ພະນະທ່ານ ພັນຄຳ ວິພາວັນ

ນາຍົກລັດຖະມົນຕີ ແຫ່ງ ສປປ ລາວ

ທີ່ ນະຄອນຫຼວງວຽງຈັນ

ພະນະທ່ານ,

ໃນນາມລັດຖະບານ ແລະ ປະຊາຊົນ ມາເລເຊຍ, ຂ້າພະເຈົ້າ ຂໍຖືເປັນກຽດສົ່ງຄຳຊົມເຊີຍອັນອຸ່ນມາຍັງ ພະນະທ່ານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໃນໂອກາດສະເຫຼີມສະຫຼອງຄົບຮອບ 55 ປີ ແຫ່ງ ການສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ ແລະ ມາເລເຊຍ.

ໂດຍປະຕິບັດຕາມການພົວພັນຮ່ວມມືສອງຝ່າຍທີ່ເຂັ້ມແຂງ, ຂ້າພະເຈົ້າ ເຊື່ອໝັ້ນວ່າ ສປປ ລາວ ແລະ ມາເລເຊຍ ຈະສາມາດຜ່ານຜ່າສະພາບການແຜ່ລະບາດຂອງພະຍາດໂຄວິດ-19 ແລະ ກ້າວໄປສູ່ການພັດທະນາເສດຖະກິດ ແລະ ນໍາເອົາຜົນປະໂຫຍດຮ່ວມກັນໃນອະນາຄົດ.

ດ້ວຍຄວາມນັບຖືຢ່າງສູງ,

ຕັນ ສຣິ ດາໂຕະ ຮາຈີ ມາຮິດດິນ ບິນ ຮາຈີ ມູຢິດດິນ ຢັດຊິນ

------------------------------------------------------------------------------------------------

ພະນະທ່ານ ສະເຫຼີມໄຊ ກົມມະສິດ

ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ

ທີ່ ນະຄອນຫຼວງວຽງຈັນ

ພະນະທ່ານ,

ຂ້າພະເຈົ້າ ມີຄວາມປິຕິຍິນດີ ສົ່ງຄຳຊົມເຊີຍອັນອົບອຸ່ນມາຍັງ ພະນະທ່ານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເນື່ອງໃນໂອກາດຄົບຮອບ 55 ປີ ແຫ່ງ ການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ມາເລເຊຍ. ຂ້າພະເຈົ້າ ຂໍສະແດງຄວາມຂອບໃຈມາຍັງນັກການທູດ ແລະ ພະນັກງານກະຊວງການຕ່າງປະເທດ ແຫ່ງ ສປປ ລາວ ທຸກຖ້ວນໜ້າ ທີ່ໄດ້ອຸທິດຕົນໂດຍທີ່ບໍ່ຮູ້ອິດຮູ້ເມື່ອຍ ແລະ ເຮັດວຽກຢ່າງຫ້າວຫັນ ເພື່ອຊຸກຍູ້ເຮັດໃຫ້ການພົວພັນຮ່ວມມືສອງຝ່າຍຂອງພວກເຮົາ ໄດ້ຮັບຜົນສຳເລັດ.

ຂ້າພະເຈົ້າ ມີຄວາມຍິນດີທີ່ເຫັນວ່າ ສປປ ລາວ ແລະ ມາເລເຊຍ ມີສາຍພົວພັນທີ່ດີງາມຮ່ວມກັນມາໂດຍຕະຫຼອດ ນັບຕັ້ງແຕ່ມື້ສ້າງຕັ້ງສາຍພົວພັນທາງການທູດ ໃນປີ 1966 ແລະ ເປັນຄູ່ຮ່ວມພິເສດພາຍໃຕ້ຂອບການຮ່ວມມືອາຊຽນ.

ຂ້າພະເຈົ້າ ຫວັງຢ່າງຍິ່ງວ່າ ຈະໄດ້ເດີນທາງມາຢ້ຽມຢາມ ແລະ ເປັນປະທານຮ່ວມກອງປະຊຸມ ຄະນະກໍາມາທິການຮ່ວມວ່າດ້ວຍການຮ່ວມມືສອງຝ່າຍ ຄັ້ງທີ 4 (JCBC 4) ທີ່ ນະຄອນຫຼວງວຽງຈັນ. ຂ້າພະເຈົ້າ ຈະປືກສາຫາລືການເສີມຂະຫຍາຍການພົວພັນຮ່ວມມື ພາຍຫຼັງການແຜ່ລະບາດຂອງພະຍາດໂຄວິດ-19 ເຊັ່ນ: ການຮ່ວມມືຮອບດ້ານຈະເຮັດໃຫ້ສອງປະເທດຂອງພວກເຮົາ ສາມາດປະຕິບັດເປົ້າໝາຍ ແລະ ໂຄງການຕ່າງໆທີ່ຕັ້ງໄວ້ ເພື່ອຂະຫຍາຍການພົວພັນໄປໃນຫຼາຍຂົງເຂດ ລວມທັງການຄ້າ, ການລົງທຶນ, ການສ້າງຂີດຄວາມສາມາດ ແລະ ການຊ່ວຍເຫຼືອດ້ານເຕັກນິກ ເພື່ອສະໜັບສະໜູນແຜນພັດທະນາເສດຖະກິດ-ສັງຄົມຂອງ ສປປ ລາວ ແລະ ສົ່ງເສີມການໄປມາຫາສູ່ລະຫວ່າງປະຊາຊົນ.

ເນື່ອງໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍຖືໂອກາດນີ້ສະເຫຼີມສະຫຼອງບັນດາຜົນສໍາເລັດທີ່ພວກເຮົາຍາດມາໄດ້ເຖິງ 55 ປີ ແຫ່ງການຮ່ວມມືມິດຕະພາບອັນໃກ້ຊິດ ແລະ ຂໍອວຍພອນໄຊໃຫ້ ພະນະທ່ານ ຈົ່ງສືບຕໍ່ປະສົບຜົນສຳເລັດ ແລະ ມີພະລານາໄມສົມບູນໃນຊຸມປີຕໍ່ໜ້າ.

ດ້ວຍຄວາມນັບຖືຢ່າງສູງ,

ຮິດຊໍາມຸດດິນ ຕຸນ ຮຸດສ໌ເຊນ