ລົງເລິກຜັນຂະຫຍາຍແນວຄິດການຕ່າງປະເທດ ສີ ຈິ້ນຜິງ
ຊຸກຍູ້ກໍ່ສ້າງຄູ່ຮ່ວມຊາຕາກໍາ ລາວ-ຈີນ ຈີນ-ລາວ
ບົດຄວາມສະຫຼອງວັນສ້າງຕັ້ງສາຍພົວພັນການທູດ ລາວ-ຈີນ ຈີນ-ລາວ ຄົບຮອບ 61 ປີ ບົດທີ 2
ທ່ານເລຂາທິການໃຫຍ່ ສີ ຈິ້ນຜິງ ຊີ້ອອກວ່າ ພັກກອມມູນິດຈີນ ເປັນພັກທີ່ສະແຫວງຫາຄວາມສຸກຂອງປະຊາຊົນຈີນ ທັງເປັນພັກທີ່ບາກບັ່ນສູ້ຊົນ ເພື່ອຄວາມກ້າວໜ້າຂອງມວນມະນຸດ. ປະຊາຊາດຈີນ ນິຍົມນັບຖືຄວາມກົມກຽວປອງດອງ ແລະ ຄວາມສາມັກຄີຮ່ວມມືຂອງທົ່ວໂລກ. ທ່ານເລຂາທິການໃຫຍ່ ສີຈິ້ນຜິງ ໄດ້ສະເໜີຂໍ້ລິເລີ່ມສໍາຄັນໃຫຍ່ທີ່ວ່າ ກໍ່ສ້າງຄູ່ຮ່ວມຊາຕາກໍາ, ທັງເປັນການພັດທະນາວັດທະນະທໍາດັ້ງເດີມທີ່ດີງາມຂອງຈີນ ດ້ວຍຫົວຄິດປະດິດສ້າງ, ທັງເປັນຄໍາຕອບທີ່ຊັດເຈນຕໍ່ຄໍາຖາມທີ່ມີລັກສະນະສະຕະວັດທີ່ວ່າ ໂລກນີ້ເປັນແນວໃດ ພວກຂ້າພະເຈົ້າຄວນເຮັດແນວໃດ, ເຊິ່ງໄດ້ເປັນກໍາລັງໃຈໃຫ້ແກ່ໂລກທີ່ບໍ່ໝັ້ນຄົງ ແລະ ບໍ່ແນ່ນອນ ໄດ້ຊີ້ທິດເຍືອງທາງຕໍ່ການພັດທະນາກ້າວໜ້າຂອງສັງຄົມມະນຸດ. ພາຍໃຕ້ການນໍາພາຂອງແນວຄິດສໍາຄັນໃຫຍ່ດັ່ງກ່າວ, ຈີນຕັ້ງໜ້າຊຸກຍູ້ເສີມສ້າງສາຍພົວພັນສາກົນແບບໃໝ່ ສົ່ງເສີມຮ່ວມກັນກໍ່ສ້າງໜຶ່ງແລວໜຶ່ງເສັ້ນທາງທີ່ມີຄຸນນາພາບສູງ ເສີມຂະຫຍາຍຄຸນຄ່າຮ່ວມຂອງມວນມະນຸດ, ຍາມໃດກໍໄດ້ພະຍາຍາມປະກອບສ່ວນເຂົ້າໃນສັນຕິພາບ ແລະ ຄວາມ ໝັ້ນຄົງຂອງທົ່ວໂລກ ເຂົ້າໃນການຂະຫຍາຍຕົວຮ່ວມກັນຂອງທົ່ວໂລກ ເຂົ້າໃນການແລກປ່ຽນອະລິຍະທໍາຂອງທົ່ວໂລກ ເພື່ອໃຫ້ການພັດທະນາໃໝ່ຂອງຈີນ ສະໜອງໂອກາດໃໝ່ໃຫ້ໂລກ.
