ຊົມເຊີຍຜົນສໍາເລັດກອງປະຊຸມໃຫຍ່ ຄັ້ງທີ X ຂອງພັກ ຢ່າງສຸດໃຈ ! ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ ! ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ ! ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ
a
ເຊື່ອມຕໍ່ເວັບໄຊພາຍໃນລາວ
Lao Government
Law Project
UN
Lao PDR Trade Portal

ຖະແຫລງການຮ່ວມ ລາວ-ຫວຽດນາມ

 

1. ຕອບ​ສະໜອງຕາມ​ຄຳ​ເຊີນ​ຂອງ ​ສະຫາຍ ບຸນ​ຍັງ ວໍລະ​ຈິດ, ​ເລຂາທິການ​ໃຫຍ່​ຄະນະ​ບໍລິ​ຫານ​ງານ​ສູນ​ກາງ​ພັກ​ ປະຊາຊົນ ປະຕິວັດ​ລາວ, ປະທານ​ປະ​ເທດ​ ແຫ່ງ​ ສາທາລະນະ​ລັດ ປະຊາທິປະ​ໄຕ ປະຊາຊົນລາວ, ສະຫາຍ ຫງວຽນ​ຟູຈ້ອງ, ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດຫວຽດນາມ, ປະທານປະເທດ ແຫ່ງ ສາທາລະນະລັດ ສັງຄົມນິຍົມຫວຽດນາມ ແລະ ຄະນະ​ຜູ້​ແທນ​ຂັ້ນ​ສູງ​ພັກ, ລັດ ສາທາລະນະລັດ ສັງຄົມນິຍົມ ຫວຽດນາມ ໄດ້ດຳເນີນການ​ຢ້ຽມຢາມ​ສັນຖະວະ​ໄມຕີ ສາທາລະນະ​ລັດ ປະຊາທິປະ​ໄຕ ປະຊາຊົນລາວ​ຢ່າງ​ເປັນ​ທາງ​ການ ແຕ່​ວັນ​ທີ 24 ຫາວັນທີ 25 ກຸມພາ 2019.

2. ໃນ​ບັນຍາກາດ​ທີ່​ເຕັມ​ໄປ​ດ້ວຍ​ໄມຕີ​ຈິດ​ມິດຕະພາບ, ຄວາມ​ສາມັກຄີ​ພິ​ເສດ​ແລະ ​ເຊື່ອ​ໝັ້ນ​ເຊິ່ງກັນ ​ແລະ ກັນ, ສອງ​ຝ່າຍ​ໄດ້​ແຈ້ງ​ໃຫ້​ກັນ​ຊາບ​ກ່ຽວ​ກັບ​ສະພາບ​ທີ່​ພົ້ນ​ເດັ່ນ​ຂອງ​ແຕ່​ລະ​ພັກ, ​ແຕ່ລະ​ປະ​ເທດ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກ ແລະ ທິດທາງ, ໜ້າທີ່ຈຸດສຸມໃນຕໍ່ໜ້າ; ແລກປ່ຽນ​ຄຳ​ຄິດ​​ເຫັນ​ກ່ຽວ​ກັບ​ແຜນນະ​ໂຍບາຍ, ມາດ​ຕະການ ​ເພື່ອສືບ​ຕໍ່ເຮັດໃຫ້ສາຍ​ພົວພັນ​ມິດຕະພາບ​ອັນຍິ່ງໃຫຍ່, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ ລະຫວ່າງ ລາວ-ຫວຽດນາມ ໃຫ້​ນັບ​ມື້​ໄດ້​ຮັບ​ການ​ເສີມ​ຂະຫຍາຍ​ເຂົ້າ​ສູ່​ລວງກວ້າງ ແລະ ລວງ​ເລິກ, ມີ​ປະສິດທິ​ຜົນ ແລະ ແທດຕົວຈິງໃນທຸກຂົງເຂດ, ປະກອບສ່ວນເຂົ້າໃນການປະຕິບັດແນວທາງການປ່ຽນແປງໃໝ່ຂອງແຕ່ລະພັກຢ່າງມີໄຊ; ພ້ອມ​ກັນ​ນັ້ນ, ໄດ້​​ແລກປ່ຽນ​ຄຳ​ຄິດ​ຄຳ​ເຫັນນຳກັນ ກ່ຽວ​ກັບ ບັນຫາພາກພື້ນ ​ແລະ ສາກົນ ທີ່​ສອງ​ຝ່າຍ​ຕ່າງມີ​ຄວາມ​ສົນ​ໃຈ.

