ຮ່າໂນ້ຍ, ວັນທີ 9 ຕຸລາ 2020

ສະຫາຍ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ.

ທີ່ນະຄອນຫຼວງວຽງຈັນ.

ສະຫາຍ ສະເຫຼີມໄຊ ກົມມະສິດ, ທີ່ນັບຖື.

ເນື່ອງໃນໂອກາດ ວັນສ້າງຕັ້ງຂະແໜງການທູດ ແຫ່ງ ສປປ ລາວ ຄົບຮອບ 75 ປີ (12/10/1945-12/10/2020), ຂ້າພະເຈົ້າ ຂໍຕາງໜ້າໃຫ້ກະຊວງການຕ່າງປະເທດ ສສ ຫວຽດນາມ ອວຍພອນໄຊ ອັນປະເສີດ ມາຍັງສະຫາຍ, ຄະນະນໍາ ແລະ ບັນດາພະນັກງານກະຊວງການຕ່າງປະເທດ ແຫ່ງ ສປປ ລາວ ທຸກຖ້ວນໜ້າ.

ຕະຫຼອດໄລຍະ 75 ປີຜ່ານມາ, ຂະແໜງການຕ່າງປະເທດຂອງລາວ ສາມາດຍາດໄດ້ໄຊຊະນະຢ່າງໃຫຍ່ຫຼວງຢູ່ເທິງສະໜາມຮົບການຕ່າງປະເທດ ອັນໄດ້ປະກອບສ່ວນສໍາຄັນເຂົ້າໃນການສ້າງສາ ແລະ ປົກປັກຮັກສາປະເທດຊາດ, ເປີດກ້ວາງສາຍພົວພັນມິດຕະພາບ, ການຮ່ວມມືລະຫວ່າງ ສປປ ລາວ ກັບ ບັນດາປະເທດ ແລະ ອົງການຈັດຕັ້ງສາກົນຕ່າງໆ, ກໍຄືໄດ້ຍົກຖານະບົດບາດຂອງ ສປປ ລາວ ທັງໃນພາກພື້ນ ແລະ ສາກົນຂຶ້ນຢ່າງບໍ່ຢຸດຢັ້ງ. ຂ້າພະເຈົ້າ ເຊື່ອໝັ້ນວ່າ, ພາຍໃຕ້ການຊີ້ນໍາ ນໍາພາຂອງສະຫາຍ, ກະຊວງການຕ່າງປະເທດ ຈະສືບຕໍ່ຍາດໄດ້ໄຊຊະນະ ຕາມແນວທາງການຕ່າງປະເທດ ຂອງ ພັກ ແລະ ລັດຖະບານ ແຫ່ງ ສປປ ລາວ ວາງອອກ, ເຊິ່ງຈະເປັນການປະກອບສ່ວນສໍາຄັນເຂົ້າໃນການສ້າງສາ ແລະ ພັດທະນາປະເທດລາວໃຫ້ສວຍສົດງົດງາມ, ຈະເລີນຮຸ່ງເຮືອງ ແລະ ມີການເຊື່ອມໂຍງ.

ປີນີ້ ເປັນປີຄົບຮອບ 75 ປີ ແຫ່ງວັນສ້າງຕັ້ງຂະແໜງການທູດຫວຽດນາມເຊັ່ນດຽວກັນ. ຕະຫຼອດໄລຍະຜ່ານມາ, ຂະແໜງການຕ່າງປະເທດ ຂອງສອງປະເທດພວກເຮົາ ໄດ້ມີການປະສານສົມທົບກັນຢ່າງມີປະສິດທິຜົນສູງ, ຄຽງບ່າຄຽງໃຫຼ່ກັນ ແລະ ສະໜັບສະໜູນເຊິ່ງກັນ ແລະ ກັນ ບົນຈິດໃຈຄວາມເປັນປະເທດເພື່ອນມິດຍຸດທະສາດແບບພິເສດ ແລະ ຊ່ວຍເຫຼືອເຊິ່ງກັນ ແລະ ກັນ ເພື່ອຜັນຂະຫຍາຍພາລະກິດການເມືອງ ທີ່ ພັກ ແລະ ລັດຖະບານ ມອບ   ໝາຍໃຫ້ມີຜົນສໍາເລັດຕົວຈິງ. ຂ້າພະເຈົ້າເຊື່ອໝັ້ນວ່າ​ ການພົວພັນຮ່ວມມື, ຄວາມສາມັກຄີພິເສດນີ້ ຈະໄດ້ຮັບການສືບທອດ ແລະ ເສີມຂະຫຍາຍຈາກບັນດາການນໍາ ກໍ່ຄືພະນັກງານຂະແໜງການຕ່າງປະເທດ ຂອງສອງປະເທດ ໃນຊຸມປີຕໍ່ໜ້າ ບົນຈິດໃຈປ່ຽນແປງໃໝ່ ຢ່າງມີຫົວຄິດປະດິດສ້າງ ແລະ ເປັນເຈົ້າການ.

ຂໍອວຍພອນໃຫ້ສະຫາຍ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ສືບຕໍ່ຍາດໄດ້ໄຊຊະນະອັນໃໝ່. ຂ້າພະເຈົ້າ ຂໍຝາກຄໍາຢ້ຽມຢາມຖາມຂ່າວອັນສະໜິດສະໜົມ,​ ມິດຕະພາບອັນດູດດື່ມຜ່ານສະຫາຍ ໄປຍັງຄະນະນໍາ ແລະ ພະນັກງານກະຊວງການຕ່າງປະເທດລາວ ທຸກຖ້ວນໜ້າມານະໂອກາດນີ້ດ້ວຍ.

ຟ້າມ ບິ່ງ ມິງ

ຮອງນາຍົກລັດຖະມົນຕີ

ລັດຖະມົນຕີກະຊວງການຕ່າງປະເທດ

ແຫ່ງ ສາທາລະນະລັດ ສັງຄົມນິຍົມ ຫວຽດນາມ