ໂດຍຕອບສະໜອງຕາມຄຳເຊີນຂອງ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ພະນະທ່ານ ນາງ ມີເກແອນ ຊັງ (Michaelle JEAN), ເລຂາທິການໃຫຍ່ອົງການຝຣັງໂກໂຟນີສາກົນ, ຈະດຳເນີນການຢ້ຽມຢາມ ສປປ ລາວ ຢ່າງເປັນທາງການ, ໃນລະຫວ່າງວັນທີ 13-15 ຕຸລາ 2016, ເພື່ອເປັນການເສີມຂະຫຍາຍສາຍພົວພັນ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ອົງການຝຣັງໂກໂຟນີ.
ປະຫວັດໂດຍຫຍໍ້
ວັນ/ເດືອນ/ປີເກີດ: 06 ກັນຍາ 1957, ທີ່ ເມືອງປອກໂອແປຣັງ, ປະເທດໄຮຕິ
ການສຶກສາ:
- ຈົບມັດທະຍົມສຶກສາ ສາຍພາສາ ແລະ ວັນນະຄະດີ ອີຕາລີ;
- ຈົບການສຶກສາລະດັບປະລິນຍາໂທ ສາຂາວັນນະຄະດີ ຈາກມະຫາວິທະຍາໄລ ມົງເຣອານ;
- ໄດ້ຮັບທຶນການສຶກສາ 3 ທຶນ ເພື່ອເພີ່ມຄວາມຮູ້ທາງດ້ານ ພາສາອີຕາລີ ຢູ່ ມະຫາວິທະຍາໄລ ເປຣູສ໌, ມະຫາວິທະຍາໄລ ຟລໍເຣນ ແລະ ມະຫາວິທະຍາໄລ ກາໂຕລິກ ມີລານ;
ການເຄື່ອນໄຫວວຽກງານ:
- ປີ 1968 ໄດ້ຍົກຍ້າຍໄປອາໄສ ຢູ່ ປະເທດ ການາດາ;
- ປີ 1988-2005: ເປັນນັກຂ່າວ ແລະ ຜູ້ປະກາດຂ່າວທາງໂທລະພາບ ແລະ ວິທະຍຸຂອງການາດາ, ຊຶ່ງຜົນຂອງການຈັດລາຍການ ໄດ້ຮັບລາງວັນຫລາຍອັນ; ໄດ້ເຂົ້າຮ່ວມໃນການສ້າງຮູບເງົາສາລະຄະດີຫລາຍໆເລື່ອງ ໂດຍໄດ້ຮັບການຮຽບຮຽງຈາກສາມີຂອງເພິ່ນເອງ;
- ປີ 2005-2010: ເປັນຜູ້ສຳເລັດລາດຊະການຂອງ ປະເທດການາດາ ຄົນທີ 27. ໃນໄລຍະທີ່ດຳລົງຕຳແໜ່ງດັ່ງກ່າວ, ທ່ານໄດ້ໄປຢ້ຽມຢາມບັນດາປະເທດຕ່າງໆຫລາຍກວ່າ 10 ປະເທດ ໃນທະວີບເອີຣົບ;
- ປີ 2012, ເພິ່ນໄດ້ຮັບໜ້າທີ່ເປັນປະທານມະຫາວິທະຍາໄລ ອົດຕາວາ, ຊຶ່ງເປັນສະຖາບັນຮຽນສອງພາສາ (ຝຣັ່ງ-ອັງກິດ) ທີ່ໃຫຍ່ທີ່ສຸດໃນໂລກ;
- ຖືກເລືອຕັ້ງເປັນ ເລຂາທິການໃຫຍ່ອົງການຝຣັງໂກໂຟນີສາກົນ, ໃນວັນທີ 30 ພະຈິກ 2014, ໂດຍກອງປະຊຸມສຸດຍອດ ຄັ້ງທີ 15 ຂອງອົງການ (ເຂົ້າຮັບໜ້າທີ່ ໃນວັນທີ 01 ມັງກອນ 2015);
ຄວາມຮູ້ດ້ານພາສາ:
- ຝຣັ່ງ, ອັງກິດ, ອີຕາລີ, ສະເປນ, ເຄຣໂອນ ແລະ ປອກຕຸຍການ