3. ສະຫາຍ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດລາວ ພ້ອມດ້ວຍບັນດາການນຳຂັ້ນສູງຂອງລາວ ແລະ ສະຫາຍ ຫງວຽນຟູຈ້ອງ, ເລຂາທິການໃຫຍ່, ປະທານປະເທດ ຫວຽດນາມ ໄດ້ສະແດງຄວາມຊົມເຊີຍຕໍ່ຜົນສຳເລັດອັນໃຫຍ່ຫຼວງ, ມີຄວາມໝາຍປະຫວັດສາດທີ່ຍາດມາໄດ້ໃນໄລຍະ 30 ກວ່າປີແຫ່ງການປະຕິບັດແນວທາງປ່ຽນແປງໃໝ່ຂອງແຕ່ລະປະເທດ ແລະ ບັນດາຜົນສຳເລັດທີ່ສຳຄັນຍາດມາໄດ້ໃນໄລຍະ 3 ປີແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຂອງແຕ່ລະພັກ; ສະແດງຄວາມເຊື່ອ ໝັ້ນຢ່າງໜັກແໜ້ນ​ວ່າ ພາຍໃຕ້ການນຳພາຂອງພັກປະຊາຊົນ ປະຕິວັດລາວ ແລະ ພັກກອມມູນິດ ຫວຽດນາມ, ພາລະກິດການປ່ຽນແປງໃໝ່, ການປົກປັກຮັກສາແລະສ້າງສາພັດທະນາປະເທດຊາດຢູ່ລາວ ແລະ ຫວຽດນາມ ຈະສືບຕໍ່ຍາດໄດ້ຜົນສຳເລັດໃໝ່, ໃຫຍ່ຫຼວງກວ່າເກົ່າ, ສືບຕໍ່ຍົກສູງຖານະບົດບາດ​ຂອງສອງປະເທດ ຢູ່ໃນພາກພື້ນ ແລະໃນໂລກ ຢ່າງບໍ່ຢຸດຢັ້ງ.

4. ສອງ​ຝ່າຍ ສືບຕໍ່​ຢືນຢັນ​ວ່າ​ ສາຍ​ພົວພັນ​ມິດຕະພາບ​ອັນຍິ່ງໃຫຍ່, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ ລາວ-ຫວຽດນາມ, ຫວຽດນາມ-ລາວ ​ໂດຍ​ແມ່ນ​ ປະ​ທານ ​ໂຮ່ຈີມີ​ນ ຜູ້​ຍິ່ງ​ໃຫຍ່ ແລະ ປະທານ ​ໄກສອນ ພົມວິຫານ, ປະທານ ສຸພານຸວົງ ທີ່​ແສນເຄົາ​ລົບ​ຮັກ ໄດ້ກໍ່ຕັ້ງຂຶ້ນ ແລະ​ ບັນດາ​​ການ​ນຳ​ຮຸ່ນຕ່າງໆຂອງ​ສອງພັກ, ສອງລັດ ​ແລະ ປະຊາຊົນ​ສອງ​ຊາດໄດ້​ອອກເຫື່ອ​ເທ​ແຮງເພີ່ມ​ພູນ​ຄູນ​ສ້າງນັ້ນ ໄດ້ກາຍເປັນ​ມໍລະດົກ​ອັນ​ລໍ້າ​ຄ່າ​ລວມ​ຂອງສອງ​ພັກ, ສອງ​ຊາດ, ​​ເປັນ​ປັດໃຈຮັບປະກັນໃຫ້ແກ່​ການ​ຄົງ​ຕົວ ​ແລະ ຂະຫຍາຍຕົວ​ຂອງ​​ສອງປະ​ເທດ. ສອງພັກ, ສອງລັດ ແລະ ປະຊາຊົນສອງຊາດມີໜ້າທີ່ພັນທະພ້ອມກັນປົກປັກຮັກສາ,​ ສືບຕໍ່ເພີ່ມພູນຄູນສ້າງສາຍ​ພົວພັນ​ດັ່ງກ່າວ ໃຫ້ຂະຫຍາຍ ຕົວຂຶ້ນສູ່ລະດັບສູງອັນໃໝ່.​ ພ້ອມດຽວກັນ, ສອງຝ່າຍ ຢືນຢັນວ່າ ລາວ ແລະ ຫວຽດນາມ ຈະເດັດ ດ່ຽວເດີນຕາມເສັ້ນທາງແຫ່ງເອກະລາດແຫ່ງຊາດ ແລະ ສັງຄົມນິຍົມ, ພ້ອມກັນສ້າງສາພັດທະນາປະເທດຊາດໃຫ້ມີສັນຕິພາບ ແລະ ຈະເລີນຮຸ່ງເຮືອງຕະຫຼອດໄປ.

5. ສອງຝ່າຍເປັນເອກະພາບກັນສືບຕໍ່ປະສານສົມທົບກັນຢ່າງແໜ້ນແຟ້ນໃນການປະຕິບັດບັນດາຂໍ້ຕົກລົງ ລະຫວ່າງ ການນໍາຂັ້ນສູງຂອງສອງພັກ, ສອງປະເທດ, ບັນດາຖະແຫຼງການຮ່ວມລາວ-ຫວຽດນາມໃນໂອກາດການຢ້ຽມຖາມສັນຖະວະໄມຕີຢ່າງເປັນທາງການຂອງການນໍາຂັ້ນສູງສອງພັກ, ສອງລັດໃນໄລຍະມໍ່ໆມານີ້ ບົນພື້ນຖານແຫ່ງການເສີມຂະຫຍາຍຈິດໃຈແຫ່ງຄວາມເປັນເອກະລາດ, ເປັນເຈົ້າຕົນເອງ, ຮ່ວມມືຢ່າງສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ,​ ສົມທົບຢ່າງກົມກຽວລະຫວ່າງລັກສະນະພິເສດຂອງການພົວພັນ ລາວ-ຫວຽດນາມກັບປະເພນີສາກົນ, ໃຫ້ບູລິມະສິດການຜ່ອນຜັນແກ່ກັນ ແລະ ກັນ, ຊ່ວຍໜູນ ແລະສ້າງເງື່ອນໄຂທີ່ສະດວກໃຫ້ແກ່ກັນເພື່ອພ້ອມກັນພັດທະນາ ເພື່ອຄວາມສົມບູນພູນສຸກຂອງປະຊາຊົນແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາຢູ່ໃນອາຊີຕາເວັນອອກສຽງໃຕ້ ແລະ ໃນໂລກ.