ຈີນ ແລະ ລາວ ເປັນປະເທດສັງຄົມນິຍົມໃກ້ຄຽງທີ່ມີອຸດົມການອັນດຽວກັນ ເຊິ່ງໄດ້ກ້າວເດີນຢູ່ແຖວໜ້າຂອງການກໍ່ສ້າງຄູ່ຮ່ວມຊາຕາກໍາມວນມະນຸດ. ໃນປີ 2013 ທ່ານເລຂາທິການໃຫຍ່ ສີຈິ້ນຜິງ ກໍໄດ້ຊີ້ອອກວ່າ ຈີນ-ລາວ ເປັນຄູ່ຮ່ວມຊາຕາກໍາທີ່ມີຜົນປະໂຫຍດຮ່ວມກັນຢ່າງກວ້າງຂວາງ, ໃນປີ 2016 ສອງຝ່າຍ ໄດ້ປະກາດໃນຖະແຫຼງການຮ່ວມເປັນຄັ້ງທໍາອິດວ່າ ຈີນ-ລາວ ເປັນຄູ່ຮ່ວມຊາຕາກໍາທີ່ມີຄວາມໝາຍຍຸດທະສາດ, ໃນປີ 2019 ການນໍາສູງສຸດຂອງສອງພັກສອງລັດ ໄດ້ເຊັນແຜນແມ່ບົດ ວ່າດ້ວຍ ການສ້າງຄູ່ຮ່ວມຊາຕາກໍາ ຈີນ-ລາວ ລາວ-ຈີນ ເຊິ່ງໄດ້ຊຸກຍູ້ການສ້າງຄູ່ຮ່ວມຊາຕາກໍາ ຈີນ-ລາວ ລາວ-ຈີນ ແຕກດອກອອກຜົນ. ໃນຂະນະນີ້, ຂ້າພະເຈົ້າຂໍປະກອບບາງຕົວຢ່າງທາງດ້ານການຮ່ວມມືແທດຕົວຈິງ. ຈີນ ມີສຸພາສິດວ່າ ຖ້າຢາກຮັ່ງມີຂຶ້ນຕ້ອງສ້າງເສັ້ນທາງກ່ອນ, ທາງລົດໄຟ ຈີນ-ລາວ ລາວ-ຈີນ ເປັນທາງລົດໄຟທັນສະໄໝເສັ້ນທໍາອິດໃນປະເທດລາວ, ທາງດ່ວນວຽງຈັນ-ວັງວຽງ ກໍເປັນທາງດ່ວນເສັ້ນທໍາອິດ, ເສັ້ນທາງດັ່ງກ່າວ ກໍໄດ້ເປີດນໍາໃຊ້ຢ່າງເປັນທາງການ ເຊິ່ງໄດ້ເປັນຜົນດີຊ່ວຍປະເທດລາວ ບັນລຸຍຸດທະສາດ ຫັນປ່ຽນຈາກປະເທດບໍ່ມີທາງອອກສູ່ທະເລມາເປັນປະເທດເຊື່ອມຈອດ. ນໍ້າມັນເຊື້ອໄຟຄືເລືອດຂອງອຸດສາຫະກໍາ, ໃນໄລຍະສໍາຄັນຂອງການຫັນເປັນອຸດສາຫະກໍາຂອງລາວ ສອງຝ່າຍໄດ້ຮ່ວມມືສ້າງໂຮງງານກັ່ນນໍ້າມັນທັນສະໄໝແຫ່ງທໍາອິດ ເຊິ່ງໄດ້ປ່ຽນແປງປະຫວັດສາດທີ່ປະເທດລາວ ມີແຕ່ນໍາເຂົ້ານໍ້າມັນສໍາເລັດຮູບຈາກຕ່າງປະເທດໄດ້. ສອງຝ່າຍ ໄດ້ຕັ້ງໜ້າປຶກສາຮ່ວມກັນກໍ່ສ້າງເຄືອຂ່າຍສາຍສົ່ງໄຟຟ້າ ເພື່ອລົບລ້າງອຸປະສັກ ຊ່ວຍໝໍ້ໄຟຫັນເປັນຊັບສົມບັດທີ່ແທ້ຈິງ. ຊັບພະຍາກອນກະສິກໍາຂອງລາວ ຍັງບໍ່ໄດ້ຮັບການພັດທະນາທີ່ມີປະສິດທິຜົນ ແລະ ປອດໄພ, ສອງຝ່າຍ ໄດ້ສົ່ງເສີມຮ່ວມມືສົ່ງງົວເຂົ້າປະເທດຈີນ ເຊິ່ງໄດ້ຫັນທ່າແຮງດ້ານຊັບພະຍາກອນທໍາມະຊາດຂອງລາວ ເປັນທ່າແຮງດ້ານການພັດທະນາຮັ່ງມີຂຶ້ນ. ການຮ່ວມມືເຫຼົ່ານີ້ ທັງສອດຄ່ອງກັບກົດເກນຕະຫຼາດ ທັງສະແດງໃຫ້ເຫັນເຖິງມິດຕະພາບຈີນລາວ ໂດຍສະເພາະເປັນຜົນດີຕໍ່ການຍົກສູງຄວາມສາມາດພັດທະນາດ້ວຍຕົນເອງຂອງລາວ ເຊິ່ງໄດ້ສະແດງຈິດໃຈຮ່ວມຊາຕາກໍາຢ່າງເຕັມສ່ວນ.
