ການທູດລາວໄດ້ຮັບການພັດທະນາຢ່າງໜັກແໜ້ນ ແລະ ເຂັ້ມແຂງ

(​ແດ່ເນື່ອງ​ໃນ​ໂອກາດຄົບຮອບ 73 ປີ ວັນ​ການ​ທູດ​ລາວ: 12 ຕຸລາ 1945-12 ຕຸລາ 2018)

ວັນທີ 12 ຕຸລາ ຫາກໍຜ່ານພົ້ນໄປ, ເມື່ອທົບທວນຫວນຄືນເຖິງມູນເຊື້ອປະຫວັດສາດຂອງຊາດ, ກ່ອນນີ້ 73 ປີ ຄື ວັນທີ 12 ຕຸລາ ປີ 1945 ຢູ່ທີ່ເດີ່ນກິລາວຽງຈັນ ຫຼື ນະຄອນຫຼວງວຽງຈັນ, ລັດຖະບານລາວອິດສະຫຼະ ໄດ້ປະ ກາດປະເທດລາວເປັນເອກະລາດຕໍ່ໂລກຢ່າງເປັນທາງການ, ມັນແມ່ນໝາກຜົນຂອງການຕໍ່ສູ້ອັນຢືດເຢື້ອຍາວ ນານຂອງປະຊາຊົນລາວທົ່ວທັງຊາດຜ່ານຫຼາຍສະໄໝ, ປະກາດເອກະລາດຂອງຊາດລາວເຮົາຕໍ່ໂລກໃຫ້ໂລກຮັບຮູ້ວ່າ ໃນແຜ່ນດິນແຫ່ງນີ້ມີປະເທດລາວແມ່ນຄົນລາວເປັນເຈົ້າຂອງປະເທດຊາດ ທີ່ມີອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຕົນ. ລັດຖະບານອິດສະຫຼະໄດ້ຮັບການສ້າງຕັ້ງຂື້ນ ແລະ ໄດ້​ປະກາດ​ນະ​ໂຍບາຍການເມືອງ 12 ຂໍ້, ໃນນັ້ນໄດ້ປະກາດນະໂຍບາຍການຕ່າງປະເທດອອກຢ່າງເປັນທາງການ. ດັ່ງນັ້ນ, ວັນທີ 12 ຕຸລາ 1945 ຈິ່ງໄດ້ກາຍເປັນວັນການທູດລາວ. ຕະຫຼອດໄລຍະ 73 ປີ ຜ່ານມາ, ພາຍໃຕ້ການນໍາພາອັນສະຫຼາດ ສ່ອງໃສ ແລະ ປີຊາສາມາດຂອງພັກປະຊາຊົນປະຕິວັດລາວ, ວຽກງານຕ່າງປະເທດໄດ້ປະກອບສ່ວນຢ່າງຕັ້ງ ໜ້າເຂົ້າໃນພາລະກິດຕໍ່ສູ້ກູ້ຊາດ, ສາມາດຍາດໄດ້ໄຊຊະນະໃໝ່ຢ່າງຕໍ່ເນື່ອງ, ຈົນໃນທີ່ສຸດການປະຕິວັດຊາດ ປະຊາ ທິປະໄຕຢູ່ປະເທດເຮົາ ຈິ່ງໄດ້ສໍາເລັດຜົນຢ່າງມີໄຊ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂື້ນໃນວັນທີ 2 ທັນວາ 1975.

ພາຍໃຕ້ລະບອບໃໝ່ອັນສົດໃສ, ການເຄື່ອນໄຫວຕ່າງປະເທດຂອງ ສປປ ລາວ ໄດ້ສືບຕໍ່ເຕີບໃຫຍ່ຂະຫຍາຍຕົວ ແລະ ມີຜົນສໍາເລັດເປັນທີ່ໜ້າພາກພູມໃຈ, ຖັນແຖວຂອງນັກຮົບການເມືອງການຕ່າງປະເທດນັບມື້ເຂັ້ມແຂງ, ຊື່ສຽງບົດບາດຂອງ ສປປ ລາວ ກໍນັບມື້ສູງເດັ່ນຂື້ນຢູ່ໃນເວທີພາກພື້ນ ແລະ ສາກົນ. ສປປ ລາວ ສືບຕໍ່ປະ ຕິບັດແນວທາງການຕ່າງປະເທດທີ່ຖືກຕ້ອງເປັນທໍາ ໂດຍຍຶດໝັ້ນແນວທາງສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ; ສືບຕໍ່ປະຕິບັດຄໍາຂວັນ “ການທູດປ້ອງກັນເຫດ ແລະ ບຸກທະລຸ ເພື່ອ ປົກປັກຮັກສາ ແລະ ພັດທະນາປະເທດຊາດ” ຢ່າງໄດ້ຮັບຜົນດີ, ເຊິ່ງໄດ້ສະແດງອອກໃນການເສີມຂະຫຍາຍ ຮັດແໜ້ນການພົວພັນມິດຕະພາບ ແລະ ການຮ່ວມມືຮອບດ້ານກັບບັນດາປະເທດເພື່ອນມິດຍຸດທະສາດ, ກັບປະເທດເພື່ອນມິດຕ່າງໆໃນທົ່ວໂລກ ອັນໄດ້ນໍາຜົນປະໂຫຍດຕົວຈິງມາສູ່ປະເທດຊາດ.