6. ສອງຝ່າຍ​ເຫັນ​ດີ​ເປັນ​ເອກະ​ພາບ​​ກັນໃນການເພີ່ມ​ທະວີ​ ແລະສືບຕໍ່ນໍາເອົາການພົວພັນທາງດ້ານການເມືອງກ້າວເຂົ້າສູ່ລວງເລິກ, ກໍານົດທິດທາງໃຫ້ແກ່ການພົວພັນຮ່ວມມືລວມຂອງສອງປະເທດ; ຍົກສູງປະສິດທິຜົນການຮ່ວມມື ລະຫວ່າງບັນດາຄະນະຂອງສູນກາງພັກ, ບັນດາກະຊວງ, ຂະແໜງການຂອງລັດຖະບານ, ບັນດາກໍາມາທິການຂອງສະພາແຫ່ງຊາດ, ແນວໂຮມ, ອົງການຈັດຕັ້ງມະຫາຊົນ, ອົງການ ຈັດຕັ້ງປະຊາຊົນ ແລະບັນດາທ້ອງຖິ່ນຂອງສອງປະເທດ; ລົງເລິກການແລກປ່ຽນທາງດ້ານທິດສະດີ-ພຶດ ຕິກໍາ, ແລກປ່ຽນບົດຮຽນໃນວຽກງານກໍ່ສ້າງພັກ, ຖືສໍາຄັນການກໍ່ສ້າງ, ບໍາລຸງພະນັກງານການນໍາ, ຄຸ້ມຄອງແຕ່ລະຂັ້ນ; ກໍ່ສ້າງລະບົບການເມືອງໃຫ້ກະທັດຮັດ, ​ມີປະສິດທິພາບ, ປະສິດທິຜົນ; ພັດທະນາເສດ ຖະກິດ-ສັງຄົມ, ການເປີດກວ້າງວຽກງານການຕ່າງປະເທດ ແລະ ການເຊື່ອມໂຍງສາກົນ; ຍູ້ແຮງການໂຄສະນາສຶກສາກ່ຽວກັບມູນເຊື້ອການພົວພັນພິເສດ ລາວ-ຫວຽດນາມໃຫ້ບັນດາຊັ້ນຄົນຕ່າງໆ, ໂດຍສະເພາະແມ່ນ ຄົນຮຸ່ນໜຸ່ມຂອງສອງປະເທດ; ຈັດຕັ້ງຜັນຂະຫຍາຍແຜນແມ່ບົດນໍາເອົາບັນດາເນື້ອໃນປະຫວັດສາດແຫ່ງການພົວພັນພິເສດ ລາວ-ຫວຽດນາມ ເຂົ້າໃນຫຼັກສູດການສິດສອນຢູ່ສະຖາບັນການສຶກສາຂອງສອງປະເທດ; ສືບຕໍ່ປະສານສົມທົບກໍ່ສ້າງບັນດາໂຄງການ ແລະ ບູລະນະບັນດາຮ່ອງຮອຍທາງປະຫວັດສາດ ກ່ຽວກັບການພົວພັນພິເສດ ລາວ-ຫວຽດນາມຢູ່ແຕ່ລະປະເທດ; ປະສານສົມທົບຈັດຕັ້ງການສະເຫຼີມສະຫຼອງບັນດາເຫດການວັນສໍາຄັນຕ່າງໆຂອງສອງພັກ, ສອງລັດ ເປັນຢ່າງດີ.

