ນະຄອນຫຼວງວຽງຈັນ, ວັນທີ 13 ກໍລະກົດ 2020

ພະນະທ່ານ,

ເນື່ອງໃນໂອກາດວັນຊາດ ແຫ່ງ ສາທາລະນະລັດ ຝຣັ່ງ ຄົບຮອບ 231 ປີ, ຕາງໜ້າປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ຢ່າງຈິງໃຈ ແລະ ອວຍພອນອັນປະເສີດ ມາຍັງພະນະທ່ານຈົ່ງມີສຸຂະພາບເຂັ້ມແຂງ ແລະ ພະລານາໄມສົມບູນ, ພ້ອມດ້ວຍປະຊາຊົນຝຣັ່ງທຸກຖ້ວນໜ້າ ຈົ່ງມີຄວາມຜາສຸກ ແລະ ຈະເລີນຮຸ່ງເຮືອງ.

ຂ້າພະເຈົ້າ ມີຄວາມພາກພູມໃຈເປັນຢ່າງຍິ່ງ ທີ່ເຫັນວ່າ ໃນຊຸມປີທີ່ຜ່ານມາສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງ ສອງປະເທດ ລາວ-ຝຣັ່ງ ໄດ້ຮັບການຂະຫຍາຍຕົວຂຶ້ນເລື້ອຍໆ ແລະ ຂໍສະແດງຄວາມຂອບໃຈຢ່າງຈິງໃຈ ມາຍັງລັດຖະບານ ແລະ ປະຊາຊົນຝຣັ່ງ ຕໍ່ການສະໜັບສະໜູນ ແລະ ຊ່ວຍເຫຼືອອັນມີຄຸນຄ່າ ທັງໃນຂອບສອງຝ່າຍ ແລະ ຫຼາຍຝ່າຍ, ອັນເປັນການປະກອບສ່ວນທີ່ສຳຄັນເຂົ້າໃນການພັດທະນາ ເສດຖະກິດ-ສັງຄົມ ຂອງ ສປປ ລາວ.

ຂ້າພະເຈົ້າ ເຊື່ອໝັ້ນວ່າ ການພົວພັນຮ່ວມມືດັ່ງກ່າວ ຈະສືບຕໍ່ໄດ້ຮັບການຮັດແໜ້ນ ແລະ ເສີມຂະຫຍາຍໃຫ້ເລິກເຊິ່ງຍິ່ງໆຂຶ້ນ ໃນຊຸມປີຕໍ່ໜ້າ, ເພື່ອຜົນປະໂຫຍດຂອງປະຊາຊົນສອງຊາດ ກໍ່ຄືເພື່ອສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ ແລະ ໃນໂລກ.

ດ້ວຍຄວາມນັບຖືຢ່າງສູງ,

ບຸນ​ຍັງ ວໍລະ​ຈິດ

ປະທານປະເທດ

ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະນະທ່ານ ເອັມມານູແອນ ມາຄຣົງ

ປະທານາທິບໍດີ ແຫ່ງ ສາທາລະນະລັດ ຝຣັ່ງ

ທີ່ ປາຣີ

ນະຄອນຫຼວງ​ວຽງ​ຈັນ, ວັນ​ທີ 13 ກໍລະກົດ 2020

ພະ​ນະ​ທ່ານ,

ເນື່ອງ​ໃນ​ໂອ​ກາດວັນ​ຊາດ​ ແຫ່ງສາ​ທາ​ລະ​ນະ​ລັດ ຝ​ຣັ່ງ, ໃນ​ນາມ​ລັດ​ຖະ​ບານ ແຫ່ງ ສາ​ທາລະ​ນະ​ລັດ       ປະ​ຊາ​ທິ​ປະ​ໄຕ ປ​ະ​ຊາ​ຊົນ​ລາວ​ ແລະ ໃນ​ນາມ​ສ່ວນ​ຕົວ, ຂ້າ​ພະ​ເຈົ້າມີ​ຄວາມ​ປິ​ຕິ​ຊື່ນ​ຊົມເປັນ​ຢ່າງ​ຍິ່ງ ​ສົ່ງ​ຄຳ​ຊົມ​ເຊີຍ​ອັນ​ອົບ​ອຸ່ນ ແລະ ພອນ​ໄຊ​ອັນ​ປະ​ເສີດ​ ມາ​ຍັງ​ ພະ​ນະ​ທ່ານ ແລະ ຄະນະ​ລັດ​ຖະ​ບານ​ຝ​ຣັ່ງ​ ທຸກ​ຖ້ວນ​ໜ້າ.