ເວົ້າໄດ້ວ່າ ວຽກງານການຕ່າງປະເທດໄດ້ປະກອບສ່ວນອັນສໍາຄັນເຂົ້າໃນວຽກງານປົກປັກຮັກສາ ແລະ ສ້າງສາພັດທະນາປະເທດຊາດ, ສ້າງເງື່ອນໄຂເອື້ອອໍານວຍໃຫ້ແກ່ການພັດທະນາເສດຖະກິດ-ສັງຄົມ, ນັບ ທັງການຂົນຂວາຍຍາດແຍ່ງການຊ່ວຍເຫຼືອ ແລະ ລົງທຶນຂອງຕ່າງປະເທດ, ເປັນການປະກອບສ່ວນຮ່ວມກັບຂະ ແໜງການອື່ນໆ ເຂົ້າໃນຜົນສໍາເລັດລວມຂອງຊາດ.

ໃນສະພາບການພາກພື້ນ ແລະ ສາກົນ ທີ່ມີການຜັນປ່ຽນຢ່າງເລິກເຊິ່ງ, ສັບສົນ ແລະ ໄວວານີ້, ການປະ ຕິບັດແນວທາງການຕ່າງປະເທດ ແລະ ເຄື່ອນໄຫວການທູດທີ່ຖືກຕ້ອງ ແລະ ສອດຄ່ອງຍິ່ງມີຄວາມຈໍາເປັນ ແລະ ຕ້ອງການກວ່າເວລາໃດໝົດ ເພື່ອສ້າງເງື່ອນໄຂສະພາບແວດລ້ອມພາຍນອກ ທີ່ເອື້ອອໍານວຍໃຫ້ແກ່ການປົກປັກ ຮັກສາ ແລະ ສ້າງສາພັດທະນາປະເທດຊາດໃຫ້ນັບມື້ນັບເຂັ້ມແຂງ ເພື່ອມຸ້ງສູ່ຄວາມສໍາເລັດໃນເປົ້າໝາຍ ນໍາເອົາປະເທດຊາດຫຼຸດພົ້ນອອກຈາກສະຖານະພາບຄວາມດ້ອຍພັດທະນາ ແລະ ສ້າງປະເທດໃຫ້ເປັນ ປະເທດທີ່ມັ້ງຄັ້ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທໍາ ແລະ ສີວິໄລ. ມະຕິກອງປະຊຸມໃຫຍ່ຄັ້ງທີ X ຂອງພັກ ໄດ້ສືບຕໍ່ຢັ້ງຢືນວ່າ: ພວກເຮົາຕ້ອງສືບຕໍ່ຮັກສາມູນເຊື້ອອັນ ດີງາມໃນການປະຕິບັດບົດບາດໜ້າທີ່ການຕ່າງປະເທດ ພາຍໃຕ້ຄໍາຂວັນ “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ພັັດທະນາປະເທດຊາດ”, ໂດຍຍຶດໝັ້ນແນວທາງການຕ່າງປະເທດຂອງພັກ: ສັນ ຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເປັນເຈົ້າການໃນການ ເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາຄົມອາຊຽນ, ຕາມທິດ ທາງດ້ານວຽກງານການຕ່າງປະເທດ ທີ່ກອງປະຊຸມໃຫຍ່ຄັ້ງທີ X ຂອງພັກວາງອອກ.