7. ສອງ​ຝ່າຍເປັນເອກະພາບຊຸກຍູ້ຢ່າງແຂງແຮງ, ຍົກສູງປະສິດທິຜົນຂອງການຮ່ວມມືທາງດ້ານ​ເສດຖະກິດ, ວັດທະນະທຳ, ການສຶກສາ, ສາທາລະນະສຸກ, ວິທະຍາສາດ-​ເຕັກນິກ ບົນພື້ນຖານການເສີມຂະຫຍາຍທ່າແຮງບົ່ມຊ້ອນຂອງແຕ່ລະປະເທດ; ຍູ້ແຮງການຜັນຂະຫຍາຍບັນດາຂໍ້ຕົກລົງຂັ້ນສູງ, ສົນທິສັນຍາການຮ່ວມມື ລະຫວ່າງ ສອງລັດຖະບານ ແລະ ບັນດາໂຄງການ, ແຜນການຮ່ວມມື ລະຫວ່າງ ສອງປະເທດຢ່າງມີປະສິດທິຜົນ; ເຈລະຈາລົງນາມເຊັນບັນດາສັນຍາ/ຂໍ້ຕົກລົງ ສະບັບໃໝ່ ແລະ ສືບຕໍ່ປັບປຸງ, ເພີ່ມເຕີມບາງສັນຍາ/ຂໍ້ຕົກລົງຈໍານວນໜຶ່ງ ເພື່ອສ້າງເງື່ອນໄຂດ້ານນິຕິກໍາອັນສະດວກໃນການຮ່ວມມືໃນຂົງເຂດຕ່າງໆ ແລະ ໃຫ້ບູລິມະສິດໃນການເພີ່ມທະວີການເຊື່ອມຕໍ່, ການຊ່ວຍໜຸນ ລະຫວ່າງ ພື້ນຖານເສດຖະກິດຂອງສອງປະເທດ, ໂດຍສະເພາະແມ່ນ ການເຊື່ອມຕໍ່ທາງຄົມມະນາຄົມຂົນສົ່ງ, ພະລັງງານໄຟຟ້າ, ໂທລະຄົມມະນາຄົມ, ການທ່ອງທ່ຽວ ແລະ ຫວຽດນາມ ສ້າງທຸກເງື່ອນໄຂທີ່ອໍານວຍຄວາມສະດວກທຸກຢ່າງໃຫ້ແກ່ລາວ ເພື່ອສົ່ງອອກ ແລະ ນໍາເຂົ້າສິນຄ້າໂດຍຜ່ານບັນດາທ່າກໍາປັ່ນຂອງ ຫວຽດນາມ. ສອງຝ່າຍ ມີບັນດາມາດຕະການອັນລະອຽດ ເພື່ອຮັບປະກັນຄວາມຄືບໜ້າ ແລະ ຄຸນນະພາບຂອງບັນດາໂຄງການລົງທຶນຂອງ ຫວຽດນາມ ຢູ່ລາວ; ສືບຕໍ່ຍົກສູງຄຸນນະພາບການຮ່ວມມືທາງດ້ານການສຶກສາ, ກໍ່ສ້າງ ແລະ ພັດທະນາຊັບພະຍາກອນມະນຸດ, ໃນນັ້ນຖືສໍາຄັນການກໍ່ສ້າງຊັບພະຍາກອນມະນຸດໃຫ້ມີຄຸນນະພາບສູງ.

8. ສອງ​ຝ່າຍເນັ້ນໜັກເຖິງຄວາມສໍາຄັນ ແລະ ​​ເຫັນ​ດີ​ເປັນ​ເອກະ​ພາບ​ກັນໃນການ​​ເພີ່ມ​ທະວີ​ການ​ຮ່ວມ​ມືທີ່ເປັນເສົາຫຼັກໃນ​ຂົງ​ເຂດ​ປ້ອງ​ກັນຊາ​ດ, ປ້ອງ​ກັນ​ຄວາມ​ສະຫງົບ ເພື່ອແນໃສ່​​ຮັບປະກັນ​ສະ​ຖຽນລະ​ພາບ​ທາງ​ການ​ເມືອງ, ຄວາມ​ເປັນ​ລະບຽບ​ຮຽບຮ້ອຍແລະ ຄວາມສະຫງົບ​ດ້ານ​ສັງຄົມ​ຢູ່​ແຕ່ລະ​ປະ​ເທດ; ຈັດຕັ້ງປະຕິບັດບັນດາອານຸສັນຍາ ແລະ ແຜນການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບຢ່າງມີປະສິດທິຜົນ; ຜັນຂະຫຍາຍສັນຍາວ່າດ້ວຍກົດລະບຽບການຄຸ້ມຄອງເຂດຊາຍແດນ ແລະ ດ່ານຊາຍແດນ; ອານຸສັນຍາວ່າດ້ວຍເສັ້ນຊາຍແດນ ແລະ ຫຼັກໝາຍຊາຍແດນຢ່າງມີປະສິດທິຜົນ; ສູ້ຊົນແກ້ໄຂບັນຫາການເຄື່ອນຍ້າຍພູມລໍາເນົາຕາມລໍາພັງໃຈ ແລະ ການແຕ່ງງານບໍ່ຖືກຕ້ອງຕາມກົດໝາຍ ຢູ່ບໍລິເວນຊາຍແດນຂອງສອງປະເທດໃຫ້ສໍາເລັດໂດຍໄວ; ສ້າງເສັ້ນຊາຍແດນ ລາວ-ຫວຽດນາມ ໃຫ້ມີສັນຕິພາບ, ມິດຕະພາບ, ສະຖຽນລະພາບ, ການຮ່ວມມື ແລະ ພັດທະນາແບບຍືນຍົງ; ຕ້ານ ແລະ ສະກັດກັ້ນອາດຊະຍາກຳຂ້າມຊາດປະເພດຕ່າງໆ, ການຄ້າຂາຍເຖື່ອນ, ຂົນສົ່ງສິ່ງເສບຕິດ; ສືບຕໍ່ອອກແຮງປະສານສົມທົບໃນການຊອກຄົ້ນຫາ ແລະ ຈັດສົ່ງອັດຖິຂອງທະຫານອາສາສະໝັກ ແລະ ຊ່ຽວຊານ ຫວຽດນາມ ທີ່ເສຍສະຫຼະຊີວິດ ໃນປາງສົງຄາມຢູ່ລາວ ກັບຄືນປະເທດ.

