ໂດຍຕອບສະໜອງຕາມຄໍາເຊີນຂອງສະຫາຍ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດປະຊາທິປະໄຕ ປະຊາຊົນລາວ, ສະຫາຍ ມິເກັນ ມາຣິໂອ ດີເອັດສ-ກາແນນ ເເບຣມູເດັດສ (Miguel Diaz-Canel Bermudez), ປະທານສະພາແຫ່ງລັດ ແລະ ປະທານສະພາລັດຖະມົນຕີ ແຫ່ງ ສາທາລະນະລັດ ກູບາພ້ອມດ້ວຍພັນລະຍາ ແລະ ຄະນະຈະດຳເນີນການຢ້ຽມຢາມທາງລັດຖະກິດ ສາທາລະນະລັດປະຊາທິປະໄຕ ປະຊາຊົນລາວ, ລະຫວ່າງວັນທີ 10-11ພະຈິກ 2018.
ຊີວະປະຫວັດ ຂອງ ທ່ານ ມີເກັນ ມາຣີໂອ ດີເອັດສ-ກາແນນ ແບຣມູເດັດສ
(Miguel Mario Diaz-Canel Bermudez),
ປະທານສະພາແຫ່ງລັດ ແລະ ປະທານສະພາລັດຖະມົນຕີ ແຫ່ງ ສ.ກູບາ
- - ທ່ານ Miguel Diaz-Canel Bermudez, ເກີດເມື່ອວັນທີ 20 ເມສາ 1960 ທີ່ເມືອງ Placetas, ແຂວງ Villa Clara;
- - ເຂົ້າເປັນສະມາຊິກພັກ ປີ 1987
- - ລະດັບການສຶກສາ:
+ ປີ 1982, ຮຽນຈົບປະລິນຍາຕີຂະແໜງວິສະວະກໍາໄຟຟ້າ ທີ່ ມະຫາວິທະຍາໄລ Marta Abreu, ແຂວງ Villa Clara;
+ ຈົບປະລິນຍາໂທ ດ້ານການປົກຄອງ;
- - ປີ 1982-1985, ເລີ່ມຕົ້ນເປັນເຈົ້າໜ້າທີ່ ປະຈໍາຢູ່ ກອງກໍາລັງປະກອບອາວຸດປະຕິວັດກູບາ;
- - ປີ 1985-1987, ເປັນອາຈາສອນ ຢູ່ ມະຫາວິທະຍາໄລ Marta Abreu, ແຂວງ Villa Clara;
- - ປີ 1987, ເປັນຄະນະສະຫະພັນຊາວໜຸ່ມຄອມມູນິດກູບາ ຂອງມະຫາວິທະຍາໄລ Marta Abreu ແລະ ໄດ້ເດີນທາງໄປປະຕິບັດພາລະກິດພັນທະສາກົນກໍາມະຊີບ ຢູ່ນີກາລາກົວ;
- - ປີ 1989, ເປັນເລຂາທີໜຶ່ງຄະນະບໍລິຫານງານສະຫະພັນຊາວໝຸ່ມຄອມມູນິດແຂວງ Villa Clara ແລະ ເປັນເລຂາທີສອງຄະນະບໍລິຫານງານສະຫະພັນຊາວໜຸ່ມຄອມມູນິດກູບາ;
- - ປີ 1991 ໄດ້ຖືກຮັບຮອງເຂົ້າເປັນສະມາຊິກສູນກາງພັກ;
- - ປີ 1992-1993, ເປັນຄະນະບໍລິຫານງານຊາວໜຸ່ມຄອມມູນິດກູບາ, ຊີ້ນໍາວຽກງານອຸດົມການ-ແນວຄິດ ແລະ ແຮງງານ;
- - ປີ 1993-1994, ເປັນເລຂາພັກແຂວງ Villa Clara ແລະ ເປັນສະມາຊິກຜູ້ແທນສະພາແຫ່ງຊາດ ສ.ກູບາ;
- - ປີ 2003, ຖືກເລືອກຕັ້ງເປັນເລຂາພັກແຂວງ Holguin ແລະ ເປັນກໍາມະການກົມການເມືອງສູນກາງພັກຄອມມູນິດກູບາ;
- - ປີ 2009-2012, ເປັນລັດຖະມົນຕີກະຊວງສຶກສາຊັ້ນສູງ;
- - 21/03/2012, ເປັນຮອງປະທານສະພາແຫ່ງລັດ ແລະ ຮອງປະທານສະພາລັດຖະມົນຕີ, ຊີ້ນໍາວຽກງານການສຶກສາ, ວິທະຍາສາດ, ກິລາ ແລະ ວັດທະນະທໍາ;
- - 21/02/2013 ເປັນຮອງປະທານສະພາແຫ່ງລັດ ແລະ ຮອງປະທານສະພາລັດຖະມົນຕີ ຜູ້ທີ່ໜຶ່ງ;
- - 19/04/2018 ເປັນປະທານສະພາແຫ່ງລັດ ແລະ ປະທານສະພາລັດຖະມົນຕີ ແຫ່ງ ສ.ກູບາ.