ຂ້າ​ພະ​ເຈົ້າ ເຊື່ອ​ໝັ້ນ​ຢ່າງ​ໜັກ​ແໜ້ນ​ວ່າ ສາຍພົວ​ພັນມິດຕະພາບ ແລະ ການ​ຮ່ວມ​ມື​ອັນ​ເປັນ​ມູນ​ເຊື້ອ ລະ​ຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາ​ທາ​ລະ​ນະ​ລັດ ​ຝ​ຣັ່ງ ຈະ​ໄດ້​ຮັບ​ການ​ເສີມ​ຂະ​ຫຍາຍ​ໃຫ້​ເຂັ້​ມ​ແຂງ ແລະ ແຕກ​ດອກ ອອກ​ຜົນ​ຍິ່ງໆ​ຂຶ້ນ​ໃນ​ຊຸມປີ​ຕໍ່​ໜ້າ ເພື່ອ​ຜົນ​ປະ​ໂຫຍດຂອງ​ປະ​ຊາ​ຊົນ​ສອ​ງ​ຊາດ​ພ​ວກ​ເຮົາ ກໍ່​ຄື​ເພື່ອສັນ​ຕິ​ພາບ, ສະຖຽນລະພາບ ແລະ ການ​ຮ່ວມ​ມື ເພື່ອການພັດທະນາແບບຍືນຍົງໃນພາກພື້ນ ແລະ ໃນໂລກ.

ດ້ວຍ​ຄວາມ​ນັບ​ຖື​ຢ່າງ​ສູງ

ທອງລຸນ ສີ​ສຸ​ລິດ

ນາຍົກລັດຖະມົນຕີ

ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະ​ນ​ະ​ທ່ານ ຊ໋ອງ ກາສເຕັກສ໌

ນາຍົກລັດ​ຖະ​ມົນ​ຕີ​ ແຫ່ງສາ​ທາ​ລະ​ນະ​ລັດ​ຝ​ຣັ່ງ

ທີ່ປາ​ຣີ

ນະຄອນຫຼວງວຽງຈັນ, ວັນທີ 13 ກໍລະກົດ 2020

ພະ​ນະ​ທ່ານ,

ໃນ​ໂອກາດການສະເຫຼີມສະຫຼອງວັນ​ຊາດ 14 ກໍລະກົດ ຂອງປະຊາຊົນຝຣັ່ງ, ຂ້າ​ພະ​ເຈົ້າ ຂໍ​ຖື​ເປັນ​ກຽດ​ສົ່ງ​ຄຳ​ຊົມ​ເຊີຍ​ຢ່າງ​ຈິງ​ໃຈ ແລະ ອວຍພອນ​​ໄຊອັນປະເສີດ ມາຍັງ​ພະ​ນະ​ທ່ານ ​ຈົ່ງ​ມີ​ສຸ​ຂະ​ພາບ​ເຂັ້ມ​ແຂງ,ມີ​ຄວາມ​ຜາ​ສຸກ ແລະ ປະສົບຜົນ​ສຳ​ເລັດ​ທຸກ​ປະ​ການ ໃນ​ການ​ປະ​ຕິ​ບັດ​ໜ້າ​ທີ່​ອັນ​ສູງ​ສົ່ງ​ຂອງ​ພະນະທ່ານ.

ຂ້າ​ພະ​ເຈົ້າ ເຊື່ອໝັ້ນວ່າ ໂດຍເສີມຂະຫຍາຍຜົນສຳເລັດທີ່ຍາດມາໄດ້ໃນຊຸມປີທີ່ຜ່ານມາ ແລະ ດ້ວຍຄວາມພະຍາຍາມຮ່ວມກັນ ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອຍາວນານ ລະຫວ່າງ ສອງປະເທດ, ກໍ່​ຄື​ສອງ​ກະຊ​ວງການ​ຕ່າງ​ປະ​ເທດ​ພວກ​ເຮົາ ຈະສືບຕໍ່ໄດ້ຮັບການເສີມຂະຫຍາຍໃຫ້​ເຂັ້ມ​ແຂງຍິ່ງໆຂຶ້ນໃນອະນາຄົດ, ເພື່ອ​ຜົນ​ປະ​ໂຫຍດ​ຂອງ​ປະ​ຊາ​ຊົນ​ສອງ​ຊາດ​ພວກ​ເຮົາ ກໍ່​ຄືເພື່ອ​ສັນ​ຕິ​ພາບ, ສະຖຽນລະພາບ ແລະ ກາ​ນ​ຮ່ວມ​ມື​ ເພື່ອ​ການ​ພັດ​ທະ​ນາ​ແບບ​ຍືນ​ຍົງ​ໃນ​ພາກ​ພື້ນ ແລະ ໃນ​ໂລກ.

ດ້ວຍ​ຄວາມ​ນັບ​ຖື​ຢ່າງ​ສູງ,

ສະເຫຼີມໄຊ ກົມມະສິດ

ລັດຖະມົນຕີກະຊວງການຕ່າງປະເທດ

ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະ​ນະ​ທ່ານ ຊັງ ອີວວ໌ ເລີ ດຣຽງ,

ລັດ​ຖະ​ມົນ​ຕີ​​ກິດຈະການເອີຣົບ ແລະ ການ​ຕ່າງ​ປະ​ເທດ

ແຫ່ງ ສາ​ທາ​ລະ​ນະ​ລັດ​ຝ​ຣັ່ງ

ທີ່ ປາ​ຣີ