9. ສອງ​ຝ່າຍ ​ເປັນເອກະພາບກັນແລກປ່ຽນຂໍ້ມູນຂ່າວສານຢ່າງທັນການ ແລະ ​ປະ​ສານສົມທົບ​ກັນ​ຢ່າງ​ແໜ້ນ​ແຟ້ນ​, ມີປະສິດທິຜົນ, ສະໜັບສະໜຸນເຊິ່ງກັນ ແລະ ກັນໃນ​ບັນຫາພາກ​ພື້ນ ແລະ ສາກົນ,​ເປັນ​ຕົ້​ນ​ແມ່ນ ​ໃນຂອບການຮ່ວມມືອາ​ຊຽນ, ​ອົງການ​ສະຫະ​ປະຊາ​ຊາດ ​ແລະ ບັນດາ​ກົນ​ໄກ​ການຮ່ວມ​ມື​ອະນຸ​ພາກ​ພື້ນແມ່ນໍ້າຂອງ, ປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ ແລະ ໃນໂລກ; ເພີ່ມທະວີການປະສານສົມທົບກັບກໍາປູເຈຍ ຊຸກຍູ້ການຈັດຕັ້ງຜັນຂະຫຍາຍຂໍ້ຕົກລົງ ລະຫວ່າງ ສາມນາຍົກລັດຖະມົນຕີ ກ່ຽວກັບ ເຂດສາມຫຼ່ຽມພັດທະນາ ລາວ-ຫວຽດນາມ-ກໍາປູເຈຍ.

10. ສະຫາຍ ບຸນ​ຍັງ ວໍລະ​ຈິດ,​ ​ເລຂາທິການ​ໃຫຍ່, ປະທານ​ປະ​ເທດ ແຫ່ງ ສປປ ລາວ ແລະ ສະຫາຍ ຫງວຽນ​ຟູຈ້ອງ, ເລຂາທິການ​ໃຫຍ່, ປະທານປະເທດ ແຫ່ງ ສສ. ຫວຽດນາມ ໄດ້ເປັນສັກຂີພິຍານໃນການເຊັນເອກະສານການຮ່ວມມື ລະຫວ່າງ ສອງປະເທດ ຈໍານວນ 09 ສະບັບ, ໃນນັ້ນມີ ສັນຍາ ວ່າດ້ວຍ ການຮ່ວມມືດ້ານການພັດທະນາໂຄງການພະລັງງານໄຟຟ້າ ແລະ ບໍ່ແຮ່, ບົດ​ບັນ​ທຶກການຮ່ວມມືດ້ານການເງິນ, ບົດບັນທຶກສັນຍາ ວ່າດວ້ຍ ການກໍ່ສ້າງ ແລະ ນຳໃຊ້ ເສັ້ນທາງລົດໄຟຫວຸ້ງອ້າງ-ວຽງຈັນ ແລະ ບົດບັນທຶກ, ຂໍ້ຕົກລົງຈຳນວນໜຶ່ງ ກ່ຽວກັບ ການຮ່ວມມື ລະຫວ່າງກະຊວງ, ຂະແໜງການຂອງສອງປະເທດ.

11. ສອງ​ຝ່າຍ​ ຕີລາຄາສູງຕໍ່ຜົນສຳເລັດອັນຈົບງາມ ແລະ ມີຄວາມໝາຍທາງປະຫວັດສາດການຢ້ຽມຢາມ​ສັນຖະວະ​ໄມຕີ ​ສາທາລະນະລັດ ປະຊາທິປະໄຕປະຊາຊົນລາວ ຢ່າງ​ເປັນ​ທາງ​ການ ຂອງ ສະຫາຍ ຫງວຽນຟູ້ຈ້ອງ,​ ເລຂາທິການ​ໃຫຍ່​, ປະທານປະເທດ ແຫ່ງ ສສ ຫວຽດນາມ, ເຊິ່ງເປັນ​ການປະກອບສ່ວນ​​​​ເຂົ້າໃນການນໍາເອົາສາຍ​ພົວພັນ​ມິດຕະພາບ​ອັນ​ຍິ່ງໃຫຍ່, ຄວາມ​ສາມັກຄີ​ພິ​ເສດ ແລະ ການ​ຮ່ວມ​ມື​ຮອບດ້ານ ລາວ-ຫວຽດນາມ​ ນັບ​ມື້​ນັບ​​ໄດ້​ຮັບ​ການ​​ເສີມ​ຂະຫຍາຍເຂົ້າສູ່ລວງເລິກ​, ແທດ​ຕົວ​ຈິງ ແລະ ມີປະສິດທິຜົນ ເພື່ອຜົນປະໂຫຍດຂອງ​ປະຊາຊົນແຕ່ລະ​ປະ​ເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.

