ນະຄອນຫຼວງ​ວຽງ​ຈັນ, ວັນທີ 17   ສິງຫາ 2020

ສະຫາຍ ຣິ ເຊິນ ກວນ ທີ່​ນັບຖື,

ຂ້າ​ພະ​ເຈົ້າ ​ໄດ້ຮັບຂ່າວວ່າ ໃນຕົ້ນເດືອນ ສິງຫາ 2020 ທີ່ຜ່ານມານີ້ໄດ້ມີຝົນຕົກໜັກຫຼາຍມື້ຕໍ່ເນື່ອງກັນ ຢູ່ແຂວງຮວາງແຮເໜືອ ຂອງ ສປປ ເກົາຫຼີ, ເຮັດໃຫ້ບ້ານເຮືອນ ແລະ ພື້ນຖານການຜະລິດກະສິກຳຂອງປະຊາຊົນ ໄດ້ຮັບຄວາມເສຍຫາຍເປັນຈໍານວນຫຼວງຫຼາຍ.

ໃນນາມຕາງໜ້າ ລັດຖະບານ, ປະຊາຊົນລາວ ກໍ່ຄື ໃນນາມສ່ວນຕົວ, ຂ້າພະເຈົ້າ ຂໍສະແດງ ຄວາມເຫັນໃຈຢ່າງສຸດຊຶ້ງມາຍັງ ພັກ, ລັດຖະບານ ແລະ ປະຊາຊົນ ສປປ ເກົາຫຼີ ອ້າຍນ້ອງ ແລະ ໂດຍຜ່ານ ສະຫາຍ ໄປຍັງປະຊາຊົນ ແລະ ບັນດາຄອບຄົວຜູ້ທີ່ໄດ້ຮັບຜົນກະທົບຈາກໄພທຳມະຊາດທີ່ຮ້າຍແຮງ ໃນຄັ້ງນີ້ດ້ວຍ.

ຂ້າພະເຈົ້າ ມີຄວາມເຊື່ອໝັ້ນວ່າ ດ້ວຍຄວາມເອົາໃຈໃສ່ຂອງພັກແຮງງານ ແລະ ລັດຖະບານ ສປປ ເກົາຫຼີ, ປະຊາຊົນ ສປປ ເກົາຫຼີ ຈະສາມາດຜ່ານຜ່າຄວາມຫຍຸ້ງຍາກໃນຄັ້ງນີ້ ແລະ ຟື້ນຟູຊິວິດການເປັນຢູ່ໃຫ້ກັບຄືນສູ່ສະພາບປົກກະຕິ ໂດຍໄວ.     

ສະເຫຼີມໄຊ ກົມມະສິດ

ລັດຖະມົນຕີກະຊວງການຕ່າງປະເທດ

ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ສະຫາຍ ຣິ ເຊິນ ກວນ,

ລັດຖະມົນຕີກະຊວງການຕ່າງປະເທດ

ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ

ທີ່ ນະຄອນຫຼວງພຽງຢາງ