ການຮ່ວມກັນກໍ່ສ້າງໜຶ່ງແລວໜຶ່ງເສັ້ນທາງ ເປັນເວທີສໍາຄັນໃນການປະຕິບັດຄູ່ຮ່ວມຊາຕາກໍາຂອງມວນມະນຸດ, ຈີນ ແລະ ລາວ ກໍໄດ້ກ້າວເດີນຢູ່ແຖວໜ້າຂອງການຮ່ວມກັນກໍ່ສ້າງໜຶ່ງແລວໜຶ່ງເສັ້ນທາງ, ໃນນັ້ນ ໝາກຜົນທີ່ພົ້ນເດັ່ນທີ່ສຸດກໍແມ່ນ ທາງລົດໄຟ ຈີນ-ລາວ ລາວ-ຈີນ. ໃນຖານະທີ່ເປັນໂຄງການສັນຍະລັກຂອງມິດຕະພາບຈີນ-ລາວ ແລະ ການຮ່ວມກັນກໍ່ສ້າງໜຶ່ງແລວໜຶ່ງເສັ້ນທາງ, ການກໍ່ສ້າງທາງລົດໄຟ ຈີນ-ລາວ ລາວ-ຈີນ ໄດ້ຮັບການຊີ້ນໍາ ແລະ ຊຸກຍູ້ຫຼາຍຈາກການນໍາຂັ້ນສູງຂອງສອງຝ່າຍ ຢ່າງສະເໝີຕົ້ນສະເໝີປາຍ, ທ່ານເລຂາທິການໃຫຍ່ ສີຈິ້ນຜິງ ກັບ ທ່ານເລຂາທິການໃຫຍ່ ທອງລຸນ ສີສຸລິດ ແລະ ການນໍາສູງສຸດຂອງລາວຮຸ່ນກ່ອນ ໄດ້ແລກປ່ຽນຄໍາເຫັນຫຼາຍຄັ້ງ ເອົາໃຈໃສ່ດ້ວຍຕົນເອງ ແລະ ຊີ້ທິດໂດຍກົງ ໂດຍໄດ້ຮຽກຮ້ອງວ່າ ຕ້ອງຮັບປະກັນການກໍ່ສ້າງທາງລົດໄຟ ຈີນ-ລາວ ລາວ-ຈີນ ດໍາເນີນໄປຢ່າງສະດວກ, ໄດ້ມີສາຍຕາເບິ່ງກວ້າງມອງໄກ ແລະກະກຽມລ່ວງໜ້າ ໂດຍໄດ້ກ່າວເນັ້ນວ່າ ຕ້ອງເສີມຂະຫຍາຍບົດບາດທີ່ເປັນແບບຢ່າງນໍາໜ້າຂອງທາງລົດໄຟ ຈີນ-ລາວ ລາວ-ຈີນ ແລະໂຄງການສໍາຄັນອື່ນ, ເຊິ່ງເປັນບ່ອນອີງພື້ນຖານ ແລະ ແຜນການປະຕິບັດງານໃຫ້ການຊຸກຍູ້ກໍ່ສ້າງທາງລົດໄຟຂອງສອງຝ່າຍ. ພາຍໃຕ້ການນໍາພາທາງດ້ານຍຸດທະສາດຂອງການນໍາຂັ້ນສູງສອງຝ່າຍ, ບັນດາພາກສ່ວນ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງຂອງສອງຝ່າຍ ໄດ້ປະສານສົມທົບຢ່າງແໜ້າແຟ້ນ ວາງນະໂຍບາຍພິເສດສຳລັບວຽກງານພິເສດ, ເປີດຊ່ອງທາງວ່ອງໄວສຳລັບບຸກຄະລາກອນ ແລະ ຊ່ອງທາງສີຂຽວສຳລັບສິນຄ້າ ເພື່ອຮັບປະກັນໃຫ້ໂຄງການດັ່ງກ່າວ ກໍ່ສ້າງຕາມມາດຕະຖານສູງ ແລະ ສໍາເລັດຕາມຄຸນນະພາບສູງ ພາຍໃຕ້ສະພາບການແຜ່ລະບາດຂອງພະຍາດໂຄວິດ-19. ໃນເວລາເປີດນໍາໃຊ້ຢ່າງເປັນທາງການ, ເລຂາທິການໃຫຍ່ຂອງສອງພັກ ໄດ້ເຂົ້າຮ່ວມພິທີເປີດນໍາໃຊ້ທາງລົດໄຟຮ່ວມກັນ, ພ້ອມທັງໄດ້ຮຽກຮ້ອງວ່າ ຕ້ອງຮັບປະກັນ ແລະ ດໍາເນີນໂຄງການທາງລົດໄຟດ້ວຍດີ ຕ້ອງສ້າງສາພັດທະນາເຂດແຄວ້ນຕາມເສັ້ນທາງລົດໄຟດ້ວຍດີ ເສີມສ້າງເສັ້ນທາງອັນມີຄ່າ ແລະ ນໍາເອົາຜົນປະໂຫຍດມາສູ່ປະຊາຊົນສອງຊາດ.