ໃນ​​ໄລຍະ​ຢ້ຽມຢາມ, ສະຫາຍ ຫງວຽນ​ຟູຈ້ອງ, ເລຂາທິການ​ໃຫຍ່, ປະທານປະເທດ ແຫ່ງ ສສ. ຫວຽດນາມ​​ໄດ້​ພົບ​ປະເຈລະຈາ​ກັບ ສະຫາຍ ບຸນ​ຍັງ ວໍລະ​ຈິດ,​ ​ເລຂາທິການ​ໃຫຍ່, ປະທານ​ປະ​ເທດ ແຫ່ງ ສປປ ລາວ; ພົບປະແລກປ່ຽນ​ຄຳຄິດ​ເຫັນ​ກັບ ສະຫາຍ ​ ທອງລຸນສີສຸລິດ, ກໍາມະການກົມການ ເມືອງສູນກາງພັກ, ນາຍົກລັດຖະມົນຕີ​ ແລະ ສະຫາຍ ນາງປານີ ຢາທໍ່ຕູ້, ກໍາມະການກົມການເມືອງສູນກາງພັກ, ປະທານ​ສະພາ​ແຫ່ງ​ຊາດ; ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ໄຊສົມພອນ ພົມວິຫານ, ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ; ສະຫາຍ ວິໄລວົງບຸດດາຄໍາ, ກໍາມະການສູນກາງພັກ, ປະທານຄະນະກຳມະທິການແຜນການ, ການເງິນ ແລະການກວດສອບສະພາແຫ່ງຊາດ, ປະທານສະມາຄົມມິດຕະພາບ ລາວ - ຫວຽດນາມ ຂັ້ນສູນກາງ ແລະຢ້ຽມຢາມອະດີດການນໍາ ພັກ-ລັດ ລາວ; ຢ້ຽມຢາມ ແລະກວດກາຄວາມຄືບໜ້າຂອງໂຄງການປຸກສ້າງຫໍສະພາແຫ່ງຊາດລາວ, ເຊິ່ງເປັນຂອງຂວັນຂອງພັກ, ລັດ ແລະ ປະຊາຊົນຫວຽດນາມ; ຢ້ຽມຢາມ ແລະ ໂອ້ລົມກັບພະນັກງານສະຖານທູດ,​ ຕາງໜ້າບັນດາວິສາຫະກິດ ແລະ ຊາວຫວຽດນາມ ທີ່ກໍາລັງດໍາລົງຊີວິດ, ຮໍ່າຮຽນ ແລະເຮັດວຽກຢູ່ລາວ; ຢ້ຽມຢາມພື້ນຖານວັດທະນະທໍາຈໍານວນໜຶ່ງ ຢູ່ນະຄອນຫຼວງວຽງຈັນ.

ສອງຝ່າຍ ສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນ ແລະ ຊ່ວຍເຫລືອອັນໃຫຍ່ຫລວງ, ລ້ຳຄ່າ, ໝົດຈິດໝົດໃຈ, ບໍລິສຸດຜຸດຜ່ອງ ແລະ ມີປະສິດທິຜົນ ຊຶ່ງສອງພັກ, ສອງລັດ ແລະ ປະຊາຊົນສອງປະເທດ ມີໃຫ້ແກ່ກັນ ແລະ ກັນຕະຫຼອດໄລຍະທີ່ຜ່ານມາທັງໃນໄລຍະແຫ່ງການຕໍ່ສູ້ປົດປ່ອຍປະເທດຊາດໃນເມື່ອກ່ອນ ກໍ່ຄືໃນພາລະກິດປ່ຽນແປງໃໝ່ແຫ່ງການສ້າງສາ ແລະ ພັດທະນາປະເທດຊາດ ໃນປັດຈຸບັນ.

ສອງຝ່າຍ ຢືນຢັນສືບຕໍ່ສ້າງເງື່ອນໄຂທີ່ອໍານວຍຄວາມສະດວກໃຫ້ແກ່ຊາວຫວຽດນາມຢູ່ລາວ ແລະ ຊາວລາວ ຢູ່ຫວຽດນາມ ໃນການດໍາລົງຊີວິດ, ທຳມາຫາກິນ, ສຶກສາຮໍ່າຮຽນຢູ່ແຕ່ລະປະເທດ ໂດຍສອດຄ່ອງກັບລະບຽບກົດໝາຍຂອງແຕ່ລະປະເທດ ແລະ ປະເພນີສາກົນ. ຫວຽດນາມ ສະແດງຄວາມຂອບໃຈຕໍ່ ລາວທີ່ໃຫ້ຄວາມສໍາຄັນການປະກອບສ່ວນທີ່ຕັ້ງໜ້າຂອງຊາວຫວຽດນາມ ເຂົ້າໃນພາລະກິດການປົກປັກຮັກສາ ແລະ ພັດທະນາປະເທດລາວ.

ຫວຽດນາມສະແດງຄວາມຂອບໃຈທີ່ລາວ ສະໜັບສະໜູນ ຫວຽດນາມ ລົງສະໝັກເຂົ້າເປັນສະມາຊິກບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດ ສະໄໝ 2020-2021 ແລະ ຮັບໜ້າທີ່ເປັນປະທານອາຊຽນ ໃນປີ 2020 ໃຫ້ມີຜົນສໍາເລັດອັນຈົບງາມ.

