ພະນະທ່ານ ພັນຄຳ ວິພາວັນ

ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ພະນະທ່ານ,

ຂ້າພະເຈົ້າ ຂໍສະແດງຄວາມຊົມເຊີຍອັນອົບອຸ່ນ ມາຍັງ ພະນະທ່ານ ທີ່ໄດ້ເລື່ອນຕຳແໜ່ງເປັນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.

ພະນະທ່ານ ໄດ້ມີບົດບາດອັນສຳຄັນໃນການເສີມສ້າງສາຍພົວພັນສອງຝ່າຍຂອງພວກເຮົາ ໃນໄລຍະທີ່ ພະນະທ່ານ ດຳລົງຕຳແໜ່ງເປັນ ລັດຖະມົນຕີກະຊວງສຶກສາທິການ ແລະ ກິລາ ແລະ ຂ້າພະເຈົ້າ ເຊື່ອໝັ້ນວ່າ ສາຍພົວພັນດັ່ງກ່າວ ຈະໄດ້ຮັບການສືບຕໍ່ເສີມຂະຫຍາຍ ພາຍໃຕ້ການຊີ້ນຳ-ນຳພາຂອງ ພະນະທ່ານ. ຂ້າພະເຈົ້າ ຫວັງວ່າ ຈະໄດ້ເຮັດວຽກຮ່ວມກັບ ພະນະທ່ານ ເພື່ອສົ່ງເສີມວິໄສທັດ ອິນໂດ-ປາຊີຟິກ ທີ່ເປີດກວ້າງ ແລະ ຈະເລີນຮຸ່ງເຮືອງ ແລະ ມຸ້ງມາດປາດຖະໜາໃນການເປັນຄູ່ຮ່ວມມືຍຸດທະສາດຮອບດ້ານກັບ ອາຊຽນ ຂອງ ອົດສະຕຣາລີ.

ອົດສະຕຣາລີ ແລະ ລາວ ມີສາຍພົວພັນມິດຕະພາບອັນຍາວນານ, ຊຶ່ງພວກເຮົາ ຈະຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 70 ປີ ໃນເດືອນມັງກອນ 2022 ທີ່ຈະມາເຖິງນີ້. ອົດສະຕຣາລີ ຈະສືບຕໍ່ຢືນຄຽງຂ້າງ ສປປ ລາວ. ອົດສະຕຣາລີ ໄດ້ໃຫ້ສັນຍາວ່າ ຈະໃຫ້ການຊ່ວຍເຫຼືອ ຈຳນວນ 15,2 ລ້ານໂດລາອົດສະຕຣາລີ ເພື່ອຈັດຊື້ ແລະ ຂົນສົ່ງວັກແຊັງສຳລັບພະຍາດໂຄວິດ-19 ທີ່ ປອດໄພ ແລະ ມີປະສິດທິຜົນ. ຂ້າພະເຈົ້າ ມີຄວາມຍິນດີທີ່ໄດ້ຮັບຂ່າວວ່າ ວັກແຊັງ ງວດທຳອິດ ທີ່ ອົດສະຕຣາລີ ມີສ່ວນຮ່ວມໃຫ້ການຊ່ວຍເຫຼືອໄດ້ສົ່ງເຖິງ ສປປ ລາວ ໃນວັນທີ 20 ມີນາ 2021 ທີ່ຜ່ານມາ.

ອົດສະຕຣາລີ ມີຄວາມໝາຍໝັ້ນທີ່ຈະຊ່ວຍເຫຼືອ ສປປ ລາວ ໃນການຟື້ນຟູເສດຖະກິດ. ຜ່ານການຮ່ວມມືແມ່ນ້ຳຂອງ-ອົດສະຕຣາລີ ອັນໃໝ່ ທີ່ ຂ້າພະເຈົ້າ ໄດ້ປະກາດໃນເດືອນພະຈິກ 2020 ທີ່ຜ່ານມາ, ອົດສະຕຣາລີ ຈະໃຫ້ການຊ່ວຍເຫຼືອທີ່ສຳຄັນອັນໃໝ່ ໃນການຟື້ນຟູຄວາມເຂັ້ມແຂງທາງດ້ານເສດຖະກິດ ແລະ ສິ່ງແວດລ້ອມໃຫ້ກັບຄືນສູ່ສະພາບປົກກະຕິ ແລະ ລວມທັງການໃຫ້ທຶນການສຶກສາໃຫມ່ ໃນການສ້າງຄວາມອາດສາມາດໃຫ້ແກ່ຊັບພະຍາກອນມະນຸດ.

ຂ້າພະເຈົ້າ ເຊື່ອຫມັ້ນວ່າ ສາຍພົວພັນມິດຕະພາບ ລະຫວ່າງ ສອງປະເທດພວກເຮົາ ຈະສືບຕໍ່ແຕກດອກອອກຜົນ ແລະ ຂໍຖືໂອກາດນີ້ ອວຍພອນໃຫ້ ພະນະທ່ານ ແລະ ຄອບຄົວ ໂຊກດີປີໃໝ່ລາວ.

ດ້ວຍຄວາມນັບຖືຢ່າງສູງ.

(ລາຍເຊັນ)

ສະກ໋ອດ ໂມຣິຊັນ

ນາຍົກລັດຖະມົນຕີ ແຫ່ງ ອົດສະຕຣາລີ