ພາຍໃຕ້ການຊີ້ນໍາບົນຈິດໃຈສໍາຄັນດັ່ງກ່າວ, ການດໍາເນີນທຸລະກິດຂອງລົດໄຟ ຈີນ-ລາວ ລາວ-ຈີນ ໄດ້ມີການເລີ່ມຕົ້ນອັນດີງາມ, ໂດຍສະເພາະແມ່ນທີມງານການດໍາເນີນທຸລະກິດຂອງສອງຝ່າຍ ໄດ້ຍຶດໝັ້ນການສ້າງຄວາມສຸກໃຫ້ແກ່ປະຊາຊົນ ແລະ ບໍລິການຜູ້ໂດຍສານ, ຍົກສູງຄຸນນະພາບການບໍລິການຢ່າງຕໍ່ເນື່ອງ, ເພີ່ມຂະບວນລົດໄຟໃນວັນເສົາວັນອາທິດ ແລະ ມື້ພັກເທດສະການ ເພື່ອຮັບປະກັນໃນການເດີນທາງມີຄວາມສະດວກໃນຊ່ວງໄລຍະທີ່ມີຜູ້ໂດຍສານຫຼາຍທີ່ສຸດ, ຈັດສະຖານທີ່ຂາຍປີ້ຂອງແຕ່ລະເມືອງຕາມເສັ້ນທາງລົດໄຟເພື່ອຕອບສະໜອງຄວາມຕ້ອງການອອກເດີນທາງຂອງຜູ້ໂດຍສານທີ່ມີການເພີ່ມຂຶ້ນ, ເຮັດໃຫ້ຂັ້ນຕອນໃນການຈັດຂົນສົ່ງສິນຄ້າງ່າຍຂຶ້ນ, ເຮັດໃຫ້ບໍລິການຂົນສົ່ງແບບ “ປະຕູຕໍ່ປະຕູ” ປະກົດເປັນຈິງ, ເລັ່ງລັດໃຫ້ສິນຄ້າຜ່ານດ່ານໄວຂຶ້ນ, ຍົກສູງປະສິດທິພາບ ແລະ ທັນເວລາໃນການຂົນສົ່ງ. ຕໍ່ກັບບັນຫາທີ່ພົບໃນການດໍາເນີນທຸລະກິດນັ້ນ, ທາງສອງຝ່າຍໄດ້ພະຍາຍາມແກ້ໄຂ ແລະ ປັບປຸງເຊັ່ນ: ຊຸກຍູ້ວຽກງານການຂາຍປີ້ທາງອອນໄລ ເພື່ອຍົກສູງລະດັບການໃຫ້ບໍລິການຜູ້ໂດຍສານດ້ານອາດສະລິຍາ, ເປີດເສັ້ນທາງໄວແມ່ນໍ້າຂອງແມ່ນໍ້າລ້ານຊ້າງ, ຍົກສູງລະດັບການບໍລິການການຂົນສົ່ງໃນພາກພື້ນ, ປັບປຸງມາດຕະການໃນການປ້ອງກັນ ແລະ ການຄວບຄຸມດ້ານຄວາມສ່ຽງ, ຍົກສູງລະດັບແບບເປັນລະບົບດ້ານການບໍລິການການປ້ອງກັນຄວາມປອດໄພ, ຮັບປະກັນລົດໄຟ ຈີນ-ລາວ ລາວ-ຈີນ ເດີນຢູ່ແຖວໜ້າໃນການສ້າງຄູ່ຮ່ວມຊາຕາກໍາ ຈີນ-ລາວ ລາວ-ຈີນ ແລະ ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະພາບສູງ.
