ນະຄອນຫຼວງວຽງຈັນ, ວັນທີ 31 ສິງຫາ 2020
ພະນະທ່ານ,
ຂ້າພະເຈົ້າ ຮູ້ສຶກຕົກໃຈທີ່ໄດ້ຊາບຂ່າວ ການສະເໜີລາອອກຈາກຕໍາແໜ່ງ ຢ່າງກະທັນຫັນ ຂອງ ພະນະທ່ານ ຍ້ອນບັນຫາສຸຂະພາບ.
ຕະຫຼອດໄລຍະເວລາທີ່ຂ້າພະເຈົ້າ ໄດ້ຮ່ວມເຮັດວຽກຢ່າງໃກ້ຊິດກັບພະນະທ່ານໃນຊຸມປີຜ່ານມາ, ຂ້າພະເຈົ້າ ມີຄວາມປະທັບໃຈຫຼາຍຕໍ່ມິດຕະພາບຂອງພວກເຮົາ ກໍ່ຄື ການເພີ່ມທະວີການຮ່ວມມືທີ່ດີ ລະຫວ່າງ ສປປ ລາວ ແລະ ຍີ່ປຸ່ນ ທີ່ໄດ້ຮັບການພັດທະນາຢ່າງບໍ່ຢຸດຢັ້ງ ແລະ ຍົກລະດັບເປັນຄູ່ຮ່ວມຍຸດທະສາດ ໃນປີ 2015 ຜ່ານມາ. ພ້ອມນີ້, ຂ້າພະເຈົ້າ ຂໍສະແດງຄວາມຂອບໃຈ ມາຍັງລັດຖະບານ ກໍ່ຄືປະຊາຊົນຍີ່ປຸ່ນ, ໂດຍສະເພາະ ຕໍ່ພະນະທ່ານ ທີ່ໄດ້ໃຫ້ການພິຈາລະນາ ແລະ ສະໜັບສະໜູນບັນດາຂໍ້ສະເໜີຕ່າງໆ ຂອງລັດຖະບານ ສປປ ລາວ ໃນການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມຂອງ ສປປ ລາວ ກໍ່ຄື ການແກ້ໄຂບັນຫາເສດຖະກິດມະຫາພາກຂອງ ສປປ ລາວ ຕະຫຼອດໄລຍະທີ່ຜ່ານມາ.
ສປປ ລາວ ຢືນຢັນທັດສະນະອັນສະເໝີຕົ້ນສະເໝີປາຍຂອງຕົນ ໃນການຮ່ວມມືກັບຍີ່ປຸ່ນ ເພື່ອສືບຕໍ່ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມດັ່ງກ່າວ ລະຫວ່າງ ສປປ ລາວ ແລະ ຍີ່ປຸ່ນ, ກໍ່ຄືການຜັນຂະຫຍາຍການ ເປັນຄູ່ຮ່ວມຍຸດທະສາດໃຫ້ເປັນຮູບປະທໍາ ເພື່ອຜົນປະໂຫຍດລວມ ຂອງສອງປະເທດພວກເຮົາ ກໍ່ຄື ການຮ່ວມມືເພື່ອການພັດທະນາ ຢູ່ໃນພາກພື້ນ ແລະ ສາກົນ.
ຂ້າພະເຈົ້າ ຂໍອວຍພອນໃຫ້ ພະນະທ່ານ ຈົ່ງມີສຸຂະພາບເຂັ້ມແຂງ ແລະ ຫາຍຈາກພະຍາດໂລຄາໂດຍໄວ ແລະ ຂໍໃຫ້ປະຊາຊົນຍີ່ປຸ່ນ ຈົ່ງສືບຕໍ່ມີຄວາມກ້າວໜ້າ ແລະ ຈະເລີນຮຸ່ງເຮືອງຍິ່ງໆຂຶ້ນ.
ທອງລຸນ ສີສຸລິດ
ນາຍົກລັດຖະມົນຕີ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ພະນະທ່ານ ຊິນໂຊ ອາເບະ
ນາຍົກລັດຖະມົນຕີ ແຫ່ງ ປະເທດຍີ່ປຸ່ນ
ທີ່ ນະຄອນຫຼວງໂຕກຽວ