ໂດຍຕອບສະໜອງຕາມການເຊື້ອເຊີນຂອງ ພະນະທ່ານ ພົນເອກ ປຣາຢຸດ ຈັນໂອຊາ, ນາຍົກລັດຖະ ມົນຕີ ແຫ່ງ ຣາຊະອານາຈັກໄທ, ຄະນະຜູ້ແທນແຫ່ງ ສປປ ລາວ ນໍາໂດຍ ພະນະທ່ານ ທອງລຸນ ສີສຸລິດ, ນາຍົກລັດຖະ ມົນຕີ ພ້ອມດ້ວຍພັນລະຍາ ແລະ ຄະນະ ຈະໄດ້ເດີນທາງເຂົ້າຮ່ວມກອງປະຊຸມສຸດຍອດຂອບການຮ່ວມມືອາຊີ ຫຼື ເອຊີດີ ຄັ້ງທີ 2 (2nd ACD Summit) ໃນວັນທີ 9-10 ຕຸລາ 2016 ທີ່ ບາງກອກ, ປະເທດ ໄທ.
ກອງປະຊຸມສຸດຍອດຄັ້ງທີ 2 ນີ້ ບັນດາຜູ້ນໍາສະມາຊິກເອຊີດີຈະໄດ້ຮ່ວມກັນປຶກສາຫາລື ເສີມຂະຫຍາຍການຮ່ວມມືລະຫວ່າງປະເທດອາຊີນໍາກັນ ແລະ ຮັບຮອງເອົາບັນດາຖະແຫຼງການທີ່ສໍາຄັນ ຈໍານວນໜື່ງ ເພື່ອເປັນການກໍານົດອານາຄົດຮ່ວມກັນ ຂອງອາຊີ.
ຂອບການຮ່ວມມືເອຊີດີ ໄດ້ຮັບການສ້າງຕັ້ງຂື້ນໃນປີ 2002. ປະຈຸບັນມີ 12 ຂະແໜງການຮ່ວມມື ທີ່ໄດ້ມີການເຄື່ອນໄຫວປົກກະຕິ ເຊັ່ນ: ກະສິກໍາ,ສຶກສາ, ພະລັງງານ, ສິ່ງແວດລ້ອມ, ການເງິນ, ພັດທະນາຊັບພະຍາກອນມະນຸດ, ຂໍ້ມູນຂ່າວສານ, ໄພພິບັດ, ການຫຼຸດຜ່ອນຄວາມທຸກຍາກ, ຄວາມປອດໄພໃນການຂັບຂີ່, ທ່ອງທ່ຽວ ແລະ ການຮ່ວມມືດ້ານເຊື່ອມຈອດ. ມາເຖີງປະຈຸບັນມີສະມາຊິກທັງໜົດ 34 ປະເທດ.