ສອງຝ່າຍ ເຫັນດີເປັນເອກະພາບກັນສືບຕໍ່ເພີ່ມທະວີການຮ່ວມມື, ປະສານສົມທົບກັນຢ່າງແໜ້ນແຟ້ນ ແລະ ຮ່ວມກັບບັນດາປະເທດ, ບັນດາອົງການຈັດຕັ້ງສາກົນທີ່ກ່ຽວຂ້ອງເພື່ອຄຸ້ມຄອງ, ຕິດຕາມ, ກວດກາຜົນກະທົບຮອບດ້ານຂອງການນຳໃຊ້ແມ່ນ້ຳຂອງໃຫ້ມີຄວາມປອດໄພ,​ ປະກອບສ່ວນເຂົ້າໃນການພັດທະນາແບບຍືນຍົງ ແລະ ມີປະສິດທິຜົນ, ຮັບປະກັນຜົນປະໂຫຍດຂອງບັນດາປະເທດໃນຂົງເຂດລຽບແມ່ນໍ້າຂອງຢ່າງກົມກຽວ; ສອງຝ່າຍ ປະສານສົມທົບນໍາກັນຢ່າງແໜ້ນແຟ້ນ ໃນຂອບຄະນະກໍາມະການແມ່ນໍ້າຂອງສາກົນ ແລະ ໃນກອບການຮ່ວມມື ແມ່ນໍ້າຂອງ-ແມ່ນ້ຳລ້ານຊ້າງ.

ສອງ​ຝ່າຍ ສືບຕໍ່​ເນັ້ນ​ເຖິງ​ຄວາມ​ສຳ​ຄັນ​ຂອງ​ການ​ປົກ​ປັກ​ຮັກ​ສາ​ສັນ​ຕິ​ພາບ, ສະ​ຖຽນລະ​ພາບ, ຄວາມສະຫງົບ​ ປອດ​ໄພຢູ່ທະ​ເລ​ຈີນ​ໃຕ້ (ຫວຽດນາມ ເອີ້ນວ່າ: ທະເລຕາເວັນອອກ)​; ສະ​ໜັບ​ສະ​ໜູນບົດບາດ ແລະ ບັນດາຫຼັກການຂອງອາຊຽນ; ເປັນເອກະພາບໃນການຊຸກຍູ້ການແກ້ໄຂບັນດາຂໍ້ຂັດແຍ້ງໃນທະເລຈີນໃຕ້ໂດຍສັນຕິວິທີບົນພື້ນຖານກົດໝາຍສາກົນ, ໃນນັ້ນ ມີສົນທິສັນຍາຂອງອົງການສະຫະປະຊາຊາດ ກ່ຽວກັບ ກົດໝາຍວ່າດ້ວຍທະເລ ປີ 1982; ຮ່ວມກັນກັບບັນດາຝ່າຍທີ່ກ່ຽວຂ້ອງປະ​ຕິ​ບັດ​ຖະ​ແຫຼງ​ການ​ ກ່ຽວ​ກັບ​ການ​ປະ​ພຶດ​ຂອງ​ບັນ​ດາ​ຝ່າ​ຍ​ທີ່​ກ່ຽວ​ຂ້ອງ​ຢູ່ ທະ​ເລ​ຈີນ​ໃຕ້ (DOC)​ ຢ່າງຄົບ​ຖ້ວນ ແລະ ມີ​ປະ​ສິດ​ທິ​ຜົນ ແລະ ຊຸກຍູ້ໃຫ້ບັນລຸການສ້າງກົດ​ແຫ່ງ​ການ​ປະ​ພຶດ​ຂອງ​ບັນ​ດາ​ຝ່າຍ​ທີ່​ກ່ຽວ​ຂ້ອງ​ໃນ​ທະ​ເລ​ຈີນ​ໃຕ້ (COC) ໂດຍໄວທີ່ແທດຕົວຈິງ ແລະ ມີປະສິດທິຜົນ, ປະກອບສ່ວນເຂົ້າໃນ​ການ​ປົກ​ປັກຮັກ​ສາ​ສັນ​ຕິ​ພາບ, ສະ​ຖຽນລະ​ພາບ, ຄວາມປອດໄພ, ກາ​ນ​ຮ່ວມ​ມື ແລະ​ ການ​ພັດ​ທະ​ນາ​​ຢູ່​ໃນພາກ​ພື້ນ ແລະ ໃນ​ໂລກ.

ສະຫາຍ ຫງວຽນຟູຈ້ອງ, ເລຂາທິການໃຫຍ່, ປະທານປະເທດ ແຫ່ງ ສສ. ຫວຽດນາມ ໄດ້​ສະ​ແດງຄວາ​ມຂອບ​ອົກ​ຂອບ​ໃຈ​ຢ່າງ​ຈິງ​​ໃຈ​ຕໍ່ພັກ, ລັດ ແລະ ປະຊາຊົນລາວ,​ ຂອບ​ໃຈ​ ສະຫາຍ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ແລະ ບັນດາການນໍາຂັ້ນ​ສູງພັກ, ລັດລາວ ທີ່​ໄດ້​ໃຫ້ການ​ຕ້ອນຮັບຢ່າງ​ສົມ​ກຽດ ​ແລະ ​ເຕັມ​ໄປ​ດ້ວຍ​ຄວາມ​ຮັກ​ແພງ​ຖານ​ສະຫາຍ​ອ້າຍ​ນ້ອງ,​ ເຊິ່ງສະ​ແດງອອກແຈ້ງ​ເຖິງ​ຄວາມ​ມີ​ຊີວິດ​ຊີວາແຫ່ງສາຍ​ພົວພັນ​ຄວາມສາມັກຄີ, ຄວາມສະໜິດແໜ້ນ, ບໍລິສຸດຜຸດຜ່ອງ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ.