ໝາກຜົນແຫ່ງການສ້າງຄູ່ຮ່ວມຊາຕາກໍາທີ່ ຈີນ-ລາວ ລາວ-ຈີນ ໄດ້ສົ່ງເສີມຊຸກຍູ້ນັ້ນ, ບໍ່ພຽງແຕ່ໄດ້ສະແດງໃນການຮ່ວມມືຂອງສອງຝ່າຍ, ຍັງສະແດງໃນການຮ່ວມກັນສູ້ຊົນ ເພື່ອກິດຈະກໍາທີ່ກ້າວໜ້າ ແລະ ຊີວິດການເປັນຢູ່ອັນດີງາມຂອງມະນຸດ, ເພີ່ມທະວີການຮ່ວມມື ແລະ ປະສານກັບຫຼາຍຝ່າຍຢ່າງຕັ້ງໜ້າ. ສະພາບໂຄວິດ-19 ເຮັດໃຫ້ຜົນງານການຫຼຸດຜ່ອນຄວາມທຸກຍາກອ່ອນລົງ, ເຮັດໃຫ້ບາດກ້າວການຟື້ນຟູເສດຖະກິດໂລກມີການຊັກຊ້າ, “ຄອງການພັດທະນາ” ລະຫວ່າງ ເໜືອກັບໃຕ້ມີການຂະຫຍາຍກວ້າງອອກ (ຄວາມແຕກໂຕນທາງດ້ານການພັດທະນາເພີ່ມຂຶ້ນ). ທ່ານ ສີຈິ້ນຜິງ ເລຂາທິການໃຫຍ່ພັກກອມມູນິດຈີນ ໄດ້ສະເໜີຂໍ້ລິເລີ່ມການພັດທະນາໂລກຢ່າງເຄັ່ງຂຶມ, ເນັ້ນຕ້ອງຍຶດໝັ້ນການພັດທະນາເປັນຫຼັກ, ຍຶດໝັ້ນຖືປະຊາຊົນເປັນຈຸດໃຈກາງ, ຍຶດໝັ້ນໃຈກວ້າງເອື້ອເຟື້ອເຜື່ອແຜ່, ຍຶດໝັ້ນຂັບເຄື່ອນ ແລະ ນະວັດຕະກໍາໃໝ່, ຍຶດໝັ້ນມະນຸດກັບທໍາມະຊາດຢູ່ຮ່ວມກັນ ແລະ ຍຶດໝັ້ນການວາງແຜນກ່ອນການປະຕິບັດ. ຂໍ້ລິເລີ່ມສໍາຄັນນີ້ເໝາະກັບສັນຕິພາບ ແລະ ການພັດທະນາເຊິ່ງເປັນຫົວຂໍ້ຍຸກສະໄໝ, ຕອບສະໜອງຄວາມປາດຖະຫນາທີ່ເຂັ້ມແຂງຂອງປະຊາຊົນແຕ່ລະປະເທດທີ່ສະແຫວງຫາຊິວິດການເປັນຢູ່ອັນດີກວ່າເກົ່າ, ນີ້ເປັນການເພີ່ມກໍາລັງແຮງດ້ານແນວຄິດໃຫ້ແກ່ຄວາມສາມັກຄີ ແລະ ການພັດທະນາຂອງບັນດາປະເທດ.
