ວັນທີ 13 ມິຖຸນາ 2018, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ຈະເດີນທາງເຂົ້າຮ່ວມງານວາງສະແດງສິນຄ້າຈີນ-ອາຊີໃຕ້ ຄັ້ງທີ 5 ແລະ ງານວາງສະແດງແລກປ່ຽນສິນຄ້າຂາເຂົ້າ-ຂາອອກ ຄັ້ງທີ 25 ພາຍໃຕ້ຫົວຂໍ້ “ການເຊື່ອມໂຍງເຂົ້າສູ່ ໜຶ່ງແລວ ໜຶ່ງເສັ້ນທາງ ສຳລັບການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ (Integrating into the Belt and Road for Win-win Cooperation)”ຕາມການເຊື້ອເຊີນຂອງລັດຖະບານ ສປ ຈີນ ທີ່ຈະຈັດຂຶ້ນໃນວັນທີ 14-20 ມິຖຸນາ 2018 ທີ່ ຄຸນໝິງ, ແຂວງຢຸນໜານ, ສປ ຈີນ.
ງານວາງສະແດງຄັ້ງນີ້ ແມ່ນແນໃສ່ການສົ່ງເສີມດ້ານການຄ້າ, ການລົງທຶນ ລະຫວ່າງຈີນກັບບັນດາປະເທດ ໃນອາຊີໃຕ້-ອາຊີຕາເວັນອອກສຽງໃຕ້, ແລກປ່ຽນຮູບແບບທາງການຄ້າ, ການລົງທຶນລະຫວ່າງກັນໂດຍຜ່ານເວທີປຶກສາຫາລືການຮ່ວມມືພາຍໃຕ້ຫົວຂໍ້ຕ່າງໆ ເຊັ່ນ: ການຮ່ວມມື ຈີນ-ອາຊຽນ, ການຮ່ວມມືອານຸພາກພື້ນແມ່ນ້ຳຂອງ, ການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ແລະ ອື່ນໆ.
ໃນໂອກາດການໄປຮ່ວມກອງປະຊຸມຄັ້ງນີ້, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ ຈະໄດ້ພົບປະກັບຄູ່ຮ່ວມຕໍາແໜ່ງຝ່າຍ ສປ ຈີນ ທ່ານ ຫູ ສຸ່ນຮົວ (Mr. Hu Chunhua), ຮອງນາຍົກລັດຖະ ມົນຕີແຫ່ງ ສປ ຈີນ ແລະ ທ່ານ ຢວນ ເຊິງຟ້າ, ປະທານຈັດງານ, ເຈົ້າແຂວງຢຸນໜານ ເພື່ອເປັນການເພີ່ມທະວີຮັດ ແໜ້ນສາຍພົວພັນມິດຕະພາບ ລະຫວ່າງ ລາວ ແລະ ຈີນ ໃນຖານະເປັນຄູ່ຮ່ວມມືຍຸດທະສາດຮອບດ້ານໃຫ້ແໜ້ນແຟ້ນຍິ່ງໆຂຶ້ນ.