ສະຫາຍ ຫງວຽນຟູຈ້ອງ, ເລຂາທິການ​ໃຫຍ່, ປະທານປະເທດ ແຫ່ງ ສສ. ຫວຽດນາມ ໄດ້​ເຊື້​ອ​ເຊີນ ສະຫາຍ ບຸນ​ຍັງ ວໍລະ​ຈິດ, ເລຂາທິການ​ໃຫຍ່, ປະທານ​ປະ​ເທດ​ແຫ່ງ ສປປ ລາວ ​ແລະ ບັນດາສະຫາຍການນຳຂັ້ນ​ສູງຂອງພັກ, ລັດລາວ ​ໄປ​ຢ້ຽມຢາມ​ຫວຽດນາມ. ສະຫາຍ ບຸນ​ຍັງ ວໍລະ​ຈິດ,​ເລຂາທິການ​ໃຫຍ່, ປະທານ​ປະ​ເທດ ແຫ່ງ ສປປລາວ ແລະ ບັນດາການນຳຂັ້ນສູງຂອງ ພັກ, ລັດ ລາວ​ ໄດ້​ສະ​ແດງ​ຄວາມ​ຂອບ​ໃຈ​ຢ່າງ​ຈິງ​ໃຈ ​ແລະ ຕອບ​ຮັບ​ຄຳ​ເຊີນ​ດ້ວຍ​ຄວາມ​ຍິນ​ດີ, ສ່ວນວັນເວລາ​ຂອງ​ການ​ຢ້ຽມຢາມ​ຈະ​​ແຈ້ງ​ຜ່ານ​ທາງ​ການ​ທູດ.

 

                                                 ນະຄອນຫລວງວຽງຈັນ, ວັນ​ທີ 25 ກຸມພາ 2019

 

 

a
ແຈ້ງການ

* ການຈັດຕັ້ງປະຕິບັດ ສັນຍາຍົກເວັ້ນວີຊາ ສຳລັບຜູ້ຖືໜັງສືຜ່ານແດນການທູດ ແລະ ລັດຖະການ ລະຫວ່າງ ລາວ - ຮົງກາລີ.

* ຖະແຫຼງການຂອງກະຊວງການຕ່າງປະເທດ ກ່ຽວກັບ ສະພາບການປະທ້ວງຢູ່ເຂດປົກຄອງພິເສດຮົງກົງ

* ປະກາດ ຄັດເລືອກບຸກຄົນ ຫລື ອົງການຈັດຕັ້ງ ເພື່ອແຂ່ງຂັນຊິງລາງວັນອາຊຽນປະຈຳປີ 2019

* ແຈ້ງການຂອງກະຊວງການຕ່າງປະເທດ ກ່ຽວກັບ ການຂະຫຍາຍເວລາພັກເຊົາຂອງພົນລະເມືອງລາວ ແລະ ບຣູໄນ ທີ່ຖືໜັງສືຜ່ານແດນການທູດ, ລັດຖະການ ແລະ ທໍາມະດາ.

* ແຈ້ງການຂອງກະຊວງການຕ່າງປະເທດ ກ່ຽວກັບ ການຍົກເວັ້ນວີຊາຝ່າຍດຽວໃຫ້ແກ່ພົນລະເມືອງ ທີ່ຖືໜັງສືຜ່ານແດນທຳມະດາຂອງປະເທດ ດານມາກ, ນອກແວ, ແຟງລັງ ແລະ ຊູແອດ.

* ແຈ້ງການຂອງກະຊວງການຕ່າງປະເທດ ກ່ຽວກັບ ການມີຜົນບັງຄັບໃຊ້ ແລະ ຈັດຕັ້ງປະຕິບັດ ສັນຍາຍົກເວັ້ນວີຊາ ສຳລັບຜູ້ຖືໜັງສືຜ່ານແດນການທູດ ລະຫວ່າງ ລາວ ແລະ ອາແຊກບາຍຊານ.

* ແຈ້ງການຂອງກະຊວງການຕ່າງປະເທດ ກ່ຽວກັບ ການມີຜົນບັງຄັບໃຊ້ ແລະ ຈັດຕັ້ງປະຕິບັດ ສັນຍາຍົກເວັ້ນວີຊາ ສຳລັບຜູ້ຖືໜັງສືຜ່ານແດນທຳມະດາ ລະຫວ່າງ ສປປ ລາວ ແລະ ສະຫະພັນ ຣັດເຊຍ.

Lao Government
a
ສາລະຄະດີ 70ປີ ວັນການທູດລາວ

a
ຈຳນວນຜູ້ເຂົ້າຊົມ
191002
ມື້ນີ້94
ມື້ວານ96
ອາທິດນີ້406
ເດືອນນີ້406
a
ຈຳນວນຜູ້ເຂົ້າຊົມຕັ້ງແຕ່ 16 ມີນາ 2015

ຜູ້ເຂົ້າຊົມ: 225710