜູ້ໄດ້ຮັບເຄາະຮ້າຍດັ່ງກ່າວດໍາເນີນໄປໂດຍດີ.

ການຮັບໃຊ້ປະຊາຊົນແມ່ນຄວາມມຸ້ງມາດປາດຖະໜາຂອງສອງພັກ-ລັດ ລາວ-ຈີນ. ການທີ່ທັງສອງຝ່າຍໄດ້ຮ່ວມກັນກູ້ໄພ ແລະ ແກ້ໄຂຜົນກະທົບຂອງອຸບັດຕິເຫດຄັ້ງນີ້ ໄດ້ສະແດງເຖິງຄວາມມີນໍ້າໃຈຮ່ວມທຸກຮ່ວມສຸກ ລະຫວ່າງ ຈີນ ແລະ ລາວ ຕາມທິດ 4 ດີ ຄື: ບ້ານໃກ້ເຮືອນຄຽງທີ່ດີ, ເພື່ອມິດທິີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ. ຂ້າພະເຈົ້າຍິນດີ ແລະ ພ້ອມຈະຮ່ວມມືກັບສະຫາຍ ເລຂາທິການໃຫຍ່ ເພື່ອສຶກສາເພີ່ມທະວີສາຍພົວພັນ ລະຫວ່າງ ສອງພັກ ສອງລັດ ຈີນ-ລາວ ໃຫ້ກ້າວເຂົ້າສູ່ລ່ວງເລິກ ແລະ ສ້າງຄູ່ຮ່ວມສະຕາກໍາຮ່ວມກັນ ໃຫ້ປະກົດຜົນເປັນຈິງ.