ມີຄວາມຈໍາເປັນຕ້ອງຊີ້ໃຫ້ເຫັນວ່າຂໍ້ລິເລີ່ມການພັດທະນາໂລກແມ່ນໃຫ້ຄວາມສໍາຄັນກັບຄວາມຕ້ອງການພິເສດຂອງປະເທດທີ່ກໍາລັງພັດທະນາ, ສະເໜີວິທີຕ່າງໆໃນການຊ່ວຍເຫຼືອການພັດທະນາ, ສະໜັບສະໜູນປະເທດທີ່ກໍາລັງພັດທະນາ ໂດຍສະເພາະທີ່ຍັງມີຄວາມຫຍຸ້ງຍາກຫຼາຍດ້ານ, ທັງໃຫ້ຄວາມສໍາຄັນໃນການຊຸກຍຸ້ການຮ່ວມມືໃນແປດດ້ານຄື: ຫຼຸດຜ່ອນຄວາມທຸກຍາກ, ຄວາມປອດໄພດ້ານອາຫານ, ການເຊື່ອມໂຍງເຊື່ອມຈອດກັນ, ພໍດີສອດຄອງກັບຄວາມຕ້ອງການຂອງຝ່າຍລາວ, ເປັນການຊ່ວຍແກ້ໄຂບັນຫາການພັດທະນາຢ່າງຮີບດ່ວນ, ຍົກສູງຄວາມສາມາດໃນການພັດທະນາດ້ວຍຕົນເອງ, ເລັ່ງລັດຂະບວນວິວັດການຫັນເປັນແບບອຸດສາຫະກໍາ ແລະ ແບບທັນສະໄໝ. ຝ່າຍລາວ ໃຫ້ຄວາມສໍາຄັນຢ່າງສູງ, ທ່ານ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ກໍໄດ້ສະແດງໃຫ້ການສະໜັບສະໜູນຢ່າງຕັ້ງໜ້າ. ຂໍ້ລິເລີ່ມສໍາຄັນນີ້ ເປັນແນວຄິດການພັດທະນາທີ່ຖືປະຊາຊົນເປັນຈຸດໃຈກາງ,ບໍ່ພຽງແຕ່ສອດຄອງກັບແຜນການພັດທະນາເສດຖະກິດສັງຄົມ 5 ປີ ຄັ້ງທີ 9 ຂອງ ສປປ ລາວ,ທັງສອດຄອງກັບຄວາມຕ້ອງການອັນຮີບດ່ວນຂອງແຕ່ລະປະເທດໃນການຟື້ນຟູເສດຖະກິດ ໂດຍສະເພາະແມ່ນປະເທດທີ່ກໍາລັງພັດທະນາທີ່ຢູ່ໃນສະພາບຂອງໂຄວິດ-19 ລະບາດ, ຝ່າຍລາວ ຫວັງວ່າຜ່ານການເຂົ້າຮ່ວມຂໍ້ລິເລີ່ມໄດ້ຮັບພະລັງໃໝ່ໃນການພັດທະນາເພື່ອບັນລຸເປົ້າໝາຍຈົບຈາກປະເທດດ້ອຍພັດທະນາຢ່າງໄວເທົ່າທີ່ຈະໄວໄດ້. ຕໍ່ກັບການປະຕິບັດຂໍ້ລິເລີ່ມການພັດທະນາໂລກພວກຂ້າພະເຈົ້າຍິນດີຈະປະສານສົມທົບກັບຝ່າຍລາວ ເພື່ອດໍາເນີນການຢ່າງລະອຽດ,ຮ່ວມກັນສ້າງປະຊາຄົມຮ່ວມຊາຕາກໍາແຫ່ງການພັດທະນາຂອງໂລກ, ເສີມສ້າງເນື້ອໃນຄູ່ຮ່ວມຊາຕາກໍາ ຈີນ-ລາວ ລາວ-ຈີນ ໃຫ້ສົມບຸນຢ່າງຕໍ່ເມື່ອງ.