ຍ້ອນແນວທາງອັນຖືກຕ້ອງເປັນທຳ ແລະ ການເຄື່ອນໄຫວການທູດທີ່ມີໝາກຜົນດີເປັນກ້າວໆມາຂອງ ພັກ-ລັດ ແລະ ປະຊາຊົນເຮົາ, ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມໃນລະດັບພາກພື້ນ ແລະ ສາກົນຫຼາຍ ຄັ້ງເຊັ່ນ: ກອງປະຊຸມສຸດຍອດອາຊຽນ ຄັ້ງທີ 10 ປີ 2004; ກອງປະຊຸມສຸດຍອດລັດຖະມົນຕີຕ່າງປະເທດອາຊຽນ ຄັ້ງທີ 38 ແລະ ລັດຖະສະພາໄອໂປ ປີ 2005; ກອງປະຊຸມລັດຖະມົນຕີຕ່າງປະເທດໃຊ້ພາສາຝຣັ່ງ ຄັ້ງທີ 23 ປີ 2007; ກອງປະຊຸມສາກົນວ່າດ້ວຍລະເບີດລູກຫວ່ານ ປີ 2010; ກອງປະຊຸມສຸດຍອດອາເຊັມ ຄັ້ງທີ 9 ແລະ ກອງປະຊຸມປິ່ນອ້ອມຕ່າງໆ ປີ 2012, ສປປ ລາວ ໄດ້ເຂົ້າເປັນສະມາຊິກການຄ້າໂລກ (WTO) ໃນເດືອນ ກຸມພາ 2013. ອັນພົ້ນເດັ່ນໃນໄລຍະທີ່ ສປປ ລາວ ເປັນປະທານອາຊຽນໃນປີ 2016 ແມ່ນຜົນສຳເລັດອັນໃຫຍ່ຫຼວງ ໃນການເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມບັນດາ ລັດຖະມົນຕີອື່ນໆທີ່ກ່ຽວຂ້ອງ ແລະ ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະ ຊຸມສຸດຍອດອື່ນໆທີ່ກ່ຽວຂ້ອງ ໃນໄລຍະປີ 2016 ຜ່ານມາ; ສປປ ລາວກໍໄດ້ເປັນກຽດອັນສູງໃນການຕ້ອນ ຮັບການຢ້ຽມຢາມລາວ ຂອງຄະນະຜູ້ແທນຂັ້ນສູງປະເທດເພື່ອນມິດທີ່ສໍາຄັນ ເປັນຕົ້ນແມ່ນ ສສ ຫວຽດນາມ, ສປ ຈີນ, ສະຫະລັດອາເມລິກາ, ສ ເກົາຫຼີ, ຍີ່ປຸ່ນ, ອົງການ ສປຊ ແລະ ປະເທດອື່ນໆ, ເຊິ່ງໄດ້ຢັ້ງຢືນເຖິງຄວາມເຊື່ອໝັ້ນ ຂອງສາກົນຕໍ່ຖານະບົດບາດຂອງ ສປປ ລາວ ໃນເວທີພາກພື້ນ ແລະ ສາກົນ ກໍຄືຕໍ່ການນໍາພາຂອງພັກ-ລັດເຮົາ, ທັງ ເປັນການຢັ້ງຢືນເຖິງໝາກຜົນຂອງການເຄື່ອນໄຫວການຕ່າງປະເທດທີ່ຕັ້ງໜ້າ, ບໍ່ຮູ້ອິດຮູ້ເມື່ອຍຂອງການນໍາພັກ-ລັດ ກໍຄືທຸກຂະແໜງການ. ການເຄື່ອນໄຫວມີໝາກຜົນອັນພົ້ນເດັ່ນ, ຕັ້ງໜ້າ ແລະ ມີລັກສະນະບຸກ ທະລຸຄືແນວນີ້ໄດ້ ຢັ້ງຢືນອີກເທື່ອໜຶ່ງເຖິງຄວາມຖືກຕ້ອງເປັນທໍາ ຂອງແນວທາງນະໂຍບາຍການຕ່າງປະເທດຂອງພັກ ແລະ ການເຕີບໃຫຍ່ເຂັ້ມແຂງຂອງຂະແໜງການຕ່າງປະເທດແຫ່ງ ສປປ ລາວ.

    ໃນ 73 ປີ ທີ່ຜ່ານມາ, ການເຄື່ອນໄຫວວຽກງານການທູດລາວໄດ້ຮັບຜົນສໍາເລັດອັນໃຫຍ່ຫຼວງ. ສປປ ລາວ ມີຖານະບົດບາດຫຼາຍຂື້ນໃນເວທີພາກພື້ນ ແລະ ສາກົນ, ທີ່ມີເພື່ອນມິດສາກົນຢ່າງກວ້າງຂວາງ. ມາຮອດປັດຈຸບັນ, ພັກປະຊາຊົນປະຕິວັດລາວໄດ້ມີການພົວພັນກັບພັກການເມືອງຕ່າງປະເທດ ຫຼາຍກວ່າ 130 ພັກ. ສປປ ລາວ ໄດ້ສ້າງຕັ້ງສາຍພົວພັນທາງການທູດກັບ 141 ປະເທດ, ມີສໍານັກງານຕາງໜ້າການທູດຢູ່ຕ່າງປະເທດ 40 ແຫ່ງ, ໃນນີ້ ມີສະຖານເອກອັກຄະລັດຖະທູດ 26 ແຫ່ງ, ສໍານັກງານຜູ້ຕາງໜ້າຖາວອນ 3 ແຫ່ງ, ສະຖານກົງສຸນໃຫຍ່ 9 ແຫ່ງ ແລະ ຫ້ອງການກົງສຸນ 1 ແຫ່ງ, ເຊິ່ງສົມທຽບໃສ່ປີ 1975 ປະເທດເຮົາມີສາຍພົວພັນການທູດພຽງແຕ່ 44 ປະເທດເທົ່ານັ້ນ.