ໂທລະເລກສະແດງຄວາມເຫັນໃຈ
ສະຫາຍ ສີ ຈິ້ນຜີງ
ເລຂາທິການໃຫຍ່, ປະທານປະເທດ
ແຫ່ງ ສາທາລະນະລັດ ປະຊາຊົນຈີນ
ທີ່ ນະຄອນຫຼວງປັກກິ່ງ
ສະຫາຍທີ່ນັບຖື,
ຂ້າພະເຈົ້າ ໄດ້ຮັບຂ່າວດ້ວຍຄວາມສະເທືອນໃຈ ກ່ຽວກັບໄພພິບັດທໍາມະຊາດອັນຮ້າຍແຮງ ນັບແຕ່ຕົ້ນເດືອນພຶດສະພາ 2020 ເປັນຕົ້ນມາ, ລົມພະຍຸ, ຝົນຕົກໜັກເປັນເວລາຕິດຕໍ່ກັນໄລຍະຍາວ ເຮັດໃຫ້ເກີດມີໄພນໍ້າຖ້ວມເປັນບໍລິເວນກວ້າງ, ດິນເຊາະເຈື່ອນ ຢູ່ຫຼາຍແຂວງ ເປັນຕົ້ນແມ່ນ ແຂວງເຈີຈ່ຽງ, ອ່ານຮຸ່ຍ, ຫູເປີຍ, ຫູໜານ, ກວາງຕຸງ, ກວາງຊີ່, ສົງຊິງ, ເສສວນ, ກຸ້ຍໂຈ່ ແລະ ແຂວງອື່ນໆຂອງ ສປ ຈີນ, ເຊິ່ງໄດ້ສ້າງຄວາມເສຍຫາຍຢ່າງໜັກໜ່ວງ ທາງດ້ານຊີວິດ ແລະ ຊັບສິນ ຂອງປະຊາຊົນຈີນອ້າຍນ້ອງ.
ໃນນາມຄະນະບໍລິຫານງານສູນກາງພັກ ປະຊາຊົນປະຕິວັດລາວ, ລັດຖະບານ ແລະ ປະຊາຊົນລາວ ກໍ່ຄື ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນອົກເຫັນໃຈ ຢ່າງສຸດຊື້ງ ມານັງສະຫາຍ ແລະ ຜ່ານສະຫາຍ ໄປຍັງພັກ, ລັດຖະບານ ແລະ ປະຊາຊົນຈີນອ້າຍນ້ອງ ໂດຍສະເພາະ ຄອບຄົວຜູ້ປະສົບເຄາະຮ້າຍຈາກໄພທໍາມະຊາດໃນຄັ້ງຮ້າຍແຮງນີ້ດ້ວຍ.
ຂ້າພະເຈົ້າ ເຊື່ອໝັ້ນຢ່າງໜັກແໜ້ນວ່າ ພາຍໃຕ້ການຊີ້ນໍາ ນໍາພາຂອງສະຫາຍ ແລະ ດ້ວຍຄວາມເອົາໃຈໃສ່ຊ່ວຍເຫຼືອຢ່າງໃກ້ຊິດ ຂອງບັນດາສະຫາຍການນໍາຂັ້ນສູນກາງ ກໍ່ຄືອໍານາດການປົກຄອງທ້ອງຖິ່ນ, ປະຊາຊົນຈີນ ຈະສາມາດຜ່ານຜ່າຄວາມຫຍຸ້ງຍາກໃນຄັ້ງນີ້ ແລະ ສາມາດແກ້ໄຂສະພາບການດັ່ງກ່າວ ແລະ ຟື້ນຟູການເປັນຢູ່ຂອງປະຊາຊົນຈີນອ້າຍນ້ອງ ໃຫ້ກັບຄືນສູ່ຄວາມປົກກະຕິໂດຍໄວ.
ນະຄອນຫລວງວຽງຈັນ, ວັນທີ 29 ກໍລະກົດ 2020
ບຸນຍັງ ວໍລະຈິດ
ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