ນະຄອນຫຼວງວຽງຈັນ, ວັນທີ ມິຖຸນາ 2020
ພະນະທ່ານ,
ເນື່ອງໃນໂອກາດພິທີສະເຫຼີມສະຫຼອງ ວັນໄຊຊະນະສົງຄາມປົກປ້ອງປິຕຸພູມ ຄົບຮອບ 75 ປີ ເຊິ່ງຈະຈັດຂຶ້ນໃນວັນທີ 24 ມິຖຸນາ 2020 ຈະມາເຖິງນີ້, ຕາງໜ້າໃຫ້ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມຊົມເຊີຍຢ່າງສຸດໃຈ ແລະ ຈາລຶກຄຸນງາມຄວາມດີ ກໍ່ຄືລັດທິວິລະຊົນອັນຍິ່ງໃຫຍ່ ຂອງ ບັນດານັກຮົບກອງທັບແດງ ຣັດເຊຍ ທີ່ເສຍສະຫຼະເລືອດເນື້ອໃນການຕໍ່ສູ້ເພື່ອປົກປ້ອງປິຕຸພູມ ກໍຄືເພື່ອປົດປ່ອຍທະວີບເອີຣົບ ແລະ ພາກພື້ນອື່ນໆຂອງໂລກອອກຈາກເງື້ອມມືຂອງພວກຟາດຊິດທີ່ໂຫດຮ້າຍປ່າເຖື່ອນ.
ປະຊາຊົນລາວ ຮັບຮູ້ຄວາມໝາຍສໍາຄັນອັນຍິ່ງໃຫຍ່ທາງປະຫວັດສາດຂອງວັນໄຊຊະນະດັ່ງກ່າວ, ເຊິ່ງບໍ່ພຽງແຕ່ເປັນຄວາມທະນົງໃຈສໍາລັບປະຊາຊົນສະຫະພາບໂຊວຽດໃນເມື່ອກ່ອນກໍຄື ສະຫະພັນ ຣັດເຊຍ ໃນປັດຈຸບັນ, ຫາກຍັງສ່ອງແສງເຖິງຄວາມຍິ່ງໃຫຍ່ຂອງຊາດ ແລະ ປະຊາຊົນ ຣັດເຊຍ, ໂດຍສະເພາະແມ່ນແສນຍານຸພາບຂອງກອງທັບ ຣັດເຊຍ ເຊິ່ງເປັນເສົາຄໍ້າທີ່ສໍາຄັນແກ່ສັນຕິພາບ ແລະ ຄວາມໝັ້ນຄົງໃນລະດັບພາກພື້ນ ແລະ ສາກົນ. ຂ້າພະເຈົ້າ ຕີລາຄາສູງຕໍ່ບັນດາຜົນສຳເລັດອັນໃຫຍ່ຫຼວງ ທີ່ ສ. ຣັດເຊຍ ຍາດໄດ້ໃນໄລຍະຜ່ານມາ ແລະ ຢືນຢັນຄວາມມຸ້ງໝັ້ນອັນແນ່ວແນ່ທີ່ຈະສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງ ສປປ ລາວ ແລະ ສ. ຣັດເຊຍ ບົນພື້ນຖານການເປັນຄູ່ຮ່ວມມືຍຸດທະສາດນໍາກັນໃຫ້ແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ, ໂດຍສະເພາະການສະໜັບສະໜູນເຊິ່ງກັນແລະກັນໃນການຕໍ່ສູ້ຕ້ານການແຜ່ລະບາດອັນຮ້າຍແຮງຂອງ ໂຄວິດ-19 ເຊິ່ງກໍາລັງຂົ່ມຂູ່ຊີວິດຂອງປະຊາຊົນສອງຊາດພວກເຮົາໃນປັດຈຸບັນ, ອັນເປັນການປະກອບສ່ວນເຂົ້າໃນພາລະກິດແຫ່ງການສ້າງສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາແບບຍືນຍົງໃນພາກພື້ນ ແລະ ໃນໂລກ.
ໃນໂອກາດອັນສະຫງ່າລາສີ ແລະ ມີຄວາມສຳຄັນນີ້, ຂ້າພະເຈົ້າ ຂໍອວຍພອນໃຫ້ ພະນະທ່ານ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ອັນມີກຽດສູງສົ່ງຂອງຕົນ ແລະ ປະຊາຊົນ ຣັດເຊຍ ຈົ່ງສືບຕໍ່ມີຄວາມກ້າວໜ້າ ແລະ ຈະເລີນຮຸ່ງເຮືອງ.
ດ້ວຍຄວາມນັບຖືຢ່າງສູງ,
ບຸນຍັງ ວໍລະຈິດ
ພະນະທ່ານ ວາລາດີເມຍ ປູຕິນ
ປະທານາທິບໍດີ ແຫ່ງ ສະຫະພັນ ຣັດເຊຍ
ທີ່ ນະຄອນຫຼວງມົດສະກູ